Salmos 64 - Bible in Tzeltal BachajónSc'anel canantayel ta stojol scontratac te muquen ayic Yu'un jach-c'ayoj. Salmo yu'un David. 1 Dios cu'un, a'iybon me jc'op te ya cac' jparte ta atojol; canantaybon jcuxlejal ta stojol te jcontratac te ya yaq'uic xiwel. 2 Nac'awon ta stojol te bin muquen ya schapic te mach'atic chopolic, ta stojol te bin ya snopic te mach'atic ya spasic bin chopol, 3 te ya shuxbe ye te yaq'uic hich te bin ut'il espada, soc ya st'imic bahel sc'opic te ay svenenohil hich te bin ut'il ya'tejibal t'ihmalte', 4 yu'un muquen ya st'imbeyic bahel te mach'a mayuc bin snopoje; ch'ayal yo'tanic a ya ya'beyic, ma xi'ic. 5 Stalel ay yip yo'tanic ta spasel te bin chopol, ya schapic bin ut'il ya yaq'uic yaquil te ma xchicnaj ta ilele; ya yalic: ¿Mach'a ya yil? xchihic. 6 Ya snopic te bin ma tojuc, hich ya yalic: Chahpambil ta lec cu'untic, xchihic. Ma xhu' ta na'el te bin snopoj ta yo'tan te ants-winiquetique. 7 Pero Dios me ya yehchenteslan ta ya'tejibalul st'ihmalte'; ch'ayal me yo'tanic a ya x'ehchentesotic. 8 Ha ni me ya xyahltesotic yu'un te sc'opique. Spisil te mach'atic ya yilic ya me slabanic. 9 Hich spisil ants-winiquetic ya me xi'ic, ya me yalic te a'teliletic yu'un Dios soc ya me sna'ulanic te bintic spasoje. 10 Tse'el me yo'tan ta stojol Jehová te mach'a toj yo'tan soc ha ya smuc'ulin yo'tan; spisil te mach'atic toj yo'tanic, bayel me yutsil yo'tanic. |
Biblia Tzeltal Bachajon © Sociedad Bíblica de México, A.C., 2006.
Bible Society of Mexico