Salmos 132 - Bible in Tzeltal Bachajón

¹ Jehová, na'a me te David soc spisil te swocole.

² Hich la yal ta jamal ta stojol Jehová, hich yaloj ta stojol te Mach'a yu'un Jacob te ay yu'el:

³ Ma ba ya x'ochon ta jna, ma ba ya jmehtsan jba ta jwayib;

⁴ ma ba ya cac' ya smuts' sba jsit, ma ba ya smuts' sba ta wayel,

⁵ ha to c'alal ya jta jun lugar yu'un Jehová, te banti ya xnahin te Mach'a yu'un Jacob te ay yu'el, te xchihe.

⁶ Ta Efrata la jca'iytic, la jtahtic ta ha'maltic ta Jaar.

⁷ ¡Ochucotic bahel ta banti nahinem te Jehová! ¡Ac'a jquejan jbahtic ta stojol te scajtajib yoque!

⁸ Hahchan, Jehová, la' ta banti yac acux awo'tan, ha'at soc te scaxahul te chapbil-c'op yu'un awu'el.

⁹ Te sacerdotehetic awu'un ac'a sc'u'inic te bin stojil ta pasel, soc ac'a awonicuc ta scuenta yutsil yo'tanic te mach'atic toj yo'tanic.

¹⁰ Ta scuenta sc'uxul awo'tan ta stojol David ma me xawalac'patiy te mach'a tsahbil awu'une.

¹¹ Te Jehová la yal ta jamal ta stojol David, jc'axel yaloj, ma ba ya sut sc'op:

¹² Te patil al-nich'anetic awu'un teme ya sch'uhunic spasel te chapbil-c'op cu'un soc te testigo-c'op te ya cac'ticlambe snopic, ha nix hich te snich'nabic ya me shuhcan sbahic ta ahuctajib sbahtel q'uinal, xchi.

¹³ Como te Jehová ha stsahoj te Sión; ha la sc'an scuenta tey ya xnahin a.

¹⁴ Hich la yal: Ha ini te banti spisil ora ya jcux co'tan; li' ya xnahinon, yu'un hich sc'anoj co'tan.

¹⁵ Ya ca'be bayel bendición te bintic ay yu'un; ya cac' te ya xnoj sch'uhtic ta pan te pobrehetic yu'un.

¹⁶ Te sacerdotehetic yu'un ya ca'be sc'u'inic te colele, soc te mach'atic yu'un te ch'ultesbilic ya me xc'ayojinic soc yutsil yo'tanic.

¹⁷ Tey ya cac' puhlinuc a te yip David; la jchahpambe tsumbil c'ahc' te mach'a tsahbil cu'un.

¹⁸ Te scontratac ya ca'be sc'u'inic q'uexlal, yan stuquel xlipet te scorona, xchi.