Proverbios 30 - Bible in Tzeltal Bachajón

Tsahbil c'opetic yu'un Agur

¹ Te tsahbil c'opetic yu'un Agur snich'an Jaqué. Te sc'op-jalwanej te la yalbe te Itiel soc Ucal:

² Ho'on te c'ax mayuc bin ya jna' ta spisil winiquetic; mayuc bin jna'oj scuenta ants-winic.

³ Mayuc quich'oj p'ijil-o'tanil, ma jna'be sba te Ch'ul Dios.

⁴ ¿Mach'a mohem bahel soc cohem tal ta ch'ulchan? ¿Mach'a la snop' ta sc'ab te iq'ue? ¿Mach'a la spots ta snahtil-c'u' te ha'etic? ¿Mach'a la schahpan spisil sti'il te bahlumilale? ¿Bin sbihil, soc bin sbihil te snich'ane? Halbon ca'iy teme yac ana'e.

⁵ Ha melel spisil te sc'op te Diose; ha mahquilal yu'un te mach'atic ya snac' sbahic ta stojol.

⁶ Ma me xawa'be sobra te bin ya yal, scuenta yu'un ma ba ya yutat, te ya xchicnaj te la awa'iy lot.

⁷ Ay cheb te bintic ya jc'ambat, Dios cu'un, ma me xamuc ta awo'tan te c'alal ma to xchamon a:

⁸ Loq'uesa ta jtojol te lot soc te lo'loywanej; soc ma me xawac'on ta pobre o ta jc'ulej, ha nax me xawa'bon te we'elil te ya xtuhun cu'une,

⁹ yu'un teme ya xnoj jch'uht ya wan jmucat ta co'tan, soc hich wan ya cal: ¿Mach'a a te Jehová? xchihon; o teme pobrehon ya wan ca'iy elec', hich ya jbohlc'optaybe sbihil te Dios cu'une.

¹⁰ Ma me xalehbe smul te a'bat ta stojol te yajwal, ya wan yalbat chopol ac'oblal soc yac awich' castigo yu'un.

¹¹ Ay mach'atic ya sbohlc'optay static soc ma xyalbeyic lec sc'oblal te snanique.

¹² Ay mach'atic ya scuy sbahic te mayuc smulic, pero ma ba lecubtesbil yu'un te bin bohlobenic yu'une.

¹³ Ay mach'atic scuyoj sbahic ta muc' sc'oblalic, soc toyol yac'oj sbahic ta sitic ta yilel te yantique.

¹⁴ Ay mach'atic te ha espada c'ohem te yehic soc te scha'am hich c'ohem te bin ut'il cuchillo yu'un ya slajin a te pobrehetic soc te mach'atic mayuc bin ay yu'unic.

¹⁵ Ay cheb yantsil-nich'an te nap'ac te hich ya yalic: A'bon, a'bon, xchihic. Ay oxeb te bin ma xnoj sch'uhtic, chaneb te mayuc bin ora ya yal: Tic'onix a, ma xchihuquic:

¹⁶ ha te yawil mach'atic chamenic, te yawil alal te ma xhahch alal tey a, te q'uinal te ma tic'uc ya ya'iy a te ha'e, soc te c'ahc' te mayuc bin ora te ya yal: Tic' a, te xchihe.

¹⁷ Te sit te ma lecuc ya yil te stat soc te ma sc'an ya sch'uhumbe smandar te snan, ya xloq'uesot yu'un te jojetic yu'un sjuclej soc ya xti'ot yu'un hosetic.

¹⁸ Ay oxeb te bintic xcham co'tan yu'un, chaneb te ma jna'be scuentahil:

¹⁹ ha te sbe jxic ta toyol, te sbe chan ta tontiquil, te sbe barco ta yohlil mar, soc te sbe querem ta stojol ach'ix.

²⁰ Hich ay te bin ya spas te j'antsinel-ants: ya xwe' soc ya scus ye, soc ya yal: Mayuc bin chopol jpasoj, xchi.

²¹ Ay oxchahp te ya xnihc q'uinal yu'un, chanchahp te ma xcuhch yu'un:

²² ha te a'bat te ya x'och ta ajwalil, te sonso te noj sch'uht,

²³ te ihlaybil ants te c'alal ya sta smamalal, soc te criada te ha sjelol ya xc'oht te yajwale.

²⁴ Ay chaneb bintic tutic te ayic ta q'uinal, pero c'ax hich sp'ijilic a te mach'atic p'ijique:

²⁵ te ts'isimetic ha pueblo te mayuc yip, pero ya stsob swe'elic ta yorahil snahtil c'ahc'alel;

²⁶ te cohtometic ha pueblo te mayuc yip, pero ya spas snahic ta tontiquil;

²⁷ te c'ulubetic te mayuc ajwalil yu'unic, pero pajal xyomet ya xloq'uic bahel spisilic;

²⁸ te jt'ohloc te ya xhu' ta tsaquel ta c'abal, pero ay ta sna ajwaliletic.

²⁹ Ay oxeb te t'ujbil ya xbehenic, chaneb te mero t'ujbil ya xbehenic:

³⁰ ha te choj ay yip ta yohlil spisil te chambahlametic, te mayuc bin ora ya suht ta spat;

³¹ te toyba tatmut, te stat tentsun, soc te ajwalil te ya yic' ta behel te soldadohetic yu'une.

³² Teme ta scaj asonsohil la atoy aba, soc teme chopol anopoj te bin yac apase, ac'a ac'ab ta awe.

³³ Teme ya yich' juyel te leche, ya xloc' mantequilla tey a, te mach'a tulan ya smaj sni', ya xloc' sch'ich'el yu'un, soc te mach'a ya shach ilimba, ya xhahch c'op yu'un.