Proverbios 18 - Bible in Tzeltal Bachajón

¹ Te mach'a t'ut' ha nax ya sle te bin ya sc'an yo'tan stuquel, soc ya scontrahin spisil lequil tojobtesel.

² Te mach'a ma sna' q'uinal ma smulan stsahtayel te bin ay ta na'el, ha ya smulan ya yac' ta na'el bin ay ta yo'tan stuquel.

³ C'alal ya xtal te bin chopol, ha nix hich ya xtal te bin p'ajbil, c'alal ya xtal q'uexlal, ha nix hich ya xch'ay te ich'el ta muc'.

⁴ Te sc'op te winic, ha c'ubul ha' c'ohem; te sloq'uib-ha' yu'un p'ijil-o'tanil, ha uc'um te ya x'oquin bahel.

⁵ Ma lecuc te lec awo'tan yu'un te mach'a chopol, soc sch'aybeyel te bin toj ta pasel ta stojol te mach'a mayuc smul.

⁶ Te sc'op te mach'a ma sna' q'uinal ya yac' hahchuc c'op, soc te bin ya yal ta ye ha ya yic' tal majel ta xul.

⁷ Te ye te mach'a ma sna' q'uinal ha nix ya xjihnot yu'un; ta scaj sc'op ha nix ya syac sba.

⁸ Te sc'op te lehaw ta c'op hich ay te bin ut'il c'unil we'elil; ya xc'ub bahel c'alal ta yutil sbaq'uetal.

⁹ Te mach'a ma spas te ya'tel, ha yermano sba soc te mach'a ya xjinawan.

¹⁰ Ha toyol ts'ahc te sbihil te Jehová; tey ya x'ahnimaj bahel a te mach'a toj yo'tan soc hich ya xcol.

¹¹ Te sc'ulejal te jc'ulej ha pueblo yu'un c'ohem te joytaybil ta ts'ahc; hich c'ohem ta yo'tan te ha toyol sts'ahc te ya xcanantayot yu'une.

¹² Stoyoj sba te winic te c'alal ma to ba pehc'ambil, pero nahil ay te peq'uel-o'tanil, patil te ich'el ta muc'.

¹³ Te mach'a nahil ya sjac' te ma ba ya'iyej ta lec, ma sna' q'uinal soc q'uexlaltic sba.

¹⁴ Te yip yo'tan te winic ya yac' te ya xcuhch yu'un te schamel, pero ¿mach'a ya xcuhch yu'un te pich'il-o'tanile?

¹⁵ Te yo'tan te mach'a p'ij yo'tan ya sta xan sp'ijil; te schiquin te mach'a p'ij, ya sle te bintic ay ta na'el.

¹⁶ Te mahtanil ya sjam te sbe te winique soc ya x'ic'ot ochel yu'un ta stojol te mach'a ay sc'oblale.

¹⁷ Te mach'a nahil ya scoltay sba ta c'op, hich ya'iyel te toj ay, ha to c'alal ya xtal yan te ya sjoc'obe ta lec.

¹⁸ Te spasel seña ta na'el ya yac' lahmajuc te c'ope, soc ya schahpan te c'op yu'un te mach'atic tulan scontrahinej sbahique.

¹⁹ Te mach'a il-o'tantayot yu'un yermano c'ax hich stulanil yo'tan a te bin ut'il jun pueblo te joytaybil ta ts'ahc, soc te c'op ta yohlil mach'atic yermano sbahic hich ay te bin ut'il sc'atal te'etic yu'un muc'ul na.

²⁰ Te sit te bin ya xloc' ta ye te winic ya xnoj sch'uht yu'un; tic' ya xnoj sch'uht yu'un a te bin ya yale.

²¹ Te lajel soc te cuxlejal ayic ta scuenta te yaq'ue; te mach'a ya smulan te bayel ya xc'opoj, ya me swe'be te site.

²² Te mach'a ya sta yihnam ha ya sta te bin lec soc ya sta c'uxultayel yu'un Dios.

²³ Te pobre xbic'talti'ij ya xc'opoj, yan te jc'ulej tulan ya sut te c'ope.

²⁴ Ay mach'atic te jun yo'tan sbahic te ya xjihnawanic, soc ay mach'atic te c'ax hich jun yo'tan sbahic te bin ut'il te mach'a jun sme'stat soque.