Salmos 21 - Bible in Tzeltal Bachajón

C'ayoj yu'un col ta libre yu'un scontra

Yu'un jach-c'ayoj. Salmo yu'un David.

¹ Jehová, tse'el yo'tan te ajwalil yu'un te awu'ele, ¡mero tse'el yo'tan yu'un te colel awu'une!

² La awa'be te bintic la sc'an yo'tan, ma ba la amuc ta awo'tan te bintic la sc'ambate. Selah

³ Yu'un loc'at ta stahel soc lequil bendicionetic, soc la awa'be scoronahin lequil oro.

⁴ La sc'ambat scuxlejal, hich la awa'be, ha naht scuxlejal te sbahtel q'uinal ay.

⁵ Mero muc' yutsilal yu'un te tsalaw awu'un; la awa'be yich'el ta muc' soc smuc'ul yutsilal.

⁶ Awa'beyej bendición sbahtel q'uinal; buen tse'el yo'tan te bin ut'il ajoquinej.

⁷ Te ajwalil ha smuc'ulinej yo'tan te Jehová, soc ta scuenta sc'uxul yo'tan te Mach'a toyol ay, ma ba ya syuc' sba.

⁸ Yac ata ta ac'ab spisil te acontratac; te awa'el-c'ab ya me sta te mach'atic ya yil-o'tantayat.

⁹ Yac awac' te hich ya xc'ohtic te bin ut'il horno te ay sc'ahc'al ta yorahil awilimba; te Jehová ya me slajinlan ta yilimba, soc ya me xlajinotic ta c'ahc'.

¹⁰ Yac atup'be yal-snich'nab ta q'uinal, te sts'umbalic ta yohlil te ants-winiquetique.

¹¹ Aunque ya snopic te ya scontrahinat soc ya schapic te bintic chopol, ma ba ya xtsalawanic,

¹² como ha'at yac awac' ahnuquic loq'uel ta atojol; yac atojlimbe bahel sit yelawic ta ya'tejibalul at'ihmalte'.

¹³ ¡Ac'a tohyuc ac'oblal, Jehová, ta scuenta awu'el! ¡Ya me jc'ayojtaybecotic soc ya me calbecotic yutsil sc'oblal te awu'ele!