Salmos 51 - Bible in Tzeltal Bachajón

David ya suhtes yo'tan yu'un smul

Yu'un jach-c'ayoj. Salmo yu'un David te c'alal c'oponot yu'un Natán te c'alal la sta smul soc Betsabé.

¹ Na'bon me yo'bolil jba, Dios cu'un, hich te bin ut'il yutsil awo'tan; hich te bin ut'il bayel yac ana' yo'bolil sbahic, tup'bon te c'axun-c'op cu'une.

² ¡Pocbon loq'uel spisil te bin chopol jpasoj, lecubtesawon yu'un te jmule!

³ Como ya jna' te c'axun-c'op cu'un, spisil ora ay ta jtojol te jmule.

⁴ Ha'at nax ta atojol te jtahoj jmul, ha'at nax atuquel, la jpas ta atojol te bin chopol, scuenta yu'un ya xna'ot te stojil bin yac awal, soc te stojil ya xchahpanwanat.

⁵ Chopolonix a c'alal ayinon, jmulawilon a c'alal hahchon ta sch'uht jnan.

⁶ Ha'at yac ac'an te bin melel ay ta o'tanil; ta yutil co'tan la awa'bon jna' p'ijil-o'tanil.

⁷ Pocawon ta hisopo, hich pocbil ya xc'ohon a; pocawon, yu'un c'ax hich sac ya xc'ohon a te bin ut'il me'sic.

⁸ Ac'a ca'iy tse'el-o'tanil soc yutsil-o'tanil; ac'a stse'ejinuc te jbaquel te tembil awu'une.

⁹ Nac'a asit awelaw ta stojol te jmul soc tup'bon spisil te bintic chopol jpasoje.

¹⁰ ¡Dios cu'un, pasbon ta sac te co'tane, ach'ubtesbon co'tan te stalel toj ay!

¹¹ Ma me xach'ojon loq'uel ta atojol, soc ma me xaloq'ues ta jtojol te ch'ul espíritu awu'une.

¹² A'bon yan buelta te yutsil co'tan yu'un te colel awu'une, soc a'bon slequil co'tan te tey ya quich' quip a.

¹³ Hich ya ca'be sna'ic a te jc'axun-c'opetic te behetic awu'un, hich ya xcha'suhtes xan yo'tanic ta atojol te jmulawiletique.

¹⁴ Coltayawon te manchuc ya ca'iy milaw, Dios cu'un, Diosat yu'un te jcolele; hich ya jc'ayojtaybe sc'oblal te stojil awa'tele.

¹⁵ Cajwal, jambon que, hich me ya jpucbe sc'oblal te yutsil ac'oblale.

¹⁶ Como ma xac'an milbil mahtanil, te yacuc ca'bate, ma xac'an scohtol chic'bil mahtaniletic.

¹⁷ Te mahtaniletic ya sc'an te Diose, ha te pich'il-o'tanile; ma ba yac ap'aj, Dios cu'un, te mach'a pich'il yo'tan soc te ya smel yo'tan yu'un te smule.

¹⁸ Ta scuenta yutsil sc'anojel awo'tan pasbeya bin lec ta stojol Sión; pasbeya te ts'ahquetic yu'un Jerusalén.

¹⁹ Hich me lec awo'tan yu'un te milbil mahtaniletic te stojil ayic, te chic'bil mahtaniletic soc te scohtol chic'bil mahtaniletic; hich me ya yich' aq'uel torohetic ta scajtajib amahtan.