Salmos 32 - Bible in Tzeltal Bachajón

Yutsil te perdón

Salmo yu'un David.

¹ Bayel me yutsil te mach'a pasbilix perdón yu'un sc'axuntayel mandar, te muculix te smule.

² Bayel me yutsil te mach'a ma ba ya x'a'bot scuch smul yu'un Jehová, soc te mayuc lo'loyel ta yo'tan.

³ C'alal ch'abon ta c'op, mamalub te jbaquel ta scaj te ahcan cu'un ta sjunal c'ahc'al.

⁴ Como c'ahc'al ahc'abal alub ac'ab ta jtojol; laj bahel quip hich te bin ut'il ta yorahil q'uixin q'uinal. Selah

⁵ La jcalbat ta jamal te jmule, ma ba la jmuc te bin chopol la jpas. Hich la jcal: Ya me cal ta jamal te jmul ta stojol Jehová, xchihon, hich la apasbon perdón yu'un te jmule. Selah

⁶ Ha yu'un ac'a sc'oponat spisil mach'atic ch'uhltesbilic te bin ora ya xhu' yac awich' tahele. Melel te c'alal ay bayel snojel ha'etic, ma ba ya xtahotic yu'un.

⁷ Ha'at ahnibalat cu'un; yac acanantayon ta jwocol soc yac ajoytayon ta c'ayojetic yu'un aq'uel ta libre. Selah

⁸ Ya ca'bat ana' soc ya ca'bat awil te be te banti ya sc'an ya xbehenat; ya cac' jsit ta atojol.

⁹ Ma me hichucat te bin ut'il cawu o macho, te mayuc sp'ijilic, te ya sc'an ya yich'ic comel yu'un ta schuhquil sjol soc freno, teme ma hichuc yac apas, ma ba ya xnohpojic tal ta atojol.

¹⁰ Ay bayel sc'uxul swocol te mach'a chopol; yan te mach'a smuc'ulinej yo'tan te Jehová, joytaybil ta c'uxul-o'tanil.

¹¹ Tse'eluc me awo'tanic soc ayuc me yutsil awo'tanic ta stojol Jehová, ha'ex te toj awo'tanique; ¡c'ayojinanic soc yutsil q'uinal apisilic te toj awo'tanique!