Proverbios 21 - Bible in Tzeltal Bachajón

¹ Te yo'tan te ajwalil hich ay te bin ut'il be-ha' ta sc'ab Jehová, ha ya stojobtes bahel chican bin ya sc'an yo'tan stuquel.

² Spisil te behetic yu'un te winic ya scuy ta toj, pero te Jehová ya xna'bot yo'tan yu'un stuquel.

³ Te spasel bintic toj soc lec, ha lec xan ya ya'iy a te Jehová te bin ut'il yaq'uel milbil mahtanil.

⁴ Te toyba sitil soc te toyba-o'tanil, te snopojibal yu'un te mach'atic chopolic, ha mulil.

⁵ Te bintic chahpambil te nopbil ta lec, ya yac' te ay bintic ya yich' tahel a, pero spisil te bin ahnimal chahpambil ya yac' pobrehil.

⁶ Stsobel c'ulejalil ta scuenta lo'loywanej, ha sahb ehal te ma xhalaj soc ha yaquil te ya xlajinwan.

⁷ Te uts'inel yu'un te mach'atic chopolic, ha nix ya xjihnotic yu'un, como ma ba la sc'an ya spasic te bin toj ta pasele.

⁸ Ma tojuc te be yu'un te mach'a ay smul, yan te bintic ya spas te mach'a mayuc smul ha toj stuquel.

⁹ Ha lec xan nahinel ta xuhc ba na te bin ut'il sjoquinel ta muc'ul na te ants te bayel ya x'utawan.

¹⁰ Te mach'a chopol yo'tan ha nax ya sc'an te bintic chopol; te spat-xuhc ma ba ya xc'uxultayot yu'un.

¹¹ Te c'alal ya yich' castigo te jlabanwanej, hich ya xp'ijub a te mach'a ma sna' q'uinal; c'alal ya yich' tsitsel te mach'a p'ij yo'tan, ya snop xan te bin ay ta na'ele.

¹² Te mach'a toj yo'tan ya tsahtaybe sna te mach'a chopol yo'tan, ya yac' ta jinel te mach'atic chopolic.

¹³ Te mach'a ma xya'iybe yaw te pobre, ha nix hich ma x'a'iybot te c'alal ya x'awone.

¹⁴ Te mahtanil ya yich' aq'uel ta muquen ya slahmajtes ilimba, te mahtanil te muquen ay, ya slahmajtes tulan ilimba.

¹⁵ Te stojil chahpanel, tse'el yo'tan yu'un te mach'a toj yo'tan, pero ya ya'be xiwel te mach'atic chopol ya'telic.

¹⁶ Te winic te ya yihquitay hilel te be yu'un p'ijil-o'tanil ya xc'oht sjoquin te mach'atic chamenic.

¹⁷ Te mach'a ya smulan te bintic mulantic sba, pobre ya xc'oht; te mach'a ya smulan te vino soc te perfumehetic ma ba ya xc'ulejub.

¹⁸ Te mach'a chopol ha sjelol scuenta colel ya xc'oht yu'un te mach'a toj bin ya spas, soc te j'ac'aw ta c'abal ha sjelol ya xc'oht te mach'a toj yo'tan.

¹⁹ Ha lec xan nahinel ta jochol taquin q'uinal te bin ut'il nahinel soc jtuhl ants te hach-c'op soc te ya x'iline.

²⁰ Ta sna te mach'a p'ij yo'tan ay c'ulejalil soc aceite, yan te mach'a ma sna' q'uinal spisil ya slajin te bintic ay yu'un.

²¹ Te mach'a ya st'un te bin toj ta pasel soc te c'uxultaywanej ya sta scuxlejal, te bin toj ta pasel, soc ich'el ta muc'.

²² Te mach'a p'ij yo'tan ya scontrahin te pueblo yu'un te mach'atic ay yipic, ya sjimbe cohel te bin smuc'ulinej yo'tanic.

²³ Te mach'a ya stsahtay bin ya yal ya scoltay sba ta bayel wocol.

²⁴ Ha jlabanwanej sbihil te mach'a ya stoy sba te ya spas te bin scuenta toybahil.

²⁵ Te mach'a ch'aj, ya xmilot yu'un te bin ya sc'an yo'tan, como ma sc'an a'tel te sc'abe.

²⁶ Sjunal c'ahc'al ya xbic'taj yo'tan, yan te mach'a toj yo'tan ma p'isbiluc ya yac' stuquel.

²⁷ Ihlaybil te milbil mahtanil ya yac' te mach'atic chopolic, c'ax to xan hich a teme chopol bin snopoj ta yo'tan a te ya yaq'ue.

²⁸ Te lotil testigo ya me xch'ay bahel, pero te mach'a ya ya'iy schiquin, ya xhu' yu'un sjaq'uel.

²⁹ Te mach'a chopol yo'tan tulan ya yac' sba, yan te mach'a toj yo'tan ya stsahtay te be yu'une.

³⁰ Mayuc p'ijil-o'tanil, snopojibal, o j'ac'-o'tanil te ya xhu' ya scontrahin te Jehová.

³¹ Ya yich' chahpanel te cawu ta yorahil guerra, pero ha te Jehová te ya yac' ta tsalaw.