Salmos 30 - Bible in Tzeltal Bachajón

¹ Ya calbat yutsil ac'oblal, Jehová, como la atohyteson soc ma ba la awac' te ya stse'layon te jcontrataque.

² Jehová, Dios cu'un, la jcawtayat, hich la alecubteson ta chamel.

³ Jehová, la aloq'ueson tal ta stsobojibal mach'atic chamenic; la awa'bon jcuxlejal scuenta yu'un ma ba ya xcohon bahel ta muquenal.

⁴ ¡C'ayojtayahic Jehová, ha'ex te ch'ultesbilex yu'un; halbeyahic yutsil te sch'ul bihile!

⁵ Como c'axel nax ay te yilimba, yan te c'uxultayel yu'une ya xhalaj spisil cuxlejalil. Ta ahc'abal ay oq'uel, pero ta sab ya xtal yutsil q'uinal.

⁶ Te c'alal ayix bin ay cu'un, hich la jcal: Mayuquix bin ora ya xyuc'oton, xchihon.

⁷ Ha'at Jehová, te c'alal lec awo'tan ta jtojol la awa'bon quip hich te bin ut'il tulan wits; te c'alal la anac' asit awelaw, ma ba la jna' bin ya jpas.

⁸ Ya cawtayat, Jehová; ya calbe wocol ta stojol Cajwal.

⁹ ¿Bin ay ta tahel teme lajone, teme ya xcohon bahel ta muquenale? ¿Ya bal yalbat yutsil ac'oblal te ts'u'lum? ¿Ya bal yalbe sc'oblal te stalel jun awo'tan ta jtojolcotic?

¹⁰ A'iybon awa'iy jc'op, Jehová, c'uxultayawon; Jehová, ¡coltayawon!

¹¹ Te oq'uel cu'un la ajelbonix ta ahc'ot; la aloq'uesbonix te pac' yu'un mel-o'tan, la awa'bon jlap te tse'el-o'tanil.

¹² Ha yu'un ya jc'ayojtayat, ha'at cutsilalat, ma ba ya xch'abon. Jehová, Dios cu'un, ¡ya jc'ayojtaybat awutsilal sbahtel q'uinal!