Salmos 22 - Bible in Tzeltal Bachajón

Aw yu'un wocol soc c'ayoj yu'un yalbeyel yutsilal

Yu'un jach-c'ayoj; ta Ajelet-sahar. Salmo yu'un David.

¹ Dios cu'un, Dios cu'un, ¿bin yu'un la apihteson? ¿bin yu'un te namal ayat yu'un yac acoltayon, soc te namal ayat yu'un te awetic cu'une?

² Dios cu'un, ya cawtayat ta c'ahc'alel, pero ma ba yac ajac'bon jc'op; soc ta ahc'abal mayuc cux-o'tan cu'un.

³ Pero ha'at Ch'ul Diosat, ha'at te nahinemat ta yohlil banti ay ta halel yutsil ac'oblal yu'un Israel.

⁴ Te jme'jtatcotic la smuc'ulinat yo'tanic; la smuc'ulinat yo'tanic, soc ha'at la acoltay.

⁵ La yawtayat, hich colic ta libre; la smuc'ulinat yo'tanic, ma ba la stahic q'uexlal yu'un.

⁶ Pero te ho'one mero yolon, ma winicucon, tse'laybilon yu'un yantic ants-winiquetic soc p'ajbilon yu'un te pueblo.

⁷ Spisil te mach'atic ya yilonic ya slabanonic; ya yixtalan yehic soc ya sjimulan sjolic, hich ya yalic:

⁸ Ha smuc'ulinej yo'tan te Jehová, ha ac'a coltayec yu'un; ha ac'a scoltay, como ha lec ta o'tanil yu'un, xchihic.

⁹ Pero ha'at te mach'a la aloq'ueson ta yawil alal; la awac' smuc'ulinat co'tan c'alal ya to schu'unteson a te jnane.

¹⁰ Te c'alal ma to x'ayinon a, ac'oton ta atojol; te c'alal ayon to ta sch'uht jnan a, ha'at Diosat cu'un a.

¹¹ Ma me namaluc xawac' aba ta jtojol, yu'un nopolix ta jtojol te wocole, mayuc mach'a ya scoltayon.

¹² Bayel torohetic sjoytayejonic; nohpojic tal ta jtojol torohetic yu'un Basán te ay bayel yipic.

¹³ Ya shaw yehic ta jtojol hich te bin ut'il choj te ya xti'awan soc te ya x'awone.

¹⁴ Malbilonix hich te bin ut'il ha', pitc'ujemiquix spisil te jbaquele. Te co'tan hich c'ohem te bin ut'il chabec', yac ta uhlel ta yutil te jbaq'uetale.

¹⁵ Taquij quip hich te bin ut'il xeht'elul oxom, soc la slap' sba cac' ta jpa'jaj. ¡La awac'on ta ts'u'lum yu'un lajel!

¹⁶ Sjoytayejon ts'i'etic; la sjoytayonic jtsohb mach'atic chopol yo'tanic; la shotbonic coc jc'ab.

¹⁷ Ya xhu' ya cahtay spisil te jbaquele; ya yilonic, ya stse'layonic.

¹⁸ La spuc sbahic a te jc'u' jpac', la spasic seña ta na'el ta scuenta te jc'u'e.

¹⁹ Pero ha'at, Jehová, ¡ma me namaluc xawac' aba! Ha'at quipat, ¡suja aba yu'un yac acoltayon!

²⁰ Coltaybon ta lajel ta espada te jcuxlejal, coltaybon loq'uel jcuxlejal ta yip te ts'i'e.

²¹ Coltayawon ta ye choj, coltayawon ta xulubic te ha'mal torohetique.

²² Ya me calbat abihil ta stojol te quermanotac, ya calbat yutsil ac'oblal ta yohlilic.

²³ Ha'ex te yac awich'ic ta muc' te Jehová, ¡halbeyahic yutsil sc'oblal! ¡C'ayojtaybeya yutsil sc'oblal apisilic te sts'umbalex Jacob! ¡Xi'ahic me apisilic te sts'umbalex Israel!

²⁴ como ma ba la sp'aj soc ma ba la yihlaybe swocol te mach'a ay swocol; ma ba la snac' sba ta stojol, ha la ya'iy te c'alal awtayot yu'une.

²⁵ Ya xtal ta atojol te bin ya calbe yutsil sc'oblal yu'un ta yohlil te muc'ul tsoblej; te bin jchapoj ya cac' c'ohtuc ta pasel ta stojol te mach'atic ya yich'at ta muc'.

²⁶ Ya me xwe'ic te pobrehetic soc ya me xnoj sch'uhtic; ya me yalbeyic yutsil sc'oblal Jehová te mach'atic ya slehic; cuxul ya xhil awo'tanic sbahtel q'uinal.

²⁷ Ya me sna'ic soc ya me suhtic tal ta stojol Jehová spisil mach'atic ayic ta sti'il bahlumilal, soc spisil ta chahp nahetic yu'un te nacionetic ya me squejan sbahic ta atojol,

²⁸ como ha yu'un Jehová te ya xcuentahinwan, ha ya spas ta mandar spisil te nacionetique.

²⁹ Ya me xwe'ic soc ya me sch'uhuntayic spisil mach'atic ay yipic ta bahlumilal; ya me squejan sbahic ta stojol spisil mach'atic ya xcohic bahel ta ts'u'lum, ha te mach'atic ma xhu' yu'unic scanantayel scuxlejalic.

³⁰ Te mach'atic patil ya xtalic ya me yac' sbahic ta a'batinel yu'un; ya xhalbot sc'oblal Jehová c'alal ta slajibal ts'umbalil.

³¹ Ya me xtal yalbeyic sc'oblal te stojil ya'tele; ya me xhalbotic te ants-winiquetic ma to x'ayinic te ha spasoj te Jehová ini.