Proverbios 22 - Bible in Tzeltal Bachajón

¹ Ha lec xan te lec c'oblalil te bin ut'il bayel c'ulejalil; ha lec xan te lequil c'oblalil te bin ut'il plata o te oro.

² Te jc'ulej soc te pobre junax sc'oblalic: ta schebalic pasbilic yu'un Jehová.

³ Te mach'a p'ij yo'tan ya yil te bin chopol, ya snac' sba ta stojol, yan te mach'a ma p'ijuc yo'tan ya xc'ax xan bahel, ya xc'ax swocol yu'un.

⁴ Te c'ulejalil, ich'el ta muc', soc te cuxlejal, ha mahtanil yu'un peq'uel-o'tanil soc xi'el te Jehová.

⁵ Ay ch'ixetic soc yaquiletic ta sbe te mach'a chopol; pero te mach'a ya scanantay sba soc scuxlejal q'uejel ya yac' sba ta stojolic.

⁶ Nohptesa te alal ta stojil be, aunque mamalix, ma ba ya yihquitay hilel.

⁷ Te jc'ulej ya ya'batin te pobre, soc te mach'a ay bin ya smajan, ha a'bat ya xc'oht yu'un te mach'a la yac' ta majanel.

⁸ Te mach'a ya sts'un te bin chopol ha nix ya stsobe sit te bin chopole, soc ya me xlaj te sbastón te sc'ahc'al yo'tan.

⁹ Te mach'a ya x'ilawan soc sc'uxul yo'tan ya x'a'bot bendición, como ya ya'be swe'el te pobre.

¹⁰ Teme ya yich' loq'uesel te jlabanwanej, ya xloc' bahel te jach-c'op, soc ya xlahmaj c'op soc te labanwaneje.

¹¹ Te mach'a ya smulan te sac yo'tan soc te yutsil sc'op, ha amigo ya xc'oht yu'un te ajwalile.

¹² Te sit te Jehová ya scanantay te bin ay ta na'el, pero ya sjimbe sc'op te mach'a ma junuc yo'tan.

¹³ Hich ya yal te mach'a ch'aj: ¡Ay choj ta fuera! ¡Ya xlajon ta calle! xchi.

¹⁴ Te ye te jmulawil ants ha c'ubul hotbil ch'en c'ohem; ya xch'ay cohel tey a te mach'a ilinem Jehová ta stojol.

¹⁵ Te sonsohil ay ta yo'tan te ach'ix-querem, ta scuenta majel ta xul ya x'ihquitayot hilel yu'un.

¹⁶ Te mach'a ya yuts'in te pobre yu'un sp'ohltesel sc'ulejal, o te ya smahtantes te jc'ulej, ya me xpobrehub.

Tsahbil c'opetic yu'un mach'atic ay sp'ijilic

¹⁷ Ts'ehana achiquin, a'iybeya awa'iy sc'opic te mach'atic ay sp'ijilic; ac'a ta awo'tan te bin ya ca'bat anop,

¹⁸ como yac amulan teme yac aq'uej ta awo'tan soc teme pajal yac awal ta awe.

¹⁹ Scuenta yu'un ha ya smuc'ulin awo'tan te Jehová, yo'tic ya ca'bat ana'.

²⁰ ¿Ma bal lajuc jts'ihbabat lajuneb scha'winic (30) tsahbil c'opetic te ha j'ac'-o'tanil soc te bin ay ta na'el,

²¹ yu'un ya ca'bat ana' te ha melel te smelelil c'op, scuenta yu'un yac asutbe smelelil c'op te mach'atic la sticonat tale?

- 1 -

²² Ma me xawelc'an te pobre ta scaj te ha pobre, soc ma me xaten ta c'op ta yochibal te pueblo te mach'a mayuc bin ay yu'un,

²³ como ya me xcoltayot yu'un te Jehová, ya me sloq'uesbe scuxlejal te mach'a ya yuts'in te pobrehetique.

- 2 -

²⁴ Ma me junuc awo'tan soc te mach'a ora ya x'ilin, ma me xajoquin te mach'a ay yilimba,

²⁵ teme repente yac anopbe stalel, hich yac achuc aba a.

- 3 -

²⁶ Ma me hichucat te mach'a ay bin ya yac' sba a, te ya stehc'an sba ta majan yu'un yan.

²⁷ Teme mayuc bin ay awu'un yac atoj a, ¿bin yu'un yac awac' te ya yich'bat awayib?

- 4 -

²⁸ Ma me xajeltaybe yawil te antiguo mojon te la schahpan hilel te ame'atate.

- 5 -

²⁹ ¿Ay bal awiloj te mach'a lec te ya'tele? Ya me xc'oht ta stojol ajwaliletic, ma ha'uc ya x'a'tej ta stojol te mach'atic peq'uelique.