Proverbios 24 - Bible in Tzeltal Bachajón

¹ Ma me xbic'taj awo'tan yu'un te mach'atic chopolic, soc ma me xamulan te yac ajoquine;

² como ha nax ya snop ta yo'tanic uts'inwanej, soc ya yalic spasel bintic chopol.

- 20 -

³ Ta scuenta p'ijil-o'tanil ya yich' pasel te nahe, ya x'ipaj ta scuenta sna'beyel scuentahil;

⁴ ta scuenta bin ay ta na'el ya yich' nojesel te stsalul na ta bintic lec soc te mulambil.

- 21 -

⁵ Te mach'a ay sp'ijil, ay bayel yip, te mach'a ay bin ya sna' ya yich' xan yip;

⁶ como ta scuenta lequil j'ac'-o'tanil yac apas guerra, soc ta scuenta tsobol j'ac'-o'taniletic ya xhu' te tsalawe.

- 22 -

⁷ C'ax toyol ay te p'ijil-o'tanil yu'un te mach'a ma sna' q'uinal, ta yochibal te pueblo mayuc bin ya yal tey a.

- 23 -

⁸ Te mach'a ya snop spasel te bin chopol, ya xhalot sc'oblal te ma ba lec te bin snopoj.

⁹ Ha mulil te bin chapal ta yo'tan te mach'a ma sna' q'uinal, soc ya xp'ajot te jlabanwanejetique.

- 24 -

¹⁰ Teme ya xpehc'aj awo'tan te c'alal ay awocol, mayuc bayel awip.

- 25 -

¹¹ Coltaya te mach'atic ic'biliquix bahel ta lajel; coma te mach'atic yaquic ta bahel ta lajel.

¹² Teme yac awal: Ma ba la jna'cotic, teme xchihate, ¿yu'un bal ma ba ya sna' te mach'a ya yil o'tanil? Te mach'a ya scanantaybat acuxlejal ya me sna', ya me ya'be stoj jujutuhl ha chican bin yilel te ya'tele.

- 26 -

¹³ Jnich'an, lo'an te chab como lec; te schabul te chab buhts'an yac awa'iy.

¹⁴ Hich ay schi'il yac awa'iy te p'ijil-o'tanil; teme la atahe, lec ya xc'ohat a, soc mayuc bin ora ya xlaj sc'oblal te bin yac amahlibele.

- 27 -

¹⁵ Ha'at te chopol awo'tan, ma me xamacliy ta sna te mach'a toj yo'tan, ma me xapojbe sbiluc te banti nahinem;

¹⁶ como aunque ya xyahl huqueb buelta te mach'a toj yo'tan, ya xcha'hahch xan, yan te mach'a chopol ya xcoh bahel ta stojol bin chopol.

- 28 -

¹⁷ C'alal ya xyahl te acontra, ma me tse'eluc awo'tan yu'un, ma me tse'eluc awo'tan yu'un te c'alal ya sc'ohchin yoc,

¹⁸ como ya me yil te Jehová, ma ba lec yo'tan yu'un, hich ya xlahmaj yilimba ta stojol te acontrahe.

- 29 -

¹⁹ Ma me xc'opoj awo'tan yu'un te mach'atic chopolic soc ma me xati'ti'o'tantay te mach'atic chopolic,

²⁰ como te mach'a chopol, ma ba lec ya xc'oht ta loq'uel, ya xtup' te stsumbil c'ahc' yu'un te mach'atic chopolic.

- 30 -

²¹ Jnich'an, ich'a ta muc' te Jehová soc te ajwalil, ma me xajoquin te jtoybahetique,

²² como biluc ora ya xtal sjinelic, soc ¿mach'a ya xhu' yu'un sna'el bin a te jinel te ya yaq'uique?

Yan tsahbil c'opetic yu'un mach'atic ay sp'ijilic

²³ Ha nix tsahbil c'opetic ini yu'un te mach'atic ay sp'ijil yo'tanic: Ma lecuc teme tsahbil nax mach'a ya x'ich'ot ta cuenta ta chahpajibal.

²⁴ Te mach'a hich ya yalbe te mach'a chopol: Mayuc amul, te xchihe, ya xhalot chopol sc'oblal yu'un te pueblohetic soc ya me x'ihlayot yu'un te nacionetique.

²⁵ Pero te mach'atic ya ya'be castigo, lec ya xc'ohtic yu'un, ya me xc'oht bayel bendición ta stojolic.

²⁶ Te mach'a ya sna' sutel ta lec te c'ope, hich ay te bin ut'il ya x'uhts'uybot ye.

²⁷ Nahil xachahpan awa'tel, pasa awa'tel ta aq'uinal; patil yac apas ana.

²⁸ Ma me xatojol lehbe smul apat-axuhc, ma me xawa'iy lot.

²⁹ Ma me hichuc xawal: Hich nix ya jpasbe te bin la spasbon; hich nix ya ca'be stoj te bin la spas, ma me xchihucat.

³⁰ C'axon ta sq'uinal te ch'ajil winic, tey ta sts'usubil te mach'a mayuc snopojibal yu'un;

³¹ la jquil te nojel ta ch'ixetic, mucul ta ha'mal, soc hemts'ujem te ton joybil a.

³² La jcac' ta co'tan te bin la jquile, ay bin la jnop yu'un te bin la jquil:

³³ Jts'ihn nax wayel, jts'ihn nax cux-o'tan, jts'ihn nax yac apet ac'ab yu'un cux-o'tanil,

³⁴ hich ya xtal te apobrehil te bin ut'il jbehyom, hich te bin ut'il j'elec' te ay ya'tejib yu'un milaw.