Proverbios 14 - Bible in Tzeltal Bachajón

¹ Te p'ijil ants ya spas sna, yan te ants ma sna' q'uinal, ha nix ya sjihn ta sc'ab.

² Te mach'a toj ya xbehen, ya xi' te Jehová, yan te mach'a chopol sbe, ha ya sp'aj.

³ Te bin ya yal te mach'a ma sna' q'uinal, ha xul ya xc'oht yu'un ta spat, yan te mach'a p'ij yo'tan ya xcanantayot yu'un te sc'ope.

⁴ Mayuc trigo ta banti mayuc j'a'tel-wacax, ay bayel we'elil ta scuenta yip te j'a'tel-wacaxe.

⁵ Te mach'a testigo ta melel, ma xya'iy lot, yan te lotil testigo ya yal lot stuquel.

⁶ Te jlabanwanej ya sle p'ijil-o'tanil, pero ma ba ya sta ta lehel, yan te mach'a ya sna' q'uinal, ma ba wocol ya sta te p'ijil-o'tanile.

⁷ Loc'an ta stojol te mach'a ma sna' q'uinal, como ma ba yac ata ta ye te bin ay ta na'el.

⁸ Te p'ijil-o'tanil yu'un te mach'a p'ij, ha te ya stsahtay te behetic yu'un, pero te tojol c'op yu'un te mach'a ma sna' q'uinal, ya xlo'loywan.

⁹ Te mach'atic ma sna'ic q'uinal, ya slabanic te mulile, pero ta yohlil te mach'atic toj yo'tanic ay yutsil-o'tanil tey a.

¹⁰ Te o'tanil sna'oj stuquel te bin c'ux ya ya'iy, soc mayuc yan mach'a ya ya'iybe te yutsil q'uinal ya ya'iye.

¹¹ Ya xjimbot snahic te mach'atic chopol yo'tanic; yan te snahilpac' te mach'atic toj yo'tanic, ya xp'ohl bintic ay yu'un.

¹² Ay be te scuyoj te toj ya yil te winique, pero ya xc'oht ta loq'uel ta lajel.

¹³ Aunque ay ta tse'ej, ay wan bin c'ux ya ya'iy ta yo'tan, te yutsil q'uinal ya xhu' ya sutp'ij ta mel-o'tan.

¹⁴ Te mach'a ma sna' q'uinal, ya me yich' stojol te bin ya spas, yan te mach'a lec stalel, ya me yich' smahtan yu'un te ya'tele.

¹⁵ Te mach'a ma sna' q'uinal spisil ya sch'uhun, yan te mach'a p'ij yo'tan ya stsahtay te banti ya xbehene.

¹⁶ Te mach'a p'ij yo'tan ya xi' te bin chopol, ya sq'uej sba ta stojol, yan te mach'a ma sna' q'uinal ya stoy sba soc ma ba ya stsahtay sba.

¹⁷ Te mach'a ora nax ya x'ilin ya spas te bin scuenta sonso, te mach'a ya snop bin chopol, ya x'ihlayot.

¹⁸ Te mach'atic mayuc sp'ijilic ya yich'ic bin scuenta sonso, yan te mach'atic p'ij yo'tanic ya x'a'bot scoronahinic te p'ijil-o'tanil.

¹⁹ Te mach'atic chopol yo'tanic ya me squejan sbahic ta stojol te mach'atic lec yo'tanic, te mach'atic chopol yo'tanic ya me squejan sbahic ta sti'il sna te mach'atic toj yo'tanic.

²⁰ Te pobre ya x'ihlayot yu'un spat-xuhc, pero ay tsobolic te c'ux ya ya'iy ta yo'tanic te jc'uleje.

²¹ Ha stahoj smul te mach'a ya sp'aj te spat-xuhc, pero bayel yutsil te mach'a ya sc'uxultay te pobre.

²² ¿Ma bal yacuc xhowiyic te mach'atic chopol bin ya snopic? yan te mach'atic ya snopic te bin lec, ya me stahic c'uxultayel soc te bin melele.

²³ Ta spisil te a'tel ay bin ya xloc' a, yan te tojol c'op ya yac' pobrehil.

²⁴ Te mach'a p'ij yo'tan, ha scorona te sc'ulejal; ha sonso te sonsohil te mach'a ma sna' q'uinal.

²⁵ Te mach'a testigo ta melel, ya scoltaybe scuxlejal yantic; yan te lotil testigo ya ya'iy lot.

²⁶ Te xi'el te Jehová tey ay a te yip te muc'ul-o'tanil, soc ha ahnibal ya xc'oht yu'un te yal-snich'nab.

²⁷ Te xi'el te Jehová, ha sloq'uib-ha' yu'un cuxlejal te ya sloq'ues ta stojol te yaquil yu'un lajel.

²⁸ Te yutsilal te ajwalil, ha te tsobol ants-winiquetic, teme mayuc tsobol, mayuc yip ya xc'oht te snich'an ajwalil.

²⁹ Te mach'a ma orahuc ya x'ilin, ya sna' q'uinal ta lec; yan te mach'a ma xcuhch yu'un, ya yac' ta ilel te ma sna' q'uinal.

³⁰ Te lamal-o'tanil ya ya'be scuxlejal te baq'uet, yan te bic'tal-o'tanil ya yac' joch'obuc te baquetic.

³¹ Te mach'a ya yuts'in te pobre ya yil-o'tantay te Jpaswanej yu'une, yan teme ya sc'uxultay te pobre ya yich' ta muc' te Jpaswanej.

³² Te mach'a chopol yo'tan, ha nix ya xjihnot yu'un te schopolile, yan te mach'a toj yo'tan ha ahnibal yu'un te bin ut'il jun nax te yo'tane.

³³ Te p'ijil-o'tanil ya x'ayin ta yo'tan te mach'a ya sna' q'uinal, yan te mach'atic ma sna'ic q'uinal, ma sna'beyic sba.

³⁴ Te bin stojil ta pasel ha ya stoybe sc'oblal te nación, yan te mulil ya yac' ta q'uexlal te nacionetique.

³⁵ Te ajwalil ay yutsil yo'tan ta stojol te a'bat ya sna' q'uinal, pero ya yilintay te mach'a ya x'ac'ot ta q'uexlal yu'une.