Salmos 12 - Bible in Tzeltal Bachajón

Sc'anel coltayel ta stojol mach'atic chopolic

Yu'un jach-c'ayoj; ta scuenta Seminit. Ha salmo yu'un David.

¹ Coltaya, Jehová, como mayuquix mach'atic lec yo'tanic ta atojol; ch'ayemiquix bahel ta yohlil te ants-winiquetic te mach'atic jun yo'tanique.

² Jujutuhl ya slotiy sbahic soc spat-xuhquic, ya xbahbac'optaywanic soc cheb yo'tanic.

³ Te Jehová ac'a slajin spisil te mach'atic ya xbahbac'opojic soc te ya yalic toyba-c'op;

⁴ te mach'atic hich ya yalic: Ya me ca'iytic tsalaw ta scuenta jc'optic, ha cu'untic te quetic, ¿mach'a ajwalil cu'untic? te xchihique.

⁵ Ya yal te Jehová: Ta scaj te uts'inel yu'un te pobrehetic soc te ahcan yu'un te mach'atic mayuc bin ay yu'unic, ya xhahchonix, ya jcoltay te mach'atic sc'anojic coltayel, xchi.

⁶ Te bintic yaloj ya spas te Jehová, mayuc bin capal tey a, hich ayic te bin ut'il plata te lecubtesbil ta horno pasbil ta lum, te huqueb buelta yich'oj lecubtesel.

⁷ Ha'at, Jehová, yac acanantayotcotic; ya me acoltayotcotic spisil ora ta sc'abic te jcaj ts'umbalil ini.

⁸ Te mach'atic chopolic bayuc ya xbehenic, te c'alal ya xtohybot sc'oblal te bin chopol ta yohlil te ants-winiquetique.