Salmos 35 - Bible in Tzeltal Bachajón

Sc'anel coltayel yu'un scontratac

Salmo yu'un David.

¹ Jehová, tsaca ta c'op te mach'atic ya stsacon ta c'op; a'beya guerra te mach'atic ya ya'bonic guerra.

² Tsaca ta ac'ab amahquil soc te amuc'ul mahquil, hahchan, coltayawon.

³ Tsaca te lanza soc maca te mach'atic yac stembelonique; halbon te jch'uhlel: ¡Ho'on jcoltaywanejon awu'un! xchihan me.

⁴ Ac'a q'uexawuc soc howiyuc te mach'atic yac slehbelon jcuxlejal; ac'a suhtuc ta spatic soc q'uexlal te mach'atic ay bin chopol ya sc'an ya spasbonic.

⁵ Hich ac'a c'ohtuquic te bin ut'il suhlil trigo te ya xlichot bahel ta ic', ac'a yich'ic tenel bahel yu'un te ch'ul a'bat yu'un Jehová;

⁶ ac'a ihc'ubuc q'uinal soc ac'a bilubuc te be yu'unic, te ch'ul a'bat yu'un Jehová ac'a snuts bahel.

⁷ Como mayuc scuentahil te la snac'bonic jyacol, mayuc scuentahil la sjoc'bonic jch'enal.

⁸ ¡Ch'ayaluc me yo'tanic a ac'a c'ohtuc ta stojolic te jinele, soc ha'uc nix ya xtsacot ta syaquic te snac'ojique! ¡Tey nix ac'a yahluquic a!

⁹ Hich me tse'el co'tan ta stojol Jehová, soc tse'el co'tan yu'un te colel yu'une.

¹⁰ Ta spisil co'tan hich ya me cal: Jehová, ¿mach'a pajalat soc, te yac awac' ta libre te pobrehetic ta stojol te mach'atic c'ax hich ay yipic a, soc te yac awac' ta libre te pobrehetic soc te mach'atic mayuc bin ay yu'un ta stojol te mach'atic ya x'elc'anot yu'unic? xchihon.

¹¹ Ya stehc'an sbahic chopol testigohetic; ya sjoc'obonic te bintic ma jna'.

¹² Ya suhtesbonic ta bin ma lecuc te bin lec, yu'un ya ya'bonic jwocol.

¹³ Pero te ho'one, te c'alal tsacotic ta chamel, la jlap pac' yu'un mel-o'tan; la jcac' jwocol ta scomel jwe'el, suht ta jtojol te bin la jc'ambe Dios.

¹⁴ Soc mel-o'tan behenon hich te bin ut'il ta scuenta camigo o quermano, hich te bin ut'il ya smel yo'tan yu'un snan, la jpehc'an jba yu'un mel-o'tan.

¹⁵ Pero te c'alal yahlon, tse'el yo'tanic a la stsob sbahic; tal scontrahinonic mach'atic ma ba la jna'beyic sba. Ma ba la scom sbahic slabambelonic.

¹⁶ Hich te bin ut'il chopol jlabanwanejetic la sc'ux yehic yu'un scontrahimbelonic.

¹⁷ Cajwal, ¿jayeb to xan ora yac awil ini? Coltaybon loq'uel jch'uhlel ta jinel yu'unic, coltaybon te jcuxlejal ta stojol te chojetique.

¹⁸ Ya calbat wocol ta muc'ul tsoblej; ¡ya calbat yutsil ac'oblal ta stojol bayel ants-winiquetic!

¹⁹ Ma me stse'layonic te mach'atic tojol nax ya scontrahinonic; soc ma me xmuts'ilan sitic ta jtojol te mach'atic mayuc scuentahil ya sp'ajonique

²⁰ como ma ba ya xc'opojic ta lamal-o'tanil, ha ya schahpanic bin ut'il ya slo'loyic te mach'atic lamal yo'tanic ta q'uinal.

²¹ Muc' la sjam yehic yu'un scontrahimbelon, hich la yalic: La jquiltic ta jsitic, xchihic.

²² ¡Awilojix, Jehová, ma me xch'abat! ¡Ma me namaluc xawac' aba ta jtojol!

²³ ¡Wic'a asit, hahchan, pasbon te bin stojil! ¡Cajwal Dios cu'un, c'opojan cu'un!

²⁴ Chahpanawon ta scuenta stojil awo'tan, Jehová, Dios cu'un; ¡ma me stse'layonic!

²⁵ Ma me hichuc ya yalic ta yo'tanic: ¡C'ohtix ta pasel te bin la sc'an co'tantic! ma me xchihuquic; o te hich ya yalic: ¡Jc'axel la jlajintic! ma me xchihuquic.

²⁶ Ac'a yich'ic q'uexlaltesel soc howiytesel te mach'atic tse'el yo'tanic yu'un te jwocole; ac'a slapic q'uexlal soc howiytesel te mach'atic toyol yac'oj sbahic ta scontrahimbelonique.

²⁷ C'ayojinanic soc tse'eluc me yo'tanic te mach'atic hich yo'tanic te ya xchicnaj te mayuc jmul; hich ac'a yahluquic spisil ora: Ac'a yich' toybeyel sc'oblal te Jehová, te lec yo'tan yu'un te bin ut'il lec ay te ya'bate, ac'a xchihuquic.

²⁸ ¡Ya calbe sc'oblal te toj awa'tel, soc spisil c'ahc'al ya calbat yutsil ac'oblal!