Salmos 48 - Bible in Tzeltal Bachajón

T'ujbil soc ay yutsilal te Sión

C'ayoj; ha salmo yu'un te snich'nab Coré.

¹ Muc' te Jehová, soc ha snuhp' te ya yich' halbeyel yutsil sc'oblal ta muc'ul pueblo yu'un te Dios cu'untic, ta ch'ul wits yu'un.

² ¡Mero t'ujbil stoyolil, ha yutsil yo'tan swohlol bahlumilal te wits Sión, ta stojol norte, te muc'ul pueblo yu'un te Muc'ul Ajwalil!

³ Ta nahetic yu'un ajwalil Dios la yac' sba ta na'el te ha ahnibal stuquel.

⁴ Melel la stsob sbahic te ajwaliletic, junax bahtic.

⁵ C'alal la yilic te hich ay te muc'ul pueblo, xcham yo'tanic, ora ahnic bahel yu'un xiwel.

⁶ Tsacotic ta xiwel tey a, soc hich sc'uxul te bin ut'il ya x'ayin yal ants,

⁷ hich te bin ut'il c'alal jinotic te barcohetic yu'un Tarsis yu'un te ic' ya xtal ta banti ya xloc' tal c'ahc'al.

⁸ Hich te bin ut'il la jca'iytic, hich nix la jquiltic ta muc'ul pueblo yu'un Jehová te scuentahinej spisil, ta muc'ul pueblo yu'un te Dios cu'untique. ¡Dios me ya yac'te stalel ya xhil sbahtel q'uinal te muc'ul pueblohe! Selah

⁹ Te c'alal ayotcotic ta yohlil te Templo awu'un, Dios cu'untic, ya jna'cotic te sc'uxul awo'tane.

¹⁰ Dios cu'un, hich te bin ut'il te abihile, hich ya xc'oht te yutsil ac'oblal c'alal ta sti'il bahlumilal; te swa'el ac'ab nojel ta bintic stojil ta pasel.

¹¹ Tse'el yo'tan te wits yu'un Sión, tse'el yo'tanic te yantsil-nich'nab Judá ta scaj te chahpanel awu'une.

¹² Behenanic ta sjoyobal Sión, ahtaybeyahic te toyol bahlal ts'ahquetic yu'une;

¹³ ilbeyahic ta lec te sjoyob ts'ahcul, ilawilic te toyol nahetic yu'un, scuenta yu'un ya xhu' yac awalbeyic sc'oblal te patil ts'umbalil,

¹⁴ como te Dios ini ha Dios cu'untic sbahtel q'uinal; ha jtojobteswanej cu'untic sbahtel q'uinal.