Salmos 20 - Bible in Tzeltal Bachajón

Sc'oponel Dios yu'un sc'anel tsalaw

Yu'un jach-c'ayoj. Salmo yu'un David.

¹ Ac'a ya'iybat ac'op te Jehová ta yorahil awocol; ac'a scoltayat te sbihil te Dios yu'un Jacob.

² Ac'a sticombat coltayel c'alal ta ch'ul awilal, c'alal ta Sión ac'a ya'bat coltayel.

³ Ac'a sna'bat spisil te mahtaniletic awu'un, ac'a stsacbat te scohtol chic'bil mahtanil awu'un. Selah

⁴ Ac'a ya'bat te bin ya sc'an awo'tan soc ac'a sc'ohtes ta pasel spisil bintic chapal awu'un.

⁵ Tse'el co'tancotic ya jc'ayojtaycotic te tsalaw awu'une, ya jtoycotic bandera ta scuenta sbihil te Dios cu'untique. Te Jehová ac'a c'ohtuc ta pasel yu'un spisil te bintic yac ac'ambele.

⁶ Yo'tic la jna'ix te Jehová ya scoltay te mach'a tsahbil yu'une; ya ya'iybe sc'op c'alal ta ch'ulchan ta scuenta te yip swa'el-c'ab te ya xcoltaywan.

⁷ Ay mach'atic te ha smuc'ulinej yo'tanic carretahetic, ay yantic te ha smuc'ulinej yo'tanic cawuhetic; yan te ho'otic, ha smuc'ulinej co'tantic te sbihil Jehová te Dios cu'untique.

⁸ Ha'ic ya yich'ic tsalel soc ya xyahlic, yan te ho'otic ya xhahchotic soc tulan ya jtehc'an jbahtic.

⁹ Jehová, coltaya te ajwalil; tsaca jc'opcotic te c'alal ya jc'oponatcotique.