Rut 1 - Bible in Tzeltal Bachajón

Rut soc Noemí

¹ Te c'alal bin ora ayic ta cuentahinwanej a te juecetic, tal wi'nal ta q'uinal. Ay jtuhl winic ta Belén ta sq'uinal Judá te baht ta nahinel ta sq'uinal Moab soc yihnam soc cheb snich'nab.

² Elimelec sbihil te winique, Noemí sbihil te yihnam; Mahlón soc Quelión sbihilic te snich'nab; ha efrateohetic talemic ta Belén ta sq'uinal Judá. C'ohtic ta sq'uinal Moab, tey nahinic a.

³ Cham te Elimelec te smamalal Noemí, stuquel xanix hil te Noemí soc te cheb yalatac,

⁴ te la yic' yihnaminic moab-antsetic, Orfa sbihil te jtuhle, Rut sbihil te yane. Ay wan lajuneb ha'bil te nahinic tey a.

⁵ Ta patil ha nix hich cham te Mahlón soc te Quelión, hich stuquel xanix hil te antse, mayuquix yalatac soc mayuquix smamalal.

⁶ Tey ta sq'uinal Moab la ya'iy te Jehová tal scoltay te pueblo yu'un, ha te la yac'ticlambe we'elil, ha yu'un hahch bahel soc te schebal yalib, loc' bahel ta sq'uinal Moab.

⁷ Hich loc' bahel te banti ay, joquinot bahel yu'un te schebal yalib, hahchic ta behel yu'un ya suhtic bahel ta sq'uinal Judá.

⁸ Te Noemí hich la yalbe ta schebal te yalib: Bahan, suhtanic bahel ta sna te ananique. Ac'a me sc'uxultayex te Jehová, hich te bin ut'il la ac'uxultayic te chawinic amamalalic soc te ho'one.

⁹ Te Jehová ac'a yac' te jujutuhlex yac atahic cux-o'tanil ta sna te amamalal, xchi. Hich la yuhts'uylan; pero hahchic ta oq'uel te cheb yalib,

¹⁰ hich la yalbeyic: Ya me joquinatcotic bahel ta alumal, xchihic.

¹¹ Pero la sjac' te Noemí: Suhtanic bahel, cantsil-alatac; ¿bin yu'un yac ajoquinonic bahel? ¿Yu'un bal ya to xtal xan calatac te ha amamalalic ya xc'ohtic?

¹² Suhtanic bahel, cantsil-alatac, bahanic, yu'un c'ax me'elonix te ya jta xan jmamalal. Aunque ya cal te ay to bin ya jmahliy, te yacuc joquin jmamalal ta ahc'abal ini, te yacuc x'ayin xan jquerem-alatac,

¹³ ¿ya bal amahliyic ha to c'alal ya xmuc'ubic? ¿Yu'un bal ma ba ya xnuhpunex ta scuentahic? Ma hichuc, cantsil-alatac. C'ax hich ay jwocol a te bin ut'il te ha'exe, como shachoj sc'ab te Jehová ta scontrahimbelon, xchi.

¹⁴ Cha'hahchic xan ta oq'uel yu'un. Te Orfa la yuhts'uy hilel te yalibme'el; yan te Rut ma ba la sc'an la yihquitay hilel stuquel.

¹⁵ La yal te Noemí: Ilawil, te amohlol ta antsil suhtix bahel ta stojol te pueblo yu'un soc ta stojol te diosetic yu'une; joquina bahel, xchi.

¹⁶ Pero la sjac' te Rut: Ma xawalbon te ya quihquitayat soc te ya jpihtesat; yu'un bayuc ya xbahat, tey ya xbohon a; soc bayuc ya xnahinat, tey ya xnahinon a. Ha jlumal ya xc'oht te alumale, soc ha Dios cu'un ya xc'oht te Dios awu'une.

¹⁷ Te banti ya xchamat, tey ya xchamon soc tey ya quich' muquel a. Jehová ac'a ya'bon tulan wocol, soc c'ax to xan hich a, teme ha nax ta scaj lajel stuquel te ya quihquitay jbahtic, xchi.

¹⁸ C'alal la yil te Noemí te snopoj ta lec te ya sjoquin bahel, mayuc bin la yalbeyix xan.

¹⁹ Hich hahchic ta behel schebalic ha to c'alal c'ohtic ta Belén. C'alal ochic bahel ta Belén, bayel c'opoj yo'tanic yu'un spisil te pueblo, hich la yalic te antsetic: ¿Ma bal ha'uc te Noemí ini? xchihic yu'un.

²⁰ La sjac' te Noemí: ¡Ma xawalboniquix Noemí, a'boniquix jbihilin Mara, yu'un bayel la ya'bon jwocol te Mach'a spisil ya xhu' yu'un!

²¹ Nojel loc'on bahel, pero te Jehová la yac' te jochol jc'ab a suhton talel. ¿Bin yu'un yac awalbonic Noemí, te bin ut'il te Jehová la scontrahinon, soc la ya'bon jwocol te Mach'a spisil ya xhu' yu'un? xchi.

²² Hich suht tal te Noemí, joquinot tal yu'un Rut te yalib, te moab-ants; loq'uic tal ta sq'uinal Moab, hulic ta Belén ta yorahil shahchel ta bojel te cebada.