Salmos 45 - Bible in Tzeltal Bachajón

Sc'ayojil nuhpunel yu'un ajwalil

Yu'un jach-c'ayoj; ta sc'ayojil Lilios. Ha Masquil yu'un te snich'nab Coré. C'ayoj yu'un cux-o'tanil.

¹ Nojel t'ujbil c'op ta co'tan; ya xc'ayojinon ta stojol te ajwalil; te cac' ha c'uc'um c'ohem yu'un te mach'a mero ya sna' ts'ihbajel.

² Ha'at c'ax hich at'ujbilal a te bin ut'il yantic winiquetic; c'ax t'ujbil c'opetic ya xloc' ta awe, yu'un Dios la ya'bat bendición sbahtel q'uinal.

³ Chuca ta ach'uht te espada awu'un, ha'at te ma xiwat, chuca aba soc awutsil soc muc' awutsilal.

⁴ Ta scuenta smuc'ul awutsilal behenan bahel ta tsalaw ta scanantayel te bin smelelil soc te bin stojil ay ta pasele. Te awa'el-c'ab ac'a pasuc bintic xiweltic sba ta ilel.

⁵ Te a'tejibaletic yu'un at'ihmalte' te ay yehic, te ya yaq'uic yahluc pueblohetic ta ye'tal awoc, ya me slowbeyic yo'tan te scontratac te ajwalile.

⁶ Te amuc'ul-huctajib, Dios cu'un, spisil ora soc sbahtel q'uinal ay; te bastón yu'un ban c'alal cuentahimbil awu'un, ha bastón yu'un te bin stojil ta pasele.

⁷ C'ux ta awo'tan te bin stojil ta pasel, soc yac awihlay te bin chopole; ha yu'un la stsahat Dios, ha te Dios awu'un, la smalat ta aceite yu'un yutsil q'uinal, c'ax hich tohy ac'oblal a te bin ut'il amohloltac.

⁸ Spisil te ac'u' apac' yich'ojic mirra, áloe soc canela; c'alal ta nahetic yu'un ajwaliletic te ch'albilic ta marfil ya ya'bat tse'el awo'tan ta scuenta instrumentohetic yu'un música te ay scuerdahil.

⁹ Ay yantsil-nich'nab ajwaliletic ta yohlil te antsetic te ich'bilic ta cuenta awu'un; ay ta awa'el te ajwalil-ants ch'albil ta oro yu'un Ofir.

¹⁰ A'iya awa'iy, cantsil-nich'an, ilawil, ts'ehana achiquin; ch'aya me ta awo'tan te pueblo awu'un soc te sna ame'atat.

¹¹ Te ajwalil ya smulambat at'ujbilal; nijana aba ta stojol como ha ajwalil awu'un.

¹² Te yantsil-nich'nab Tiro ya me yich'ic tal mahtaniletic, te jc'ulejaletic ta pueblo ya me sc'anic te lecuc sc'oblalic ta atojol.

¹³ C'ax t'ujbil te yantsil-nich'an ajwalil te ay ta sna, capal ta jalel soc oro te sc'u'e.

¹⁴ Ch'albil ta ts'isel te sc'u' slapoj a ya x'ic'ot bahel ta stojol te ajwalil; t'umbil bahel yu'un ach'ixetic te ha smohloltac, ya me yich'ic iq'uel tal ta atojol.

¹⁵ Soc tse'el yo'tanic soc yutsil q'uinal ya ya'iyic ya yich'ic iq'uel tal; ya x'ochic bahel ta sna te ajwalil.

¹⁶ Ha ya sjelolin ta ame'atat te anich'nabe, ya me awac'ticlan ta príncipaletic ta stojol spisil te q'uinale.

¹⁷ Ya cac' te ya sna'bat abihil spisil ta cajalcaj ts'umbalil, ha yu'un te nacionetic ya me yalbat yutsil ac'oblal spisil ora soc sbahtel q'uinal.