Salmos 59 - Bible in Tzeltal Bachajón

Sc'anel coltayel loq'uel ta sc'ab scontratac

Yu'un jach-c'ayoj; ta sc'ayojil Ma me xajin. Mictam yu'un David, te c'alal Saúl la sticon ta stsahtaybeyel sna yu'un ya smil te David.

¹ Dios cu'un, coltayawon ta sc'ab te jcontratac; coltayawon ta sc'abic te mach'atic ya xhahch scontrahinonique.

² Coltayawon ta sc'abic te mach'atic ya spasic bin chopol, coltayawon ta sc'abic te jmilawetique.

³ Como snac'oj sbahic yu'un ya smilonic; stsoboj sbahic ta jcontra winiquetic te ay yipic, ma ha'uc ta scuenta te bin jpasoj o ta scuenta jmul, Jehová.

⁴ Mayuc bin chopol jpasoj, pero ahnimal ya schahpan sbahic ta jcontra. ¡Cuxa awo'tan, la' tahawon, ilawil!

⁵ Ha'at Jehová, Diosat yu'un tsobolic, Diosat yu'un Israel, cuxa awo'tan yu'un yac awac'ticlambe castigo spisil te nacionetic; ma me xana'be yo'bolil sbahic te mach'atic stoyoj sbahic soc schopolil. Selah

⁶ Ya suhtic tal ta tibiltic, xwolajanic hich te bin ut'il ts'i'etic, ya sbehentayic te pueblo.

⁷ Yac ta loq'uel sbuhl yehic, ay espada ta sti'il yehic, hich ya yalic: ¿Mach'a ya ya'iy? xchihic.

⁸ Pero ha'at, Jehová, yac atse'lay; yac alaban spisil te nacionetique.

⁹ Ha'at quipat, ya jmahliyat; como ha ahnibal cu'un te Diose.

¹⁰ Te Dios te c'uxon ta yo'tan nahil ya xbaht cu'un; Dios ya ya'bon quil te ya jtsal te jcontrataque.

¹¹ Ma me xamil, scuenta yu'un ma xch'ay ta yo'tanic a te pueblo cu'une. Pucticlana bahel ta scuenta awu'el, pehc'anlana, Jehová, mahquilat cu'uncotic.

¹² Ta scaj smul ye, ta scaj sc'opic, ac'a yich'ic chuquel yu'un te stoybahilic, soc yu'un te chopol sc'oblal ya yalic soc te lot ya ya'iyique.

¹³ ¡Lajinlana ta scuenta ilimba, lajinlana ha to c'alal jc'axel ya xlajic! Ac'a sna'ic te Dios scuentahinej Jacob c'alal ta sti'il bahlumilal. Selah

¹⁴ Ya suhtic tal ta tibiltic, xwolajanic hich te bin ut'il ts'i'etic, ya sbehentayic te pueblohe.

¹⁵ Ayic ta behyom ta slehel swe'elic, teme ma ba ya xnoj sch'uhtic, ya xhahchic ta aw.

¹⁶ Pero te ho'one ya jc'ayojtaybat awu'el, ta sab ya calbe yutsil sc'oblal te sc'uxul awo'tan; como ha'at jcanantaywanejat cu'un, ha'at ahnibalat cu'un te c'alal ayon ta wocol.

¹⁷ ¡Ha'at quipat, ya jc'ayojtayat, como ha'at ahnibalat cu'un, ha'at Diosat cu'un te c'uxon ta awo'tan!