Salmos 53 - Bible in Tzeltal Bachajón

Sonsohil soc schopolil ants-winiquetic

Yu'un jach-c'ayoj. Hich te bin ut'il Mahalat. Masquil yu'un David.

¹ Te mach'a ma sna' q'uinal hich ya yal ta yo'tan: Mayuc Dios, xchi. Jihnem yo'tanic, ha spasojic te bin chopol te ilobtic sba; ¡mayuc mach'a ya spas te bin leque!

² C'alal ta ch'ulchan ya x'ilot yu'un Dios te ants-winiquetic, yu'un ya yil teme ay mach'a ay sp'ijil yo'tan te ya sle te Diose.

³ Jujutuhl suht ta spatic, spisilic jihnem yo'tanic; mayuc mach'a ya spas te bin lec, mayuc jtuhluc.

⁴ ¿Ma bal ayuc snopojibal yu'un te mach'atic ya spasic bin chopol, ha te ya slajimbonic te pueblo cu'un hich te bin ut'il ya swe'ic pan, soc te ma xyalbeyic wocol te Diose?

⁵ Tey tsacotic ta tulan xiwel ta banti mayuc xiwel, como Dios la spucbe sbaquel te mach'atic la scontrahinat. La awac' te ya xq'uexawic como ch'ayotic hilel yu'un te Diose.

⁶ ¡Ha'uc ya xloc' tal ta wits Sión te scolel te Israel! Te bin ora Dios ya suhtes tal ta chuquel te pueblo yu'une, stse'el me yo'tan Jacob soc bayel me yutsil yo'tan Israel yu'un.