Salmos 122 - Bible in Tzeltal Bachajón

Sc'anel lamal q'uinal ta Jerusalén

C'ayoj yu'un mohel bahel ta Jerusalén; yu'un David.

¹ Tse'el co'tan yu'un te mach'atic hich la yalbonic: Conic ta sna te Jehová, te xchihique.

² Ochotiquix bahel ta ochibaletic awu'un, Jerusalén.

³ Jerusalén, te pasbil scuenta yu'un tey ya stsob sbahic a te pueblohe.

⁴ Tey ya xmohic bahel a te chahpalchahp yu'un Jehová, yu'un yalbeyel yutsil sbihil te Jehová, hich te bin ut'il te mandar a'bot te Israel.

⁵ Tey ayic a te huctajibaletic yu'un schahpanel c'opetic, ha te huctajibaletic yu'un te sna David.

⁶ C'opombeya Dios te ayuc lamal q'uinal ta Jerusalén; ¡te yacuc xp'ohl bintic ay yu'un te mach'atic c'uxat ta yo'tan!

⁷ ¡Lamaluc me q'uinal ta yutil te ts'ahc awu'un, soc junuc me yo'tanic ta yutil te toyol ts'ahquetic awu'une!

⁸ Ta scuenta te quermanotac soc te mach'atic jmohlol jba soc hich me ya cal: ¡Lamaluc me q'uinal ta atojol! xchihon.

⁹ Ta scaj te sna Jehová te Dios cu'untic, ya me jle te bin lec ya xc'ohat yu'un. C'ayoj yu'un mohel bahel ta Jerusalén.