Proverbios 3 - Bible in Tzeltal Bachajón

Tsitsel yu'un sch'uhunel mandar

¹ Jnich'an, ma me xch'ay ta awo'tan te nohptesel cu'un; q'ueja ta awo'tan te mandariletic cu'une,

² yu'un hich ya xnahtij aworahil te ya xcuxajat soc ya ya'bat bayel awutsil alequil.

³ Ma me ayuc bin ora yac awihquitay te c'uxul-o'tanil soc te bin smelelil; chuca ta anuc', ts'ihbaya ta awo'tan,

⁴ hich yac ata a te lec yo'tan awu'un soc te lec ac'oblal ta stojol Dios soc ta stojol ants-winiquetic.

⁵ Jc'axel ac'a smuc'ulin awo'tan te Jehová, ma me xawich' aba ta cuenta yu'un te bin anopoj.

⁶ Ta spisil te bintic yac apas, na'a me te Jehová, ha ya stojobtesbat te behetic awu'un.

⁷ Ma me p'ijuc yac acuy aba; ich'a ta muc' te Jehová soc ihquitaya te bin chopole.

⁸ Ha spoxil ya xc'oht te abaq'uetal soc ya ya'be yich' yip te abaquele.

⁹ Ich'a ta muc' Jehová soc te bintic ay awu'un soc te sba sit spisil ats'unub awawal;

¹⁰ hich me ya xnoj a te stsobojibal te sit ats'unub, soc ya me xnoj ta yach'il vino te yawil awu'une.

¹¹ Jnich'an, ma me xap'aj te tojobtesel yu'un te Jehová, ma me x'ilinat yu'un teme ya stsitsat;

¹² como te Jehová ya stojobtes te mach'a c'ux ta yo'tan, hich te bin ut'il tatil ya stojobtes te snich'an te buen lec yo'tan yu'un.

¹³ Bayel yutsil te mach'a ya sta sp'ijil yo'tan, te mach'a ya sta te bin ay ta na'el,

¹⁴ como te bin ya sta a c'ax hich a te bin ut'il plata, te sit c'ax hich a te bin ut'il lequil oro.

¹⁵ C'ax hich yutsil a te bin ut'il t'ujbil tonetic; spisil bintic ya sc'an awo'tan, ma pajaluc soc.

¹⁶ Ta swa'el-c'ab ya yac' naht cuxlejal, soc ta sq'uexam-c'ab ya yac' c'ulejalil soc ich'el ta muc'.

¹⁷ Te behetic yu'un, mulantic sba, spisil te behetic yu'un ha lamal-o'tanil.

¹⁸ Ha te' yu'un cuxlejal ya xc'oht yu'un te mach'a ya yich'; bayel yutsil te mach'atic ya sq'uejic.

¹⁹ Te Jehová ta scuenta sp'ijil yo'tan la ya'be yich'o-ip te bahlumilal, la yac' ayinuc te ch'ulchan ta scuenta bin sna'oj.

²⁰ Ta scuenta bin sna'oj cha'tahl loc' yu'un a te sc'ubulil mar, soc te tocaletic la yaq'uic cohuc tal ts'ujul.

²¹ Jnich'an, ma me xawihquitay te bintic ay ini: canantaya te p'ijil-o'tanil soc te stsahtayel;

²² ha ya ya'bat acuxlejal soc ha me sch'ahlel anuc' ya xc'oht.

²³ Hich me jun awo'tan ya xbehenat bahel, soc ma ba yac ac'ohchin awoc.

²⁴ Te c'alal ya xwayat, ma ba ya xiwat; te c'alal yac amehtsan aba, buhts'an te awayele.

²⁵ Ma ba yac axi' jinel te ora nax ya xtal o te jinel ya xtal ta stojol te mach'atic chopolic,

²⁶ como ha ya smuc'ulin awo'tan te Jehová soc ma ba ya yac' te ya x'ochat ta yaquil.

²⁷ Ma me xacom aba ta spasel te bin lec ta pasel ta stojol te mach'a hich ya sc'an pasbeyel, teme ya xhu' awu'un spasele.

²⁸ Ma me hichuc xawalbe te apat-axuhc: Bahan, suhtan bahel, pajel to ya ca'bat, ma me xchihucat, teme ay awu'un te bin yac awa'be.

²⁹ Ma me xachap bin chopol ta stojol apat-axuhc te jun yo'tan nahinem ta sts'ehl ana.

³⁰ Ma me ayuc mach'a tojol nax yac atsac aba ta c'op soc, teme mayuc bin chopol spasbeyejat.

³¹ Ma me xabic'tal-o'tantay te j'uts'inwanej, soc ma me xat'umbe te behetic yu'un.

³² Como Jehová ya yihlay te mach'a chopol yo'tan, pero jun yo'tan sba soc te mach'atic toj yo'tan.

³³ Chopol sc'oblal yu'un Jehová te sna te mach'a chopol yo'tan, pero ya ya'be bendición te sna mach'a toj yo'tan.

³⁴ Ya slaban te jlabanwanejetc, soc ya sc'uxultay te mach'atic peq'uel yo'tanique.

³⁵ Te mach'atic p'ij yo'tanic ya x'ich'otic ta muc', yan te mach'atic ma sna'ic q'uinal ma x'ich'otic ta cuenta stuquel.