Salmos 41 - Bible in Tzeltal Bachajón

Sc'oponel Dios yu'un sc'anel slahmajtesel chamel

Yu'un jach-c'ayoj. Ha salmo yu'un David.

¹ Bayel me yutsil te mach'a ay ta yo'tan te pobre; ya xcoltayot yu'un Jehová ta yorahil wocol.

² Te Jehová ya scanantay, ya ya'be scuxlejal soc lec ya xc'oht ta q'uinal; ma ba ya x'ac'ot ta sc'ab te scontratac yu'un spasbeyel bin ya sc'an yo'tanic.

³ Te Jehová ya ya'be yip c'alal ay ta chamel, ya yac' lecubuc ta chamel ta swayib.

⁴ Hich caloj: Jehová, c'uxultayawon, lecubtesawon, como jtahoj jmul ta atojol, xchihon.

⁵ Ya sbohlc'optayonic te jcontratac, hich ya yalic: ¿Bin ora ya xcham soc ya xch'ay sbihil ta q'uinal? xchihic.

⁶ Teme ya xtal yilonique, ya yalic lot; ya stsob ta yo'tanic te bintic chopol, c'alal ya xloq'uic bahel ha ya spuquic ta halel.

⁷ Ya stsob sbahic, ya smuquen labanonic spisil te mach'atic ya sp'ajonic; ya scuyic te chopolon, hich ya yalic:

⁸ Tsacot ta chamel scuenta lajel; metselix ta swayib, ma ba ya xhahchix, xchihic.

⁹ Ha nix hich te mach'a c'ux ya ca'iy jba soc, te ha smuc'ul co'tan sc'oblal, te mach'a jun ya xwe'on soc, hahch scontrahinonix.

¹⁰ Pero ha'at Jehová, c'uxultayawon, hachawon yu'un ya ca'be spacol.

¹¹ Hich me ya jna' te lec awo'tan cu'un: ha te ma ba ya stse'layon te jcontrahe.

¹² La awa'bon quip yu'un te jun co'tan ayon, soc la awac'on ta atojol sbahtel q'uinal.

¹³ ¡Bayel yutsil te Jehová, te Dios yu'un Israel, ta spisil ora soc ta sbahtel q'uinal! Hichuc, hichuc.