Salmos 2 - Bible in Tzeltal Bachajón

Ya x'och ta ajwalil mach'a tsahbil yu'un Jehová

¹ ¿Bin yu'un ya xhahch schapic contrahinwanej te nacionetic, soc te tojol bin ya snopic te pueblohetique?

² Ya xhahchic te ajwaliletic ta q'uinal, soc te príncipaletic junax ya yac' sbahic ta schapel scontrahinel te Jehová soc te mach'a tsahbil yu'une.

³ Hich ya yalic: Ac'a jtuch'betic te cadena yu'unic, ya jch'ojtic loq'uel ta jtojoltic te bin schucojotic a, xchihic.

⁴ Te Mach'a nahinem ta ch'ulchan ya stse'lay; te Cajwaltic ya xlabanot yu'un.

⁵ Ya me yuticlan soc yilimba, ya me xiwteslan ta yilimba, hich ya yal:

⁶ Ho'on la jcotses te ajwalil cu'un ta Sión, te ch'ul wits cu'un, xchi.

⁷ Ya jpuc ta halel te bin yaloj ta mandar te Jehová: hich la yalbon: Ha'at jnich'anat; nax to nax ayinat cu'un.

⁸ C'ambon, hich ya ca'bat awu'untay te nacionetic, awu'un ya xc'oht c'alal ta sti'il te bahlumilale.

⁹ Yac apehc'anlan ta scuenta abastón-taq'uin, yac awuyticlan hich te bin ut'il pac'bil oxom, xchi.

¹⁰ Ha yu'un, ajwalilex, p'ijanic me; ich'ahic ta cuenta te tsitsel, jcuentahinwanejex ta q'uinal.

¹¹ Socuc xiwel ac'a abahic ta a'batinel yu'un Jehová, tse'eluquex me ta stojol soc nihcuc me awo'tanic.

¹² Ich'ahic ta muc' te Nich'anil scuenta yu'un ma ba ya x'ilin, te hich ya xlajex ta be yu'un; como ora nax ya xtihl yilimba. ¡Bayel me yutsil spisil te mach'atic ha smuc'ulinej yo'tanic te Diose!