Salmos 119 - Bible in Tzeltal BachajónAlef Yutsil sc'oblal smandar Dios Alef 1 Bayel me yutsil te mach'atic toj ya xbehenic, te st'unojic te ley yu'un Jehová. 2 Bayel me yutsil te mach'atic ya sch'uhunic spasel te testigo-c'op yu'un soc te spisil yo'tanic ya slehic; 3 mayuc bin chopol ya spasic, ya st'unic te behetic yu'une. 4 Ha'at awaloj te ts'acal ya me yich' ch'uhunel te mandariletic awu'une. 5 Co'tanuc te jun co'tan ya jch'uhun spasel te mandariletic awu'une. 6 Hich ma ba ya jta q'uexlal te c'alal ya jna'ulan spisil te mandariletic awu'une. 7 Soc toj co'tan ya calbat yutsil ac'oblal te c'alal ya jnop te bintic toj chahpambil awu'une. 8 ¡Ya me jpas te halbil mandariletic awu'un! ¡Ma me jc'axeluc xapihteson! Bet Bet 9 ¿Bin ut'il lec ya xc'oht te sbe te quereme? Ha te ya spas te bin ya yal te ac'ope. 10 Ta spisil co'tan ya jlehat; ma xawac' te ya xhowiyon ta stojol te mandariletic awu'une. 11 Cac'oj ta co'tan te ac'op scuenta yu'un ma ba ya jta jmul ta atojol a. 12 ¡Bayel me awutsil, ha'at Jehová; a'bon jnop te halbil mandariletic awu'une! 13 Ya cal ta que spisil te bintic la achapticlan te loc' ta awe. 14 Tse'el co'tan yu'un te be yu'un te mandariletic awu'un, c'ax hich a te bin ut'il spisil c'ulejaliletic. 15 Ya me jna'ulan te mandariletic awu'un, ya me jnop bin ut'il ay te behetic awu'une. 16 Tse'el co'tan yu'un te halbil mandariletic awu'un, ma ba ya xch'ay ta co'tan te ac'ope. Guímel Guímel 17 Pasbeya bin lec te a'bat awu'un, yu'un hich ya xcuxajon soc hich ya jch'uhumbat te ac'ope. 18 Jambon jsit yu'un ya quil te yutsilal ta Ley awu'une. 19 Jbehyemon ta q'uinal; ma me xanac' ta jtojol te mandariletic awu'une. 20 Pich'il co'tan yu'un sc'anel spisil ora te c'op chahpambil awu'une. 21 Ha'at yac awut te mach'atic stoyoj sbahic, te chopol sc'oblalic, te ya xhowiyic ta stojol te mandariletic awu'une. 22 Loq'uesbon bahel ta jtojol te chopol c'op soc te ihlaywanej, como ya jch'uhun spasel te testigo-c'opetic awu'une. 23 Te príncipaletic la shuhcan sbahic, la scontrac'optayonic, pero te a'bat awu'un la sna'ulan te mandariletic awu'une. 24 Ya jmulan te mandariletic awu'un, ha j'ac'-o'taniletic cu'un. Dálet Dálet 25 Pacalonix ta ts'u'lum; a'bon jcuxlejal hich te bin ut'il awaloj. 26 La jca'batix awil te behetic cu'un, la ajac'bon jc'op; a'bon jnop te halbil mandariletic awu'une. 27 A'bon jna' te sbehlal te mandariletic awu'un, hich ya jna'ulan te yutsil a'teliletic awu'une. 28 Ya xch'ay bahel te jch'uhlel yu'un te mel-o'tan; a'bon quip hich te bin ut'il awaloj. 29 Ma xawac'on ta sbehlal lot; ta scuenta sc'uxul awo'tan a'bon jnop te Ley awu'une. 30 Jtsahojix te sbehlal te smelelil c'op; cac'oj ta jtojol te bintic chahpambil awu'une. 31 Slac'ojon te testigo-c'op awu'un, Jehová; ma me xawac'on ta q'uexlal. 32 Ya x'ahnimajon ta be yu'un te mandariletic awu'un, como yac awa'bon tse'el co'tan. He He 33 nohptesawon, Jehová, te be yu'un te halbil mandariletic awu'un, hich ya jc'ohtes ta pasel c'alal ta slajibal. 34 Ac'a c'ohtuc ta co'tan, hich ya jch'uhun spasel te ley awu'un, ya jc'ohtes ta pasel ta spisil co'tan. 35 Tojobtesawon bahel ta sbehlal te mandariletic awu'un, yu'un ha ya jmulan. 36 Ac'a te ha ya sc'an co'tan te testigo-c'op awu'un, ma ha'uc te bic'tal-o'tanil. 37 Ma me xawac' te ya quil te bintic tojol nax ay; a'bon jcuxlejal yu'un st'unel te be awu'une. 38 Ac'a c'ohtuc ta pasel te bin awalbeyej te a'bat awu'un, yu'un ya jxi'at. 39 Loq'uesbon ta jtojol te chopol c'op te ya xiwon yu'un, como lequic te bintic achapoje. 40 Mero sc'anoj co'tan te mandariletic awu'un; ta scuenta stojil bin yac apas a'bon jcuxlejal. Vau Vau 41 Ac'a taluc ta jtojol te sc'uxul awo'tan, Jehová; ha te colel awu'un hich te bin ut'il awaloj ta jamal; 42 hich me ya xhu' cu'un sutbeyel sc'op te mach'a ya yil-o'tantayon, yu'un ha smuc'ulinej co'tan te ac'ope. 43 Ma me xaloq'uesbon ta que te smelelil ac'op, como ha smuc'ulinej co'tan te bintic awaloje. 44 Spisil ora ya me jch'uhun spasel te ley awu'un, ta sbahtel q'uinal. 45 Libre ya xbehenon, como la jle te mandariletic awu'une. 46 Ya me cal ta stojol ajwaliletic te testigo-c'op awu'un, ma ba ya xq'uexawon yu'un; 47 como ya smulan co'tan te mandariletic awu'un, te ha c'ux ya ca'iy ta co'tan. 48 Ya jtoy jc'ab ta stojol te mandariletic awu'un, te c'ux ta co'tan, soc ya jna'ulan te halbil mandariletic awu'une. Zain Zain 49 Na'a me te ac'op la awalbe te a'bat awu'un, te la awa'bon smuc'ulin co'tane. 50 Te bin ya smuc'ubtesbon co'tan te c'alal ayon ta wocol, ha te ya ya'bon jcuxlejal te bintic awaloje. 51 Te mach'atic stoyoj sbahic bayel ya slabanonic, pero ma ba ya quihquitay te ley awu'une. 52 Ya jna', Jehová, te bintic la achap ta namey, ha ya smuc'ubtesbon co'tan. 53 Mero ilinon yu'un te mach'atic chopolic, te ya yihquitayic te ley awu'une. 54 Ha c'ayojetic cu'un te halbil mandariletic awu'un ta banti c'axel nax ayone. 55 Ya jna'bat abihil ta ahc'abal, Jehová, ya me jc'ohtes ta pasel te ley awu'une. 56 Te bin ay ta jcuenta spasel, ha te ya jch'uhun spasel te mandariletic awu'une. Chet Chet 57 Te bin ay cu'un, ha'at Jehová, calojix ta jamal te ya jch'uhun spasel te ac'ope. 58 Ta spisil co'tan la jlehbat asit awelaw; c'uxultayawon hich te bin ut'il awaloj ta jamal. 59 La jnop ta co'tan bin yilel te behetic cu'un, hich suhton tal ta stojol te testigo-c'op awu'une. 60 Ya jsuj jba, ora nax ya jpas te mandariletic awu'une. 61 La sjoytayonic ta syaquic te mach'atic chopol yo'tanic; pero ma ba ya xch'ay ta co'tan te ley awu'une. 62 Ta ohlil ahc'abal ya xhahchon ta yalel wocol ta atojol yu'un te toj bintic achapoje. 63 Ha jmohlol spisil te mach'atic ya xi'at, te ya sch'uhunic spasel te mandariletic awu'une. 64 Jehová, nojel ta sc'uxul awo'tan te lumq'uinal; a'bon jnop te halbil mandariletic awu'une. Tet Tet 65 Lec te bin la apasbe te a'bat awu'un, Jehová, hich te bin ut'il awaloje. 66 A'bon jnop jtsahtayel jba soc p'ijil-o'tanil, como sch'uhunej co'tan te mandariletic awu'une. 67 Te c'alal ma to ba c'axem jwocol a, howiyon, pero yo'tic ya jch'uhumbatix spasel te ac'ope. 68 Mero lecat atuquel, soc lec te bin yac apas; a'bon jnop te mandariletic awu'une. 69 Te mach'atic stoyoj sbahic ya slehonic ta c'op; pero ta spisil co'tan ya jch'uhun spasel te mandariletic awu'une. 70 Tonob yo'tanic, yan te ho'one tse'el co'tan ta stojol te ley awu'une. 71 Lec te c'ax jwocol, hich la jnopbat a te halbil mandariletic awu'une. 72 Te ley te ya xloc' ta awe, c'ax hich lec a te bin ut'il bayel ta mil oro soc plata. Yod Yod 73 Ha la spason te ac'ab soc la schahpanon; a'bon jna' yu'un hich ya jnop a te mandariletic awu'une. 74 Te mach'atic ya xi'at, tse'el yo'tanic yu'un te c'alal ya yilonic, como ha smuc'ulinej co'tan te ac'ope. 75 Jna'oj, Jehová, te toj bintic achapoj, soc te la awa'bon jwocol ta scuenta te stalel jun awo'tan ta jtojol. 76 Ac'a smuc'ubtesbon co'tan te sc'uxul awo'tan, hich te bin ut'il awalbeyej te a'bat awu'une. 77 Ac'a taluc te sc'uxul awo'tan ta jtojol scuenta yu'un ya xcuxajon, como ya smulan co'tan te ley awu'une. 78 Ac'a yich'ic q'uexlaltesel te mach'atic ya stoy sbahic, como mayuc scuentahil la slehbonic jmul; pero ho'on ya jna'ulan te mandariletic awu'une. 79 Ac'a suhtuc tal ta jtojol te mach'atic ya xi'at, te mach'atic ya sna'ic te testigo-c'op awu'une. 80 Junuc me co'tan ta stojol te halbil mandariletic awu'un, scuenta yu'un ma ba ya jta q'uexlal a. Caf Caf 81 Lajelonix ya ca'iy ta smahliyel te colel awu'un, pero ha smuc'ulinej co'tan te ac'ope. 82 Ya xlajix yip jsit yu'un smahliyel te bin awaloj; hich ya joc'oy: ¿Bin ora yac amuc'ubtesbon q'uinal ca'iy? xchihon. 83 Aunque hich ayon te bin ut'il yawil vino te ay ta ch'ahil, ma ba ch'ayem ta co'tan te halbil mandariletic awu'une. 84 ¿Jayeb xan c'ahc'al ya sc'an ya jmahliy? ¿Bin ora yac awa'be stojic te mach'atic ya yuts'inonic? 85 Te mach'atic stoyoj sbahic la shotbonic jch'enal, ma ba ya st'unic bin ya yal te Ley awu'une. 86 Spisil te mandariletic awu'un ha smelelil; coltayawon, yu'un mayuc scuentahil te ya yuts'inonique. 87 Jteb xanix ma ba la stup'onic ta q'uinal, pero mayuc quihquitayej te mandariletic awu'une. 88 Te bin ut'il c'uxon ta awo'tan, ac'a cuxajucon, hich ya jc'ohtes ta pasel te halbil mandariletic te loq'uem ta awe. Lámed Lámed 89 Jehová, sbahtel q'uinal ay te ac'ope, stalel yich'oj yip ta ch'ulchan. 90 Stalel jun awo'tan ta stojol cajalcaj ts'umbalil; ha'at la awac' ipajuc te lumq'uinal, hich stalel ay. 91 Ta scuenta amandar hich ay spisilic c'alal ora, como spisil ayic ta a'batinel awu'un. 92 Te manchuc la smulan co'tan te ley awu'un, ch'ayonix ta q'uinal yu'un wocol te hichuque. 93 Mayuc bin ora ya xch'ay ta co'tan te mandariletic awu'un, como ha ta scuentahic te la awac' cuxajucon. 94 Coltayawon, como awu'unon, como la jlehbat te mandariletic awu'une. 95 Te mach'atic chopolic yacalic ta smahliyel te ya slajinonic, pero ho'on ya jnop bin ut'il ay te testigo-c'op awu'une. 96 Quiloj te ay slajibal spisil te bintic lec; yan te mandariletic awu'un mayuc slajibal stuquel. Mem Mem 97 ¡Mero c'ux ta co'tan te ley awu'un! Sjunal c'ahc'al ya jna'ulan. 98 Te mandariletic awu'un la yaq'uic te c'ax hich ay sp'ijil co'tan a te bin ut'il te jcontratac, como spisil ora sjoquinejonic. 99 C'ax hich ya jna' a te bin ut'il spisil te jnohpteswanejetic cu'un, como ya jna'ulan te testigo-c'op awu'une. 100 C'ax hich ya jna' a te bin ut'il te mamaletic, como jch'uhunej spasel te mandariletic awu'une. 101 La jcom jba te ma ba ya xbehenon ta chopol behetic scuenta yu'un ya jch'uhun spasel te ac'ope. 102 Ma ba la jquihquitay te bintic chahpambil awu'un, como ha'at nix la anohpteson. 103 ¡C'ax chi' ya ca'iy te ac'ope, c'ax hich schi'il ta que a te bin ut'il chab! 104 Ta scuenta te mandariletic awu'un la jta sp'ijil co'tan; ha yu'un te ya quihlay spisil te sbehlal lot. Nun Nun 105 Ha tsumbil c'ahc' yu'un coc te ac'ope, ha ya sacubtes te be cu'une. 106 Ay bin caloj ta jamal, ya me jc'ohtes ta pasel, ha te ya jch'uhun spasel te bintic toj achapoje. 107 Bayel c'axem jwocol; a'bon jcuxlejal, Jehová, hich te bin ut'il awaloje. 108 Lecuc me awo'tan, Jehová, yu'un te mahtaniletic ya xloc' ta que, soc a'bon jnop te bintic toj chahpambil awu'une. 109 Spisil ora quechelon ta lajel ya ca'iy; pero ma ba ya jch'ay ta co'tan te ley awu'une. 110 Te mach'atic chopolic la ya'bonic jyacol, pero ma ba howiyemon ta stojol te mandariletic awu'une. 111 Te testigo-c'op awu'un ha te bin a'boton quich' scuenta sbahtel q'uinal; ha ya stse'ejin co'tan yu'un. 112 Ya sc'an co'tan te ya jch'uhun spasel te halbil mandariletic awu'un ta spisil ora c'alal ta slajibal. Sámec Sámec 113 Ya quihlay te mach'atic jchebal-o'tanetic, pero ha c'ux ta co'tan te ley awu'une. 114 Ha'at ahnibalat soc jmahquilalat cu'un; ha smuc'ulinej co'tan te ac'ope. 115 ¡Q'ueja abahic ta jtojol, ha'ex te chopolex, yu'un ya jch'uhun spasel te mandariletic yu'un te Dios cu'une! 116 A'bon quip hich te bin ut'il awaloj, hich ya xcuxajon a; ma me xawac'on ta q'uexlal yu'un te bin smuc'ulinej co'tan. 117 A'bon quip, hich ya xcolon, soc hich tse'el co'tan spisil ora yu'un te halbil mandariletic awu'une. 118 Ha'at yac ach'ay hilel spisil mach'atic ya xhowiyic ta stojol te mandariletic awu'un, como mayuc scuentahil te lo'loyel yu'unique. 119 Spisil te mach'atic chopolic ta q'uinal hich c'ohemic ta awo'tan te bin ut'il c'a'pal; ha scuentahil te c'ux ta co'tan te testigo-c'op awu'une. 120 Te jbaq'uetal ya xnihc yu'un xiwel ta atojol; ya quich' ta muc' te bin chapal awu'une. Ayin Ayin 121 Jpasoj te bintic stojil; ma me xawac'on hilel ta sc'ab te j'uts'inwanejetique. 122 Ac'a te lec ya xc'oht te a'bat awu'un; ma me xawac' te ya yuts'inonic te mach'atic stoyoj sbahic. 123 Ya xlaj yip jsit yu'un smahliyel te colel awu'un soc te ya xc'oht ta pasel te bin stojil awaloje. 124 Hich xapasbe te a'bat awu'un te bin ut'il ay sc'uxul awo'tan, soc a'bon jnop te halbil mandariletic awu'une. 125 Ho'on a'baton awu'un, a'bon sp'ijil co'tan yu'un hich ya jna' te mandariletic awu'une. 126 Yorahilix te ay bin yac apas, Jehová, como c'axuntaybilix te ley awu'une. 127 Ha scuentahil te c'ux ta co'tan te mandariletic awu'un, c'ax hich a te bin ut'il oro, c'ax hich a te bin ut'il lequil oro. 128 Ha yu'un ya ca'iy te c'ax hich toj ay a spisil te mandariletic awu'un te bin ut'il spisil bintic ay, soc ya quihlay spisil te sbehlal lot. Pe Pe 129 C'ax t'ujbil te testigo-c'op awu'un; ha scuentahil te ya jch'uhun spasel. 130 Te halbeyel sc'oblal ac'op ha ya yac' te ya sacub q'uinal; ya ya'be sp'ijil yo'tanic te mach'atic peq'uel ayic. 131 Ya jam que, ya quich' ic', yu'un ha ya jc'an te mandariletic awu'une. 132 Ilawilon, na'bon yo'bolil jba, hich te bin ut'il yac apasbe te mach'atic c'ux ta yo'tanic te abihile. 133 Tojobtesbon bahel te coc ta scuenta ac'op, ma xawac' yu'untayon te mulile. 134 Ac'awon ta libre yu'un te uts'inel yu'un ants-winiquetic, yu'un hich ya jch'uhun spasel te halbil mandariletic awu'une. 135 Ac'a tihluc sts'anabul asit awelaw ta stojol te a'bat awu'un soc a'bon jnop te halbil mandariletic awu'une. 136 Muc'ul ha' ya xloc' ta jsit, yu'un ma ba ya sch'uhunic spasel te Ley awu'une. Tsade Tsade 137 Toj awo'tan, Jehová, soc toj ayic te bintic chahpambil awu'une. 138 Te testigo-c'opetic awaloj toj soc ya yac' smuc'ul-o'tanil. 139 Slajinejon te xut'et co'tan, como te jcontratac la sch'ay ta yo'tanic te ac'ope. 140 Mayuc ya'baquil te ac'op awaloj, ha c'ux ta yo'tan te a'bat awu'une. 141 Peq'uelon soc ihlaybilon, pero ma ba jch'ayoj ta co'tan te mandariletic awu'une. 142 Te stojil awo'tan stalel ay, soc smelelil te ley awu'une. 143 C'oht ta jtojol te wocol soc mel-o'tan, pero ha ya smulan co'tan te mandariletic awu'une. 144 Te testigo-c'opetic awu'un toj ayic sbahtel q'uinal; a'bon jna' q'uinal scuenta yu'un ya xcuxajon. Cof Cof 145 Ta spisil co'tan ya x'awonon; jac'bon jc'op, Jehová, hich ya jch'uhun spasel te mandariletic awu'une. 146 Ya cawtayat, ¡coltayawon! hich ya jch'uhun spasel te testigo-c'op awu'une. 147 Ma to ba sacuben q'uinal a ya xhahchon, ya jc'ambat coltayel; ha smuc'ulinej co'tan te ac'ope. 148 Sjunal ahc'abal ma ba ya jmuc jsit, scuenta yu'un ya jna'ulan te ac'op awaloj. 149 A'iybon jc'op ta scuenta sc'uxul awo'tan; a'bon jcuxlejal, Jehová, hich te bin ut'il ya sc'an te stojil chahpanel awu'une. 150 Nohpojic tal te mach'atic chopolic te ya sc'an ya yuts'inonic; namal hilem yu'unic te ley awu'une. 151 Pero nopol ayat, Jehová, soc ha smelelil spisil te mandariletic awu'une. 152 Nameyix te jna'oj te mandariletic awu'un, te ha awac'oj scuenta sbahtel q'uinal. Resh Resh 153 Ilbon jwocol, ac'awon ta libre, como ma ba ch'ayem ta co'tan te ley awu'une. 154 C'opojan ta jcuenta, ac'awon ta libre; a'bon jcuxlejal ta scuenta ac'op te awaloje. 155 Te coltayel namal ay ta stojol te mach'atic chopolic, como ma ba ya slehic te halbil mandariletic awu'une. 156 Bayel te c'uxultayel awu'un, Jehová; a'bon jcuxlejal hich te bin ut'il ay te stojil chahpanel awu'une. 157 Bayel te jcontratac te ya yuts'inonic, pero ma ba ya quihquitay hilel te testigo-c'op awu'une. 158 Ya quil te mach'atic ma junuc yo'tanic, mero ma jmulan, como ma ba ya sch'uhunic spasel te ac'ope. 159 Ilawil, Jehová, te bayel c'ux ta co'tan te mandariletic awu'un; a'bon jcuxlejal ta scuenta sc'uxul awo'tan. 160 Ha smelelil spisil te ac'ope; sbahtel q'uinal ay spisil te stojil chahpanel awu'une. Sin Sin 161 Te príncipaletic mayuc scuentahil ya yuts'inonic, pero ya xiw co'tan yu'un te ac'ope. 162 Ya stse'ejin co'tan yu'un te ac'op awaloj, hich te bin ut'il mach'a ya sta bayel bintic pojticlambil. 163 Ya jp'aj soc ya quihlay te lot, pero c'ux ta co'tan te ley awu'une. 164 Huqueb buelta jujun c'ahc'al ya calbat yutsil ac'oblal ta scaj stojil bintic chahpambil awu'un. 165 Te mach'atic c'ux ta yo'tanic te ley awu'un, ay bayel lamal q'uinal yu'unic, mayuc bin ya sc'ohchinic. 166 Ya jmahliy te colel awu'un, Jehová, soc c'ohem ta pasel cu'un te mandariletic awu'une. 167 Te jch'uhlel ya sch'uhun spasel te testigo-c'op awu'un, mero c'ux ta co'tan. 168 Ya jch'uhun te mandariletic soc te testigo-c'op awu'un, como spisil te behetic cu'un ay ta atojol. Tau Tau 169 Ac'a c'ohtuc ta atojol te caw, Jehová; a'bon sp'ijil co'tan hich te bin ut'il te ac'op awaloje. 170 Ac'a c'ohtuc ta atojol te bin ya jc'ambat; ac'awon ta libre hich te bin ut'il awaloje. 171 Ac'a loc'uc ta que ta yalel yutsil ac'oblal, te c'alal yac anohpteson te halbil mandariletic awu'une. 172 Ya me jc'ayojtay ta que te ac'op, como toj ay spisil te mandariletic awu'un. 173 Chapaluc me ac'ab yu'un yac acoltayon, como jtahoj te mandariletic awu'une. 174 Sc'anoj co'tan te colel awu'un, Jehová, soc ha ya smulan co'tan te ley awu'une. 175 Ac'a cuxajucon yu'un ya calbat yutsil ac'oblal; soc ac'a scoltayon te bintic chahpambil awu'une. 176 Howiyemon ta be hich te bin ut'il howiyem tuminchij; leha te a'bat awu'un, como ma ba ch'ayem ta co'tan te mandariletic awu'une. |
Biblia Tzeltal Bachajon © Sociedad Bíblica de México, A.C., 2006.
Bible Society of Mexico