Salmos 68 - Bible in Tzeltal Bachajón

Te Dios yu'un Sinaí soc yu'un te ch'ul awilal

Salmo yu'un David.

¹ Ac'a hahchuc te Diose, ac'a spuquic bahel te scontratac, ac'a loc'uc ta ahnel te mach'atic ya xp'ajot yu'un.

² Hich yac ach'ayticlan bahel te bin ut'il ya xtenot bahel ta ic' te ch'ahile; hich te bin ut'il ya x'uhl chabec' ta c'ahc', hich me ya xch'ay bahel ta stojol Dios te mach'atic chopolique.

³ Yan te mach'atic toj yo'tanic tse'el yo'tanic, bayel yutsil yo'tanic ta stojol Dios, ya xwihlic yu'un yutsil q'uinal ya ya'iyic.

⁴ C'ayojtayahic te Diose, c'ayojtaybeyahic yutsil sc'oblal te sbihile; halbeyahic yutsil sc'oblal te mach'a cajal ta tocal ya xbehen bahel. Jehová te sbihile, ¡tse'eluc me awo'tanic ta stojol!

⁵ Te Dios te ay ta ch'ul templo yu'un, ha stat te me'ba'etic, soc ya xc'opoj yu'un te me'ba' antsetique.

⁶ Te mach'atic ihquitaybilic, Dios ya yac' nahinuquic soc mach'atic junax na banti ayinemic; ya yac' ta libre te jchuqueletic soc ya yac'ticlambe bayel sbiluquic; yan te jtoybahetic nahinemic ta taquin q'uinal.

⁷ Dios cu'un, te c'alal nahilijat loq'uel ta stojol te pueblo awu'un, te c'alal behenat bahel ta jochol taquin q'uinal, Selah

⁸ la syuq'uilan sba te q'uinal, yahl cohel tal ha'al ta ch'ulchan; la syuq'uilan sba te wits Sinaí ta stojol Dios, ha te Dios yu'un Israel.

⁹ Dios cu'un, la awac' tal bayel ha'al; la awa'be xan yip te q'uinal awu'une.

¹⁰ Te pueblo awu'un tey nahinic a; ta scuenta te lec awo'tan, Dios cu'un, la awa'be bintic tuhun yu'un te pobre.

¹¹ Ay bin la yal te Jehová, tsobol antsetic la spucbeyic ta halel:

¹² Ahnic bahel ajwaliletic soc te soldadohetic yu'unic, xchihic, soc te antsetic te hilic ta snahic la spuquic te bintic pojbile.

¹³ La amehtsan abahic ta yohlil banti q'uejbil tuminchijetic, hich ya xc'ohex te bin ut'il xic' stsuhmut potsbil ta plata, soc te sc'uc'umal potsbil ta oro.

¹⁴ Te c'alal la spucticlan bahel te ajwaliletic te Mach'a spisil ya xhu' yu'une, hich c'ohem te bin ut'il yahl me'sic ta wits Salmón.

¹⁵ Mero toyol te witsetic yu'un Basán, ha toyol te witsiltic yu'une.

¹⁶ Ha'ex te mero toyol witsex, ¿bin yu'un yac awil soc sbic'tal awo'tan te wits te la sc'an yo'tan Dios te ya xnahin tey a? Te Jehová ya me xnahin sbahtel q'uinal tey a.

¹⁷ Te carretahetic yu'un Dios c'ax bayel ta mil; te Cajwal loc' tal ta Sinaí, hul ta templo yu'un.

¹⁸ Mohat bahel ta toyol, la awic'ticlan bahel jchuqueletic; la awich'be mahtaniletic yu'un te ants-winiquetic, soc yu'un te mach'atic stoyoj sbahic, scuenta yu'un tey ya xnahinat a, Jehová Dios.

¹⁹ ¡Bayel yutsil te Cajwaltic! ¡Jujun c'ahc'al ya yich'botic quihcatstic te Dios te Jcoltaywanej cu'untique! Selah

²⁰ Te Dios cu'untic ha ya xcoltaywan, ya scoltayotic ta lajel te Cajwaltic Jehová.

²¹ Dios ya me yehchentesbe sjol te scontratac, te sjolic te naht stsotsel te mach'atic yaquic to ta spasel te smulique.

²² Hich la yal te Cajwaltic: Ya cac' te ya suhtat loq'uel ta Basán; ya cac' te ya suhtat loq'uel ta sc'ubulil mar,

²³ scuenta yu'un yac amul awoc ta sch'ich'el te acontratac, soc ya sleq'uic te ts'i'etic awu'un, xchi.

²⁴ Chicanix te mach'atic schapoj sbahic te ya st'unat talel, Diosat cu'un, te mach'atic ya st'unic te Dios cu'un, te Ajwalil cu'un, ta ochel bahel ta ch'ul awilal.

²⁵ Ha nahil ayic te jc'ayojetic, patil te mach'atic ya stijic a'tejibaletic yu'un c'ayoj; ta j'ohlil yacalic ta bahel te ach'ixetic, yacalic ta stijel panderohetic.

²⁶ ¡Halbeyahic yutsil sc'oblal te Dios ta muc'ul tsoblej; halbeyahic yutsil sc'oblal Cajwaltic, ha'ex te sts'umbalex Israel!

²⁷ Tey ay a te Benjamín te ihts'inal, yac yic'belic bahel, tey ayic a te tsobol príncipaletic yu'un Judá, te príncipaletic yu'un Zabulón soc yu'un Neftalí.

²⁸ Dios cu'un, ac'a ta ilel awu'el; ac'a ta ilel xan, Dios cu'un, te bin apasoj ta jtojolcotique.

²⁹ Ta scaj te Templo awu'un ta Jerusalén ya yich'bat tal mahtaniletic awu'un te ajwaliletique.

³⁰ Coma te chambahlam te ay ta tuhtiltic, te jchahp torohetic soc te jcolel torohetic yu'un te nacionetique, ha to c'alal ya squejan sbahic soc te plata yu'unique. Puca bahel te pueblohetic te ya smulanic guerra.

³¹ Ya xhahchic tal príncipaletic ta Egipto; te Etiopía ya me shach sc'abic ta stojol Dios.

³² ¡C'ayojtayahic te Diose, jcuentahinwanejetic ta bahlumilal, c'ayojtayahic te Cajwaltique, Selah

³³ ha te mach'a mohem ta cawu yac ta behel ta ch'ulchan te stalel ay ta namey! Ya yac' chicnajuc te sc'op, ha te sc'op te bayel yipe.

³⁴ Halbeyahic sc'oblal te yu'el Dios; ay ta stojol Israel te smuc'ul yutsilal soc ay ta ch'ulchan te yu'ele.

³⁵ Jchahp ay awutsilal, Dios cu'un, ta ch'ul awilal awu'un; te Dios yu'un Israel ya ya'be yu'el soc yip te pueblo yu'une. ¡Ac'a yich' halbeyel yutsilal te Diose!