Salmos 60 - Bible in Tzeltal BachajónSc'anel coltayel ta stojol scontra Yu'un jach-c'ayoj; ta sc'ayojil Liriohetic, ha testigo-c'op. Ha Mictam yu'un David scuenta nohptesel, te c'alal la ya'be guerra te Aram-Naharaim soc Aram de Soba, soc te suht tal Joab, la slajin j'ohlil scha'pic (12,000) ta tuhl yu'un Edom ta spamlej yu'un Ats'am. 1 Dios cu'un, la ap'ajotcotic, la ajinotcotic; ilinemat. ¡Suhtan tal ta jtojolcotic! 2 La awac' nihcuc soc la ajat te lumq'uinale; lecubtesa te banti jatemic, como yac ta nihquel. 3 La awa'be yil tulan pruebahetic te pueblo awu'un; la awa'botcotic vino te ya x'ahlajanotcotic yu'une. 4 Yan te mach'atic ya xi'at la awa'be sbandera te ya yich' toyel mohel ta scaj te smelelil c'ope. Selah 5 Coltaya ta swa'el ac'ab soc a'iybon jc'op scuenta yu'un hich ya xcolic ta libre te mach'atic c'uxic ta awo'tane. 6 Hich yaloj Dios ta ch'ul templo yu'un: Tse'el co'tan ya jpucticlan te Siquem soc ya jp'is te spamlej yu'un Sucot. 7 Ho'on cu'un te Galaad soc Manasés; ha smahquil jol te Efraín; te Judá ha jbastón yu'un pasaw ta mandar; 8 te Moab ha vasija yu'un ya jpoc jc'ab a; ya jch'oj bahel jtep ta stojol Edom; ya x'awonon scuenta tsalaw ta stojol Filisteo, xchi te Diose. 9 ¿Mach'a ya yic'on bahel ta pueblo te ay sjoyob ts'ahcul? ¿Mach'a ya yic'on bahel c'alal Edom? 10 ¿Ma bal ha'ucat, Dios cu'untic, te la ap'ajotcotic soc te ma ba ya xloc'atix bahel soc te soldadohetic cu'uncotique? 11 Coltayawotcotic ta sc'ab te jcontracotic, como tojol te coltayel yu'un winiquetic. 12 Ta scuenta Dios ya jpastic bintic muc' ta pasel, ha me ya sts'o' ta teq'uel te jcontratique. |
Biblia Tzeltal Bachajon © Sociedad Bíblica de México, A.C., 2006.
Bible Society of Mexico