Salmos 109 - Bible in Tzeltal Bachajón

Sc'anel spacol

Yu'un jach-c'ayoj. Ha salmo yu'un David.

¹ Dios cu'un, te ya calbat bayel awutsil, ma me xch'abat ta c'op,

² como te mach'atic chopol bin ya yalic soc te ya xlo'loywanic la sjam yehic yu'un scontrahimbelonic; la yalbonic jc'oblal ta lot.

³ La sjoytayonic ta c'op yu'un il-o'tantayel, mayuc scuentahil te ya ya'bonic guerra.

⁴ Te spacol te sc'uxul co'tan ha te ya slehbon jmul, pero ya jc'opon te Diose.

⁵ Ya suhtesbonic ta bin chopol te bin lec, ya suhtesbonic ta il-o'tantayel te sc'uxul co'tan.

⁶ Ac'a te ya xcontrahinot yu'un mach'a chopol; ac'a stehc'an jle-mulil ta swa'el-c'ab.

⁷ C'alal ay ta chahpanel ac'a tahbeyec smul, soc ac'a sutp'ijuc ta mulil te bin ya sc'opon Dios yu'une.

⁸ Ma me haluc c'ahc'al ya xcuxaj; yanuc me mach'a ya x'ich'bot te ya'tele.

⁹ Ac'a hiluc ta me'ba' te snich'nab soc hiluc ta me'ba' ants te yihname.

¹⁰ Te snich'nab ac'a behenuc ta bayuc ta c'ambajel; ac'a yich'ic loq'uesel ta sna te jihnemixe.

¹¹ Te mach'a ya yac' ta majanel taq'uin ac'a yich' bahel spisil te bintic ay yu'un; te jyanlumetic ac'a spojbeyic sit te ya'tele.

¹² Ma me ayuc mach'a ya sc'uxultay o te ya sna'be yo'bolil sba te snich'nab te hilemic ta me'ba'.

¹³ Ac'a lajuc spisil te sts'umbale, ac'a yich' tup'beyel sbihil ta scha'cajal ts'umbalil.

¹⁴ Ac'a me sna' Jehová te bintic chopol spasojic te statique, ma me xyich' tup'el te smul te snane.

¹⁵ Te smulic ayuc me spisil ora ta stojol te Jehová, te ha ya stup' ta q'uinal te na'el yu'une,

¹⁶ como ma ba la snop te ya ya'iy c'uxultaywanej, ha la snuts yu'un ya smil te pobre, te mach'a mayuc bin ay yu'un soc te mach'a ay ta mel-o'tan.

¹⁷ Bayel la smulan yalel chopol c'oblalil; ¡ac'a c'ohtuc ta stojol te chopol c'oblalile! Ma ba la sc'an bendición, ¡namal ac'a hiluc ta stojol!

¹⁸ Ha la slap chopol c'oblalil hich te bin ut'il sc'u'; och ta yutil sbaq'uetal hich te bin ut'il ha', hich te bin ut'il aceite ta sbaquel.

¹⁹ Ac'a mucotuc yu'un hich te bin ut'il c'u'ul, hich te bin ut'il schuhquil sch'uht te spisil ora chucbil a.

²⁰ Hich me ac'a a'botuc stoj yu'un Jehová te mach'atic ya slehbonic jmul. Te mach'atic ya yalbonic chopol jc'oblal.

²¹ Yan te ha'ate, Jehová, lecuc me awo'tan cu'un ta scaj te abihile; coltayawon, como lec te sc'uxul awo'tan,

²² como pobre ayon soc ayon ta wocol, soc ay ehchen ta co'tan ya ca'iy.

²³ Hich ya xch'ayon bahel te bin ut'il axinal c'alal ya xmahl c'ahc'al; ¡ya quich' yuq'uilanel hich te bin ut'il c'ulub!

²⁴ Mayuc yip te sjol cacan ta scaj te ya jcom jwe'el; yahubenix jbaq'uetal ta scaj te mayuc sjuhp'el.

²⁵ Ya stse'layonic te ants-winiquetic; te c'alal ya yilonic, ya sjimulan sjolic yu'un.

²⁶ ¡Coltayawon, Jehová, Dios cu'un! ¡Coltayawon ta scuenta sc'uxul awo'tan!

²⁷ Ac'a sna'ic te ha spasoj ac'ab ini, te ha'at la acoltayon, Jehová.

²⁸ Ac'a yalic chopol c'oblalil, pero ha'at yac awac' bendición. Ac'a hahchuquic, pero ac'a stahic q'uexlal, yan te a'bat awu'un tse'eluc me yo'tan.

²⁹ Ac'a sc'u'inic q'uexlal te mach'atic ya slehbonic jmul; ac'a mucotuc yu'un q'uexlal hich te bin ut'il muc'ul c'u'ul.

³⁰ Ho'on ya calbe bayel wocol te Jehová; ya calbe yutsil sc'oblal ta yohlil bayel ants-winiquetic,

³¹ como ha ya stehc'an ta swa'el-c'ab te pobre yu'un ya scoltay ta sc'ab te mach'atic ya yaq'uic ta lajele.