Proverbios 13 - Bible in Tzeltal Bachajón

¹ Te querem te p'ij yo'tan ya sch'uhun te tojobtesel yu'un te state, yan te mach'a jlabanwanej ma xyich' ta cuenta te tsitsele.

² Ta scuenta bin ya yal, hich ya swe' te bin lec te winique, pero te mach'a j'uts'inwanej ya me sta te bin chopole.

³ Te mach'a ya stsahtay bin ya yal, ha nix ya scanantay te scuxlejal, yan te mach'a bayel ya xc'opoj, ya xjihnot yu'un.

⁴ Te mach'a ch'aj, ay bin ya sc'an, pero mayuc bin ya sta, yan te mach'atic ya ya'telinic bin ya sc'an pasel, ya xp'ohl bintic ay yu'unic.

⁵ Te mach'a toj yo'tan ya yihlay te bin ma meleluc, yan te mach'a chopol ya yac' q'uexlal soc ma x'ich'ot ta cuenta.

⁶ Te bin toj ta pasel ha ya scanantay te mach'a toj te be yu'une, yan te bin chopol ya sjin te jmulawile.

⁷ Ay mach'atic ya scuy sbahic ta jc'ulejetic, pero mayuc bin ay yu'unic; ay yantic ya scuy sbahic ta pobre, pero bayel sc'ulejalic.

⁸ Te sc'ulejal te winic ya scoltay te scuxlejal a, yan te pobre ma xya'iy te ya xhalbot smilel.

⁹ Te sacal q'uinal yu'un te mach'a toj yo'tan ya yac' tse'el-o'tanil, pero ya xtup' te tsumbil c'ahc' yu'un te mach'atic chopolic.

¹⁰ Ya shach c'op te toybahil, pero te p'ijil-o'tanil ay ta stojol te mach'atic ya sch'uhunic tojobtesel.

¹¹ Te c'ulejalil te ma lecuc tahbil, ya xpehc'aj bahel, yan te mach'a c'unc'un ya stsob, ya xmuc'ub bahel yu'un.

¹² Teme ma xtal te bin ay ta mahliyel, ya xwocolij o'tanil yu'un, yan teme ya xc'oht ta pasel te bin la sc'an yo'tan, ha te' scuenta cuxlejal.

¹³ Te mach'a ya sp'aj nohptesel, ya me x'a'bot stoj yu'un, yan te mach'a ya yich' ta cuenta te mandar, ay bin ya sta yu'un.

¹⁴ Te nohptesel yu'un te mach'a ay sp'ijil, ha sloq'uib-ha' yu'un cuxlejal, ya yac' ta libre ta chuquel yu'un te lajele.

¹⁵ Te lequil snopojibal ya yac' lec-o'tanil, pero te be yu'un te jc'axun-c'opetic, ha wocol.

¹⁶ Spisil te mach'atic p'ij yo'tanic ya x'a'tejic soc sp'ijil yo'tanic, yan te mach'a ma sna' q'uinal, ya yac' ta ilel te ma sna' q'uinal.

¹⁷ Te hal-c'op te chopol yo'tan, ya yac' wocol, yan te hal-c'op te jun yo'tan, ya yac' lecubuc te q'uinale.

¹⁸ Te mach'a ya sp'aj te tojobtesel, pobre ya xc'oht soc ya sta q'uexlal, yan te mach'a ya sch'uhun te tojobtesel, ya me x'ich'ot ta muc'.

¹⁹ Teme ya xc'oht ta pasel te bin la sc'an yo'tan, tse'el sch'uhlel yu'un, yan te mach'atic ma sna'ic q'uinal, ya sp'ajic te ya yihquitayic hilel te bin chopole.

²⁰ Te mach'a ya sjoquin te mach'atic p'ij yo'tanic, ha nix hich p'ij ya xc'oht, yan te mach'a ya sjoquin te mach'atic ma sna'ic q'uinal, ya me sta swocol.

²¹ Te bin chopol ha ya snuts te jmulawiletique, yan te mach'atic toj yo'tanic ya x'a'botic smahtanin te bin leque.

²² Te mach'a lec yo'tan ya yihquitaybe hilel smamatac te bin ay yu'un, yan te sc'ulejal te jmulawil, q'uejbil yu'un ha ya yich' te mach'a toj yo'tane.

²³ Ta sq'uinal te pobre ya yac' bayel we'elil, pero ya xch'ay ta scaj te mayuc toj chahpanel.

²⁴ Te mach'a ma ba ya stojobtes te snich'ane, ha ya sp'aj, yan te mach'a c'ux ta yo'tan te snich'ane, ya stojobtes ta ora.

²⁵ Te mach'a toj yo'tan ya xwe' ha to banti c'alal ya sc'an yo'tan, yan te sch'uht te mach'atic chopol yo'tanic, jochol ya xhil.