Proverbios 7 - Bible in Tzeltal Bachajón

Jlo'loywanej te j'antsinel-ants

¹ Jnich'an, ch'uhumbon me te jc'ope; q'ueja ta awo'tan te mandariletic cu'un.

² Ch'uhuna te mandariletic cu'un, hich ya xcuxajat; hich me xacanantay te nohptesel cu'un te bin ut'il sch'uhlel asit.

³ Chuca ta yalatac ac'ab, ts'ihbaya ta awo'tan.

⁴ Halbeya te p'ijil-o'tanil: Ha'at jwixat, soc hich xawalbe te bin ay ta na'el: Ha'at jmohlol-ts'ahquilat, xchihat me.

⁵ Yu'un ya scanantayat ta stojol te j'antsinel-ants, ta stojol te yan ants te ya xmonawan ta sc'op.

⁶ La jquil ta sventanahul jna, te banti jamajtic;

⁷ ta yohlil te mach'atic ma sna'ic q'uinal, la jquil ta yohlil te queremetic jtuhl querem te mayuc snopojibal yu'un.

⁸ Yac ta c'axel bahel ta calle, ta banti te xuhc, yac ta behel bahel ta sna te antse

⁹ ta tibiltic, te c'alal yac ta ihc'ubel q'uinal, ta yihc'ubel q'uinal ta ahc'abal.

¹⁰ Loc' tal ta tahel yu'un jtuhl ants, slapoj sc'u' yu'un j'antsinel-ants soc ay bin snopoj ta yo'tan.

¹¹ Te ants ya shach c'op soc ma stsahtay sba, mayuc bin ora ya xhil ta sna;

¹² yan buelta ay ta calle, yan buelta ay ta plazahetic, ya xmacliwan ta jujun xuhc calle.

¹³ Te ants la smech' soc la yuhts'uy te quereme, soc mayuc sq'uexlal a hich la yalbe:

¹⁴ Caloj te ya cac' milbil mahtanil scuenta lamal-o'tanil, nax to c'oht ta pasel cu'un te bin caloj ta jamal.

¹⁵ Ha yu'un loc'on tal jtahbelat; la jlehat, la jtahatix.

¹⁶ Ta jwayib la jlimix hilel buen t'ujbil tsots pasbil ta lino talem ta Egipto.

¹⁷ Te jwayib la jca'beyix mirra, áloe soc canela.

¹⁸ La', ya xyacubotic yu'un stahel jbahtic c'alal ta sacubel q'uinal; ya jmulan jbahtic.

¹⁹ Como ma ba nacal te jmamalal; namal banti bahem.

²⁰ La yich' bahel jun bolsa staq'uin, ha to ya suht tal ta syijil u, xchi te antse.

²¹ La stsal ta scuenta st'ujbil c'op, hu' yu'un smonel ta yutsil sc'op.

²² Ora la st'un bahel hich te bin ut'il wacax te ya xbaht ta banti ya yich' milel, hich te bin ut'il chij te ya x'och ta yaquil,

²³ ha to c'alal ya xlowbot sch'uht ta ya'tejibal t'ihmalte'; hich te bin ut'il ha'mal mut ya xwihl bahel ta yaquil, ma ba ya sna' ya xlajimbot scuxlejal yu'un.

²⁴ Ha yu'un, jnich'nab, a'iybon awa'iy te jc'ope, a'iybon awa'iy te bin ya cale.

²⁵ Ma me xawac' showiytesbat awo'tan te antse, ma me xat'umbe sbe,

²⁶ como bayel mach'atic la ya'be yehchen, bayel mach'atic la smilticlan.

²⁷ Te sna ha sbehlal yawil mach'atic chamenic, ya x'ac'awan bahel ta yawil lajel.