Proverbios 23 - Bible in Tzeltal Bachajón

¹ Te c'alal ya xhuhcajat ta we'el soc te mach'a ay sc'oblal, tsahtaya me ta lec te bin ay ta atojol.

² Ac'a cuchillo ta anuc' teme c'ahyemat te bayel ya xwe'at.

³ Ma me xbic'taj awo'tan yu'un te lequil we'elil yu'un, como ha we'elil te ya xlo'loywan.

- 7 -

⁴ Ma me xc'ax awocol ta slehel te ya xc'ulejubat: p'ijan me, coma aba.

⁵ Teme yac awac' asit ta stojol te c'ulejalil, ya xan awil, mayuquix a. Ya xloc' xic' hich te bin ut'il jxic, ya xwihl bahel c'alal ta ch'ulchan.

- 8 -

⁶ Ma me xwe'at soc te mach'a ay st'ut'il, ma me xbic'taj awo'tan yu'un te lequil we'elil yu'un;

⁷ como te bin snopoj ta yo'tan, hich ay te stalele. We'an, uch'an, xchi, pero ma ba ayat ta yo'tan.

⁸ Ya me axehtay te bin la awe', soc tojol ya xc'oht te bin t'ujbil la awalbe.

- 9 -

⁹ Ma me xc'opojat ta schiquin te mach'a ma sna' q'uinal, como ya me sp'ajbe sp'ijil te c'opetic awu'une.

- 10 -

¹⁰ Ma me xajeltaybe yawil te antiguo mojon, soc ma me xapojbe sq'uinalic te me'ba'etic,

¹¹ como ay bayel yu'el te Mach'a ya xc'opoj yu'unic; ya me scontrahinat ta scoltayel te me'ba'etique.

- 11 -

¹² Ac'a awo'tan ta nohptesel soc ac'a achiquin ta p'ijil c'opetic.

- 12 -

¹³ Ma me xacom aba ta stojobtesel te ach'ix-querem; teme yac awa'be xul, ma ba ya xcham yu'un.

¹⁴ A'beya xul, hich yac acoltaybe sch'uhlel te ma ba ya xbaht ta yawil mach'atic chamenic.

- 13 -

¹⁵ Jnich'an, teme ay sp'ijil awo'tan, mero tse'el co'tan yu'un;

¹⁶ bayel yutsil q'uinal ya ca'iy te c'alal stojil ya xc'opojat.

- 14 -

¹⁷ Ma me xati'ti'o'tantay te jmulawiletic, pero spisil ora xi'a me te Jehová.

¹⁸ Como lec me ya xc'ohat yu'un, soc ma ba ya xlaj sc'oblal te bin yac amahlibel.

- 15 -

¹⁹ A'iya me awa'iy, jnich'an, p'ijan me, ac'a awo'tan ta st'unel te lequil be.

²⁰ Ma me xajoquin te mach'atic bayel ya yuch'ic vino, o te mach'atic bayel ya swe'ic ti'bal,

²¹ como te jyacubeletic soc te mach'atic bayel ya xwe'ic ya me xpobrehubic, soc bayel te wayele ya yac' ta lapel lohmen c'u'uletic.

- 16 -

²² A'iybeya sc'op te atat te la snich'antayat; soc ma me xap'aj te anan te c'alal me'elix a.

²³ Mana te bin smelelil, ma me xachon; mana p'ijil-o'tanil, nohptesel soc sna'beyel scuentahil.

²⁴ Bayel stse'elil yo'tan te stat te mach'a toj yo'tan; te mach'a ya snich'antay te mach'a ay sp'ijil yo'tan, tse'el yo'tan yu'un.

²⁵ ¡A'beya stse'elil yo'tanic te ame'atat! ¡Ayuc me stse'elil yo'tan te mach'a la yayintesat!

- 17 -

²⁶ Jnich'an, a'bon awo'tan, ilbon te behetic cu'une.

²⁷ Como ha c'ubul hotbil ch'en te j'antsinel-ants, soc te yan ants pajal soc c'ubul hotbil ch'en te tut nax sti'ile.

²⁸ Hich ya xpac'muhcultaywan te bin ut'il j'elec', soc ya yac' p'ohluc te winiquetic te ma junuc yo'tanique.

- 18 -

²⁹ ¿Mach'a ay ta wocol? ¿Mach'a ay ta mel-o'tan? ¿Mach'a ay c'op yu'un? ¿Mach'a yac ta ahcan yu'un wocol? ¿Mach'a yich'oj tojol ehchentesel? ¿Mach'a tsajuben sit?

³⁰ Ha te mach'atic ya xhalajic ta yuch'el vino, te mach'atic ya spasic prueba yuch'el capbil vino.

³¹ Ma me xawilbe stsajal te vino, te c'alal xlipet ta copa yilel soc buhts'an ya xco bahel.

³² Pero ta slajibal hich ya xti'awan te bin ut'il chan, hich sc'uxul te bin ut'il sti'aw-chan.

³³ Ay bintic jchahp yac awilticlan ta asit, soc ay bin chopol ya yal te awo'tane.

³⁴ Hich yac awa'iy aba te wayalat ta mar, te metselat ta sni'il te ste'el spac'al te barco.

³⁵ Hich yac awal: La smajonic, pero ma ba c'ux la jca'iy. La smajonic, pero ma ba la jca'iy. C'alal cux co'tan, ya jle xan yan, xchihat.