Salmos 104 - Bible in Tzeltal Bachajón

Dios ya scanantay te bintic pasbil yu'un

¹ ¡Jch'uhlel, halbeya yutsil sc'oblal te Jehová! ¡Jehová, Dios cu'un, c'ax muc'at! Ac'u'inej axojobil soc smuc'ul awutsilal.

² Te Dios potsbil ta sacal q'uinal hich te bin ut'il c'u'ul; ha ya slim te ch'ulchan hich te bin ut'il pac',

³ ya yac' ta sba ha' te oyetic yu'un sna ta toyol, ha carreta ya xc'oht yu'un te tocaletic, soc ya xmo ta xic' te iq'ue,

⁴ ya yac' te ha jal c'opetic yu'un te iq'uetic, soc ha a'batetic yu'un te yat c'ahc'.

⁵ Ha la ya'be yich'o-ip te bahlumilal, mayuc bin ora ya stij sba ta yawil.

⁶ La amuc ta sc'ubulil mar hich te bin ut'il c'u'ul; mucotic ta ha' te witsiltique.

⁷ La awut, hich ahnic bahel, c'alal la ya'iybat te chahwuc awu'un ora ahnic bahel;

⁸ mohic bahel ta witsiltic, cohic bahel ta spamlejetic tey ta banti chapal awu'un.

⁹ La awa'be smojonil yu'un ma xc'axic a, ma ba ya xmucotix te lumq'uinale.

¹⁰ Ha'at yac awac' loc'uc ta spamlejetic te ya'lel sloq'uib-ha'etic, ya x'oquin bahel ta yohlil te witsiltic,

¹¹ ya ya'be ha' yuch'ic te ha'mal chambahlametic; ya xch'ay taquinti'il yu'un te ha'mal burrohetique.

¹² Ta sti'il ha'etic ya spas spechechic te mutetic ya xwihlic ta toyol; ya xc'ayojinic ta yohlil sc'ab te te'etique.

¹³ C'alal ta sna ta toyol ya ya'be tal ya'lel te witsiltic; te sit te ya'tel nojel ta lumq'uinal.

¹⁴ Ha ya yac' ch'ihyuc te aquiltic ya swe'ic te chambahlametic, soc te awal-ts'unubil te ya xtuhun yu'un te ants-winiquetic, yu'un tey ya sloq'ues a te we'elil ta q'uinal,

¹⁵ soc te vino te ya yac' stse'ejin yo'tan, te aceite te ya yac' te xch'ulet yelaw yu'un, soc te pan te ya xcuxaj ants-winiquetic yu'un.

¹⁶ Bayel ya'lel ya stahic te te'etic yu'un Jehová, ha te cedrohetic ta Líbano te ts'umbil yu'une.

¹⁷ Tey ya spas spechechic a te mutetic; ay sna ta tajalaltic te chex'acan mut.

¹⁸ Te toyol witsiltic ha yu'un te ha'mal tentsunetic; ta tontiquil ya snac' sbahic te cohtometique.

¹⁹ La spas te u scuenta sp'isojibal te yorahil; te c'ahc'al ya sna' te bin ora ya sc'an ya xmahl.

²⁰ Yac awac' tal yihc'al q'uinal, hich ya x'och te ahc'abal, soc ya xloq'uic tal spisil te ha'mal chambahlametique.

²¹ Te jcolel chojetic ya x'awonic yu'un yacuc stahic bin ya sti'ic, ya sc'ambeyic Dios te swe'elique.

²² Ya xloc' tal te c'ahc'al, ya xbahtic, ya spahcan sbahic ta ch'enetic yu'unic.

²³ Ya xloc' tal ta a'tel te ants-winiquetic, ya x'a'tejic ha to ta tibiltic.

²⁴ ¡C'ax bayel bintic apasoj, Jehová! La apasticlan spisil ta scuenta sp'ijil awo'tan; nojel ta lumq'uinal te bintic apasoje.

²⁵ Tey ay a te mar te muc' sjamalil soc snahtil, ta banti ma ahtaybaj ya xbehenic te bintic cuxajtic, muc' biq'uitetic.

²⁶ Tey ya xbehenic a te barcohetic, tey ay a te Leviatán te la apas yu'un ya x'ixtaj tey a.

²⁷ Spisilic ya smahliyat yu'un yac awa'be swe'elic ta yorahil.

²⁸ Ha'at yac awa'be, hich ya stamic; yac ajam ac'ab, hich ya xnoj sch'uhtic yu'un te bin lec.

²⁹ Teme yac anac' asit awelaw ta stojolic, ya xiwic; teme yac apojbe te ic' yu'unic, ya xchamic, ya sutp'ijic ta ts'ubilum.

³⁰ Te c'alal yac aticon te espíritu awu'un, ya yich'ic pasel, soc ya x'ach'ub awu'un te sba te bahlumilale.

³¹ ¡Ac'a halajuc sbahtel q'uinal te yutsilal te Jehová! ¡Tse'eluc yo'tan Jehová yu'un te a'teliletic yu'une!

³² Ha ya yil te lumq'uinal, ya xnihc yu'un; ya spic te witsiltic, ya xloc' ch'ahil yu'un.

³³ Ta spisil jcuxlejal ya jc'ayojtay te Jehová; ya jc'ayojtaybe yutsil sc'oblal te Dios cu'un te jayeb c'ahc'al cuxulon.

³⁴ Te ayuc bin ut'il lec yo'tan yu'un te bin ya jnopilan ta co'tan; tse'el co'tan ta stojol te Jehová.

³⁵ Ac'a lajuc ta bahlumilal te jmulawiletic, ac'a ch'ayuc te mach'a chopolique. ¡Jch'uhlel, halbeya yutsil sc'oblal te Jehová! ¡Aleluya!