Salmos 1 - Bible in Tzeltal Bachajón

LIBRO 1 ( Salmos 1—41 ) Te mach'a toj yo'tan soc te jmulawil

¹ Bayel me yutsil te mach'a ma ba ya st'un te bin ya yal te mach'atic chopol yo'tanic, o ma ba ya stehc'an sba ta be yu'un jmulawiletic, o ma ba xhuhcaj ta shuctajib te jlabanwanejetique;

² te ha ya smulan te ley yu'un Jehová, soc ya sna'ulan ta c'ahc'al ahc'abal.

³ Hich ya xc'oht te bin ut'il te' te ts'umbil ta ti' muc'ul-ha', te ya yac' sit ta yorahil soc ma xluhbaj te ya'binal; soc lec ya xc'oht spisil bintic ya spas.

⁴ Ma hichuc te mach'atic chopol yo'tanic, hich c'ohemic te bin ut'il suhlil trigo te ya xlichotic bahel yu'un ic'.

⁵ Ha yu'un te mach'atic chopol yo'tanic ma xcuhch yu'unic te yorahil ich'el ta c'op, te jmulawiletic ma x'ac'otic ochel ta tsoblej yu'un te mach'atic toj yo'tanique.

⁶ Como te Jehová ya scanantaybe sbe te mach'atic toj yo'tanic, yan te sbe te mach'atic chopol yo'tanic ya yac' te ch'ayel ya xbahtic.