Salmos 19 - Bible in Tzeltal Bachajón

Te ya'tel Dios soc te sc'ope

Yu'un jach-c'ayoj. Salmo yu'un David.

¹ Te ch'ulchan ya yalbe sc'oblal te yutsilal te Diose, te sjamalil ch'ulchan ya yalbe sc'oblal te ya'tel te sc'abe.

² Jujun c'ahc'al ya yalbe sbahic sc'oblal, jujun ahc'abal ya yalbe sbahic p'ijil-c'op.

³ Mayuc c'op, mayuc bin ya yalic, ma chicanuc te sc'opique;

⁴ pero ya xpuhc bahel ta spahmal bahlumilal te sc'opique, c'alal sti'il bahlumilal te bin ya yalique. Ta ch'ulchan la ya'be snahilpac' te c'ahc'ale,

⁵ hich ay te bin ut'il mach'a nuhpunel to te ya xloc' tal ta stsalul ta ban ay swayib, hich te bin ut'il winic te ay yip te tse'el yo'tan yu'un ahnimal.

⁶ Ta jehch sti'il ch'ulchan ya xloc' tal, ya xbehen bahel c'alal ta yan jehch; mayuc bin ya snac' sba yu'un te sq'uixinale.

⁷ Mero lec te ley yu'un Jehová, ya x'ach'ub cuxlejalil yu'un. Te testigo-c'op yu'un Jehová ha smelelil: ya ya'be sp'ijil te mach'a mayuc bin ya sna'.

⁸ Te mandariletic yu'un Jehová toj ayic stuquel, ya yac' tse'ejinuc o'tanil. Te smandar Jehová mayuc bin capal soc: ya yac' sacubuc q'uinal ta sit.

⁹ Te yich'el ta muc' te Jehová, mero lec, stalel ay sbahtel q'uinal; te chahpaneletic yu'un Jehová mero smelelil: spisil toj ayic.

¹⁰ C'ax hich mulambil a te bin ut'il oro, c'ax hich a te bin ut'il bayel lequil oro; c'ax hich schi'il a te bin ut'il chab, ha te chab te ya x'oquin loq'uel ta schabec'al.

¹¹ Ha ya yich' tsitsel a te a'bat awu'une; ay muc' bin ya sta yu'un te ya yich' canantayel.

¹² ¿Mach'a ya xhu' sna'el te banti howiyem? Pasbon perdón yu'un te muquen faltahetic cu'une.

¹³ Soc canantaya te a'bat awu'un te manchuc ya stoy sba ta spasel mulil, te manchuc ya ya'batinon. Hich jun ay a te co'tane, soc ma ba ya jta muc'ul mulil a.

¹⁴ Lecuc me yac awa'iy te c'opetic ya xloc' ta que soc te bintic ya jnopilan ta co'tan, Jehová, muc'ul tonat soc jcoltaywanejat cu'un.