Salmos 28 - Bible in Tzeltal BachajónSc'anel coltayel, soc yalel wocol yu'un suhtib Salmo yu'un David. 1 Ya cawtayat, Jehová. ¡Muc'ul tonat cu'un, ma me xamac achiquin ta jtojol; yu'un teme mayuc bin yac apas, pajal ya xc'ohon soc te mach'atic ya xcohic bahel ta muquenal! 2 A'iybon awa'iy caw te c'alal ya jc'ambat coltayel, te c'alal ya jtoy jc'ab ta stojol te ch'ul Templo awu'une. 3 Ma me pajaluc xatason bahel soc te mach'atic chopolic soc te mach'atic ya spasic mulil, te lamal q'uinal ya xc'opojic soc spat-xuhquic, pero ay bin chopol ay ta yo'tanic. 4 A'beya stojic hich te bin ut'il te ya'telic, hich te bin ut'il bintic chopol spasojique; a'beya stojic hich te bin ut'il te ya'tel te sc'abique. 5 Te bin ut'il ma ba la yich'ic ta cuenta te bintic spasoj te Jehová, te bintic spasticlanej ta sc'ab, ¡ha ya sjinticlan, ma ba ya scha'pasticlanix xan! 6 ¡Bayel yutsil te Jehová te la ya'iybon jc'op te bin la jc'ambe! 7 Ha quip soc jmahquil te Jehová; ha smuc'ulinej co'tan, hich la jquich' coltayel, ha yu'un te tse'el co'tan. Ya calbe wocol ta c'ayoj. 8 Te Jehová ha yip te pueblo yu'un, ha nac'ojibal te ya scoltay te mach'a tsahbil yu'une. 9 Coltaya te pueblo awu'un soc a'beya bendición te mach'atic awu'untayej; canantaya hich te bin ut'il jcanan-tuminchij soc peta ta ac'ab spisil ora. |
Biblia Tzeltal Bachajon © Sociedad Bíblica de México, A.C., 2006.
Bible Society of Mexico