Salmos 142 - Bible in Tzeltal Bachajón

Sc'anel coltayel ta yohlil tsajel

Ha masquil yu'un David. Te la yal ta sc'oponel Dios c'alal ay ta ch'en.

¹ Ya cawtay te Jehová; ya jc'opon ta aw te Jehová ta sc'anel c'uxultayel.

² Ya cal ta stojol te bin yacon ta partehijel yu'un, ya ca'be sna' te jwocole.

³ Te c'alal mayuquix yip co'tan a, ha'at la ana' te be cu'une. Ta banti behenon la snac'bon jyacol.

⁴ Tsahtaya awil ta swa'el jc'ab, mayuc mach'a ya sc'an ya sna' bin ut'il ayon. Mayuc banti ya xhu' ya jnac' jba, mayuc mach'a ya scanantaybon jcuxlejal.

⁵ Ya cawtayat, Jehová; hich ya cal: Ha'at ahnibalat cu'un soc te bin ay cu'un ta yohlil te mach'atic cuxulic, xchihon.

⁶ A'iybon awa'iy caw, yu'un ay bayel jwocol. Ac'awon ta libre yu'un te mach'atic ya snutsonic, yu'un c'ax hich ay yipic a te bin ut'il te ho'one.

⁷ Loq'uesawon ta chuquel scuenta yu'un ya calbe yutsil sc'oblal abihil. Hich me ya sjoytayonic te mach'atic toj yo'tanic ta scaj te lec bin yac apasbon.