Salmos 112 - Bible in Tzeltal Bachajón

Bayel bintic ay yu'un mach'a yich'oj ta muc' Jehová

¹ ¡Aleluya! Bayel yutsil te mach'a yich'oj ta muc' te Jehová, te bayel ya smulan te mandariletic yu'une.

² Te sts'umbal ay me yipic ta q'uinal; ya me yich'ic bendición te jcaj ts'umbalil te toj yo'tanique.

³ Ay bayel sc'ulejal ta sna, soc stalel ya xhil te bin toj ya spas.

⁴ Ta yohlil ihc' q'uinal ya xtihl sacal q'uinal ta stojol te mach'atic toj yo'tanic; ha te mach'atic t'ujbil yo'tanic, te ya sna'ic c'uxultaywanej soc te toj bin ya spasique.

⁵ Lec ya xc'oht te mach'a soc sc'uxul yo'tan ya yac' ta majanel, te stojil ya spas te ya'tele.

⁶ Hich mayuc bin ora ya xyahl; sbahtel q'uinal na'bil sba te mach'a toj yo'tan.

⁷ Ma ba ya xi' te bin ma lecuc ta a'iyel; jun yo'tan, ha smuc'ulinej yo'tan te Jehová.

⁸ Stalel jun yo'tan, ma ba ya xiw, ha to c'alal ya yil te ya xc'oht ta stojol te scontratac te bin ya sc'an yo'tan.

⁹ Ya spucticlan, ya ya'be te pobrehetic, stalel ay te bin toj ya spas; ya xtohybot sc'oblal te yip scuenta yich'el ta muc'.

¹⁰ Te mach'a chopol yo'tan ya me yil soc ya me xc'ahc'ub yo'tan yu'un; ya sc'uxticlan ye, ya xlaj bahel; te bin ya sc'an yo'tan te mach'atic chopol yo'tanic, ya xch'ay bahel.