Salmos 143 - Bible in Tzeltal Bachajón

Sc'anel aq'uel ta libre soc tojobtesel

Ha salmo yu'un David.

¹ Jehová, a'iybon awa'iy jc'op, a'iya te bin ya calbat wocol yu'un. ¡Jac'bon jc'op te bin ut'il stalel jun awo'tan soc toj awo'tan!

² Ma me xawic' tal ta chahpanel te a'bat awu'un, como mayuc jtuhluc te toj ta atojol.

³ Ya snutson te jcontra, ya stenon ta lum; ya yac'on ta nahinel ta yihc' q'uinal hich te bin ut'il mach'atic chamenic.

⁴ Ya xlaj quip ya ca'iy; ma ba ya snihquix sba ya ca'iy te co'tane.

⁵ Ya jna' te c'ahc'aletic ta namey, ya jna'ulan spisil te bintic apasoj, ya jnopilan spisil te ya'tel ac'ab.

⁶ Ya jach jc'ab ta atojol, ay taquin ti'il ya ya'iy te jch'uhlel ta sc'anelat hich te bin ut'il taquin lumq'uinal. Selah

⁷ Jac'bon jc'op ta ora, Jehová, yaquix ta lajel quip. Ma me xanac' asit awelaw ta jtojol, manchuc hich ya xc'ohon te bin ut'il mach'atic cohic bahel ta muquenal.

⁸ A'bon ca'iy ta sahb te sc'uxul awo'tan, como ha'at smuc'ulinejat co'tan. A'bon jna' te be te banti ya sc'an ya xbehenon, yu'un ya jtoy mohel jch'uhlel ta atojol.

⁹ Ac'awon ta libre yu'un te jcontratac, Jehová, ya jnac' jba ta atojol.

¹⁰ Nohptesawon ta spasel te sc'anojel awo'tan, como ha'at Diosat cu'un. Te lequil espíritu awu'un ac'a stojobteson bahel ta toj be.

¹¹ Ta scuenta abihil, Jehová, ac'a cuxajucon; ta scuenta te ha toj awo'tan loq'uesbon jch'uhlel ta wocol.

¹² Ta scuenta sc'uxul awo'tan lajimbon te jcontratac, lajina spisil te jcontratac, como ho'on awa'baton.