Salmos 14 - Bible in Tzeltal Bachajón

Sonsohil soc sbohlil ants-winiquetic

Yu'un jach-c'ayoj. Ha salmo yu'un David.

¹ Ya yal ta yo'tan te sonso: Mayuc Dios, xchi. Bohlobenic, ilobtic sba te ya'telic, mayuc mach'a ya spas te bin leque.

² Te Jehová ya yil c'alal ta ch'ulchan te ants-winiquetic, yu'un ya yil teme ay mach'a ya sna' q'uinal te ya sle te Diose.

³ Spisil howijemic, pajal bohlobenic; mayuc mach'a ya spas te bin lec, mayuc ni jtuhluc.

⁴ ¿Ma bal yacuc sna'ic stsahtayel spisil te mach'atic chopol bin ya spasic, te hich ya slajimbonic te pueblo cu'un te bin ut'il ya swe'ic pan, soc te ma ba ya sc'oponic te Jehová?

⁵ Ya me xnihquic yu'un xiwel, como joquimbilic yu'un Dios te mach'atic toj yo'tanique.

⁶ Ya slabanic te bin schapojic te pobrehetic, pero ha ahnibal yu'unic te Jehová.

⁷ ¡Ayuc bin ut'il ya xloc' tal ta Sión te colel yu'un Israel! Te c'alal Jehová ya yac' suhtuc tal te pueblo chucule, ay me stse'elil yo'tan te Jacob soc ay me yutsil yo'tan te Israel.