Salmos 18 - Bible in Tzeltal Bachajón

¹ C'uxat ta co'tan, Jehová, yipat co'tan.

² Te Jehová ha muc'ul ton cu'un soc ahnibal cu'un, ha j'ac'aw ta libre cu'un; ha Dios cu'un, ha toyol ch'entiquil cu'un te banti ya jnac' jba; ha jmahquil soc yip te colel cu'un, ha toyol ahnibal cu'un.

³ Ya jc'opon te Jehová, te ha ya sc'an halbeyel yutsil sc'oblal, hich ya xcolon ta sc'ab te jcontratac.

⁴ La sbech'on la jca'iy te lazohetic yu'un lajel; la xiwteson te yip ha' te ya xlajinwan.

⁵ La sbech'on la jca'iy te lazohetic yu'un te muquenal; la slim sbahic ta jtojol te yaquiletic yu'un te lajele.

⁶ Ayon ta wocol a te la jc'opon te Jehová, awon ta stojol te Dios cu'une. La ya'iybon jc'op c'alal ta Templo yu'un, c'oht ta schiquin te cawe.

⁷ La syuc' sba soc nihc te q'uinale, la syuc' sbahic te yich'o-ip te witsiltic; nihquic ta scaj te ilin te Jehová.

⁸ Loc' ch'ahil ta sni' soc loc' jlajinwanej c'ahc' ta ye, loc' ac'al te stsacoj c'ahc'.

⁹ La sjam te ch'ulchan soc co tal, ay pimil tocaletic ta ye'tal yoc.

¹⁰ Mo ta querubín, wihl bahel; wihl bahel ta xic' te iq'ue.

¹¹ La spots sba ta yihc'al q'uinal, ha smahquil c'oht ta sjoyobal; ha te yihc'al tocal ta ch'ulchan te nojel ta ha'.

¹² Ta stojol te sts'anabul loc' talel tocaletic, batetic soc ac'aletic te stsacojic c'ahc'.

¹³ La st'ohmtes chahwuc ta ch'ulchan te Jehová; chicnaj sc'op te Mach'a toyol ay; ay batetic soc ac'aletic te stsacojic c'ahc'.

¹⁴ La st'im bahel te ya'tejibalul st'ihmalte', la spucticlan bahel te jcontratac; la syalbay bahel tsantsehwaletic, la slajinlan.

¹⁵ Chicnaj te sc'ubulil mar, chican ta ilel te yich'o-ip te bahlumilal ta scuenta te tulan tsitsel awu'un, Jehová, ta scuenta te yic'al ani'.

¹⁶ Ha la yac' tal sc'ab ta toyol, la stsacon, la sloq'ueson ta banti bayel ha'etic.

¹⁷ La scoltayon loq'uel ta sc'ab te jcontra te ay yip soc ta stojol te mach'atic ya sp'ajonic, te tulanic xan a te bin ut'il te ho'one.

¹⁸ Tal stahonic ta yorahil ay jwocol, pero la scoltayon te Jehová.

¹⁹ La yic'on bahel ta banti jamal q'uinal; la yac'on ta libre, como lec yo'tan cu'un.

²⁰ Te Jehová la ya'bon jmahtan ha chican bin yilel stojil ca'tel; la ya'bon stojol jc'ab ha chican bin yilel te slequil ya'tel te jc'abe,

²¹ como jt'unoj te be yu'un Jehová, ma ba yan banti bohon ta stojol te Dios cu'un ta scuenta spasel bin chopol.

²² Ay ta jtojol spisil te mandariletic yu'un, ma ba la jquihquitay te chahpambil mandariletic yu'une.

²³ Toj ayon ta stojol, jcanantayej jba te ma ba ya jta jmul.

²⁴ Ha yu'un la ya'bon stojol jc'ab te Jehová ha chican bin yilel stojil ca'tel, ha chican bin yilel te slequil ya'tel jc'ab ta stojol.

²⁵ Te mach'a ay sc'uxul yo'tan yac awa'be yil te sc'uxul awo'tane, te mach'a toj yo'tan, toj yac awac' aba ta stojol;

²⁶ lec yac awac' aba ta ilel ta stojol te mach'a lec yo'tan, pero tulan yac awac' aba ta stojol te mach'a chopole.

²⁷ Como ha'at yac acoltay te mach'atic peq'uelic, soc yac apehc'an te mach'atic stoyoj sbahique.

²⁸ Ha'at yac awac' tihluc te c'ahc' cu'un; te Jehová te Dios cu'un ya sacubtesbon te yihc'al q'uinal cu'une.

²⁹ Ta acuenta ya jtsalticlan soldadohetic, ta scuenta te Dios cu'un ya ca'be guerra pueblohetic te ay sts'ahcule.

³⁰ Te Diose c'ax lec te be yu'une, mayuc bin capal a te sc'op te Jehová; ha mahquilal yu'un spisil mach'atic ha smuc'ulinej yo'tanic.

³¹ ¿Ay bal yan Dios a te bin ut'il te Jehová? ¿Ay bal yan muc'ul ton a te bin ut'il te Dios cu'untique?

³² Ha te Dios te ya ya'bon quip, soc te ya yac' te lec ya xc'oht te be cu'une;

³³ te ya yac' te hich ya xc'oht te coc te bin ut'il yoc ha'mal chij, te ya stehc'anon ta toyol q'uinal;

³⁴ te ya sp'ijubtesbon jc'ab yu'un yaq'uel guerra, yu'un ya xhu' yu'un te jc'ab snitel te t'ihmalte' pasbil ta bronce.

³⁵ Soc la awa'bon te mahquilal yu'un te colel awu'une; scuentahinejon te awa'el-c'ab, soc te yutsil awo'tan la smuc'ubtesbon jc'oblal.

³⁶ La awac' te buen jamal te be cu'un, mayuc banti bilts'uj te coque.

³⁷ La jnuts bahel te jcontratac, la jtahticlan, ma ba suhton ha to c'alal la jlajinlan.

³⁸ La jquehchentes, hich ma ba hahchiquix; yahlic ta ye'tal coc,

³⁹ yu'un la awa'bon quip ta guerra; la awac' snijan sbahic ta jtojol te jcontrataque.

⁴⁰ La awac' te ya suht ta spatic, hich la jlajinlan te mach'atic la yil-o'tantayonique.

⁴¹ Awonic, pero mayuc mach'a coltayotic yu'un; la yawtayic te Jehová, pero ma ba a'iybot sc'opic yu'un.

⁴² La juch' hich te bin ut'il ts'u'lum te ya xbaht ta ic'; la jch'ay bahel hich te bin ut'il ahch'al ta calle.

⁴³ La awac'on ta libre yu'un te tsaltamba c'op yu'un te pueblo; la awac'on ta jolal yu'un te nacionetic; la yac' sbahic ta a'batinel cu'un te ants-winiquetic te ma ba la jna'be sba.

⁴⁴ Te c'alal la ya'iybonic jc'op, la sch'uhunic spasel; te jyanlumetic soc xiwel la yich'onic ta muc'.

⁴⁵ Laj yip yo'tanic te jyanlumetic, yacalic ta nihquel a loq'uic tal ta yahnibic.

⁴⁶ ¡Cuxul te Jehová, bayel me yutsil te muc'ul ton cu'une! Ac'a yich' tohytesbeyel sc'oblal te Dios te Jcoltaywanej cu'une,

⁴⁷ ha te Dios te ya sutbe spacol ta jcuenta soc te ya yac' ya yich'onic ta muc' te pueblohetique;

⁴⁸ ha te ya scoltayon loq'uel ta sc'ab te jcontratac soc ya stoybon jc'oblal ta stojol te mach'atic ya scontrahinonic. La acoltayon ta sc'ab te j'uts'inwanej.

⁴⁹ Ha yu'un ya calbat yutsil ac'oblal ta stojol te nacionetic, Jehová, ya jc'ayojtaybat te abihile.

⁵⁰ Ha ya ya'be muc' tsalaw te ajwalil yu'un, soc ya sc'uxultay te mach'a tsahbil yu'un, ha te David soc te sts'umbal ta sbahtel q'uinal.