Salmos 52 - Bible in Tzeltal Bachajón

Mayuc stuc stoybahil jchopol-o'tanil

Yu'un jach-c'ayoj. Ha Masquil yu'un David te c'alal Doeg te edomita-winic la yalbe te Saúl: Te David bahem ta sna Ahimelec, xchi.

¹ ¿Bin yu'un yac atoy aba yu'un te bin chopol, ha'at te bayel awip? ¡Te sc'uxul yo'tan Dios stalel ay!

² Te awac' ha nax ya yal te bin chopol; ya xlo'loywan hich te bin ut'il navaja te huxbil ye.

³ C'ax hich c'ux ta awo'tan a te bin chopol te bin ut'il te bin leque, c'ax hich c'ux ta awo'tan a te lot te bin ut'il te smelelil c'ope. Selah

⁴ C'ux ta awo'tan spisil c'opetic te ya xlajinwanic, ha'at jlo'loywanej ehalat.

⁵ Dios me ya slajinat sbahtel q'uinal, ya stsacat soc ya sch'ojat loq'uel ta ana; ya sbulat loq'uel ta q'uinal yu'un mach'atic cuxulic. Selah

⁶ Te mach'atic toj yo'tanic ya me yilic soc ya me xi'ic; ya me stse'layic, hich me ya yalic:

⁷ Ha te mach'a ma ha'uc ahnibal c'ohem yu'un te Diose, te ha la smuc'ulin yo'tan te bayel sc'ulejal, soc te la yich' yip ta bin chopol, xchihic.

⁸ Pero te ho'one, hichon bin ut'il yaxal olivo ta sna Dios; ha smuc'ul co'tan sbahtel q'uinal te sc'uxul yo'tan te Diose.

⁹ Spisil ora ya calbe yutsil ac'oblal yu'un te hich apasoje; ya me smuc'ulin co'tan te abihil, como ha lec stuquel ta stojol te mach'atic awu'un te ch'ultesbilique.