Proverbios 12 - Bible in Tzeltal Bachajón

¹ Te mach'a c'ux ta yo'tan te tojobtesel, c'ux ta yo'tan te p'ijil-o'tanil, yan te mach'a ya sp'aj te tsitsel ma sna' q'uinal.

² Te mach'a lec yo'tan, ya sta lec sc'oblal yu'un Jehová, pero ha ya yalbe smul te mach'a chopol bintic snopoj.

³ Ma xhu' ya yich' yip te winic ta scuenta spasel bin chopol, yan te slohp' te mach'a toj yo'tan, ma xhu' ta bulel.

⁴ Te ants te lec stalel, ha corona yu'un te smamalale, yan te ants te ya yac' q'uexlal, ya sjoch'obtesbe sbaquel te smamalale.

⁵ Te mach'a toj yo'tan, ha toj te bin snopoj ta yo'tan, pero ha lo'loywanej te bin ya yac' ta na'el te mach'atic chopolic.

⁶ Te sc'opic te mach'atic chopol yo'tanic ha yaquil yu'un milaw, yan te sc'op te mach'atic toj yo'tanic ya x'ac'awan ta libre.

⁷ Ya xjihnotic yu'un Dios te mach'atic chopol yo'tanic, ma ba ya xchicnajiquix, yan te sna te mach'atic toj yo'tanic, stalel ya xhil stuquel.

⁸ Te winic ay ta halbeyel yutsil sc'oblal, ha chican te sp'ijil yo'tan, pero ya x'ihlayot te mach'a bohl yo'tane.

⁹ Ha lec xan te mach'a peq'uel ay te ay a'bat yu'une, te bin ut'il mach'a scuyoj sba ta muc' pero mayuc swe'el.

¹⁰ Te mach'a toj yo'tan ya scanantay te schansbahlam, yan te yo'tan te mach'a chopol, ya x'uts'inwan.

¹¹ Te mach'a ya x'a'tej ta sq'uinal, ay me bayel we'elil yu'un, yan te mach'a ya st'un te bin ma xtuhun, mayuc sp'ijil yo'tan.

¹² Te mach'a chopol yo'tan ya xbic'taj yo'tan yu'un te yaquil yu'un te mach'atic chopol yo'tanic, yan te slohp' te mach'atic toj yo'tanic ya yac' sit stuquel.

¹³ Te mach'a chopol yo'tan, ha nix ya schuc sba ta slot; yan te mach'a toj yo'tan ya xloc' ta wocol.

¹⁴ Te winic ya xnoj ta bin lec yu'un te sit te bin ya yal, soc ya yich' stojol ha chican bin yilel ya'tel te sc'abe.

¹⁵ Te mach'a ma sna' q'uinal, ya scuy ta toj te be yu'une, yan te mach'a p'ij yo'tan, ya sch'uhun te tojobtesele.

¹⁶ Te mach'a ma sna' q'uinal, ora ya yac' ta ilel yilimba, yan te mach'a p'ij, ma xyich' ta cuenta te ixta'c'ope.

¹⁷ Te mach'a melel ya xc'opoj, ha ya yal te bin toje, yan te lotil testigo ya ya'iy lot.

¹⁸ Ay mach'a te hich ya x'ehchenteswan te bin ut'il espada te sc'opique, yan te sc'op te mach'a p'ij yo'tan ya xpoxtaywan stuquel.

¹⁹ Te mach'a melel ya xc'opoj, stalel ya xhil sbahtel q'uinal, yan te mach'a ya ya'iy lot, jts'ihn nax ay stuquel.

²⁰ Ay lo'loywanej ta yo'tanic te mach'atic chopol bin ya snopic, pero ay tse'el-o'tanil ta yo'tan te mach'a ya snop bin lec.

²¹ Ma xc'ax swocol ta stojol te mach'a toj yo'tan, yan te mach'atic chopol yo'tanic, ya x'a'bot bayel swocolic.

²² Te Jehová ya yihlay te mach'atic ya ya'iyic lot, pero lec yo'tan yu'un te mach'atic stojil bin ya spasic.

²³ Te mach'a ay sp'ijil ya smuc te bin ya sna', yan te mach'atic ma sna'ic q'uinal, ya spuquic ta halel bin ma sna'ic.

²⁴ Te mach'a ya x'a'tej, ya me xcuentahinwan, yan te mach'a ch'aj, ya xmosohinot yu'un yan.

²⁵ Te pich'il-o'tanil ya slajimbe yip yo'tan te winique, pero te lequil c'op ya yac' stse'ejinuc yo'tan.

²⁶ Te mach'a toj yo'tan ya stojobtes te spat-xuhc, pero te be yu'un te mach'atic chopol yo'tanic ya showiytes.

²⁷ Te mach'a ch'aj ni ma ba ya swo te bin stsacoje; pero te bin bayel sc'oblal ya ya'iy te winique, ha te ya ya'telin te bin ya sc'an pasele.

²⁸ Ay cuxlejal ta sbehlal te bin toj ta pasel; ta behetic yu'un mayuc lajel tey a.