Salmos 24 - Bible in Tzeltal BachajónTe Ajwalil te ay yutsilal Salmo yu'un David. 1 Ha yu'un Jehová te q'uinal soc spisil bintic ay tey a, te bahlumilal soc spisil mach'atic nahinemic tey a; 2 como ha la ya'be yich'o-ip ta sba te maretic, la scajan ta sba muc'ul-ha'etic. 3 ¿Mach'a ya xhu' ya xmo bahel ta wits yu'un Jehová? ¿Mach'a ya xhu' ya stehc'an sba ta ch'ul awilal yu'un? 4 Ha te mach'a pocbil sc'ab soc sac te yo'tane; ha te mach'a ma ba sch'uhunej lotil diosetic soc te mayuc bin yaloj ta jamal ta lot. 5 Ha ya yich' bendición yu'un Jehová soc stojil chahpanel yu'un Dios te Jcoltaywanej yu'une. 6 Hich ay te jcaj ts'umbalil te ya slehic te Jehová, ha te mach'atic ya slehbat asit awelaw, Diosat yu'un Jacob. Selah 7 ¡Hacha ajolic, puertahetic! ¡Hacha ajolic, antiguo puertahetic, yu'un ya x'och te Ajwalil te ay yutsilal! 8 ¿Mach'a a te Ajwalil te ay yutsilal? Ha te Jehová te ay yip soc te ay yu'el, ha te Jehová te ay yip ta guerra. 9 ¡Hacha ajolic, puertahetic! ¡Hacha ajolic, antiguo puertahetic, yu'un ya x'och te Ajwalil te ay yutsilal! 10 ¿Mach'a a te Ajwalil te ay yutsilal? ¡Ha te Jehová te scuentahinej spisil, ha me te Ajwalil te ay yutsilale! Selah |
Biblia Tzeltal Bachajon © Sociedad Bíblica de México, A.C., 2006.
Bible Society of Mexico