Proverbios 10 - Bible in Tzeltal Bachajón

¹ Te tsahbil c'opetic yu'un Salomón: Te querem te p'ij yo'tan ya ya'be yutsil yo'tan te state, pero te querem te ma sna' q'uinal ya ya'be smel yo'tan te snane.

² Te c'ulejalil te ma stojiluc tabile, mayuc bin ya xtuhun a, yan te bin stojil ta pasel ya x'ac'awan ta libre yu'un lajel.

³ Te Jehová ma xyac' ta wocol ta wi'nal te mach'a toj yo'tan, pero ma ba ya ya'be bin ya sc'an yo'tan te mach'a chopol yo'tane.

⁴ Te mach'a ch'aj sc'ab, ya yac' ya xpobrehub, yan te sc'ab te mach'atic ya x'a'tejic ya yac' c'ulejalil.

⁵ Te mach'a ya stsobe sit te yawal sts'unub ta yorahil, ha al-nich'anil te p'ij yo'tan, yan te mach'a wayal ta yorahil tsobel sit, ha al-nich'anil te ya yac' q'uexlal.

⁶ Ya xc'oht bendicionetic ta stojol te mach'a toj yo'tan, pero ay uts'inwanej ta ye te mach'a chopol yo'tan.

⁷ Ha bendición te sna'ojibal te mach'a toj yo'tan, yan te sbihil te mach'a chopol yo'tan, ya me xc'a'.

⁸ Te mach'a p'ij yo'tan ya yich' ta cuenta te mandariletic, yan te mach'a ma sna' bin ya yal, ya xjihnot yu'un.

⁹ Te mach'a toj ya xbehen, jun yo'tan ya xbehen, yan te mach'a st'unoj chopol be, ya me xpehc'anot.

¹⁰ Te mach'a ya xmuts'sitaywan, ya yac' wocol, soc te mach'a ma sna' bin ya yal, ya xjihnot yu'un.

¹¹ Te bin ya yal te mach'a toj yo'tan, ha sloq'uib-ha' yu'un cuxlejal, pero ay uts'inwanej ta ye te mach'a chopol yo'tan.

¹² Te il-o'tanil ya shach c'op, yan te c'uxul-o'tanil ya stup'be sc'oblal spisil bintic ma lecuc.

¹³ Ay p'ijil c'op ta ye te mach'a p'ij yo'tan, pero ya yich' a'beyel xul ta spat te mach'a ma sna' q'uinal.

¹⁴ Te mach'atic ay sp'ijil yo'tanic ya sq'uejic te p'ijil-o'tanil, yan te sc'op te mach'a ma sna' q'uinal, ya yic' tal jinel.

¹⁵ Te c'ulejalil yu'un te jc'ulej, ha pueblo yu'un te joybil ta ts'ahc; te jinel yu'un te pobrehetic, ha te spobrehile.

¹⁶ Te stojol ya sta te mach'a toj yo'tan, ha cuxlejal, yan te sit ya'tel te mach'a chopol yo'tan, ya yac' mulil.

¹⁷ Te mach'a ya yich' ta cuenta te tojobtesel, ay ta sbehlal cuxlejal; yan te mach'a ya sp'aj te tojobtesel, ya xhowiy bahel.

¹⁸ Te mach'a ya smuc te il-o'tantaywanej, ya ya'iy lot, soc te mach'a ya spuc ta halel labanel, ma sna' q'uinal.

¹⁹ Ta banti ay bayel c'op, ay mulil tey a, yan te mach'a ya scom ye, ay sp'ijil yo'tan.

²⁰ Tsahbil plata c'ohem te ye te mach'a toj yo'tan, yan te yo'tan te mach'a chopol, mayuc bin ya xtuhun a.

²¹ Te ye te mach'a toj yo'tan, ya smac'lin tsobolic, yan te mach'atic ma sna'ic q'uinal, ya xchamic ta scaj te mayuc bin ya sna'ic stuquel.

²² Te bendición yu'un Jehová ya yac' c'ulejalil, soc ma ba ya yac' mel-o'tan.

²³ Te mach'a ma sna' q'uinal, ya smulan spasel te bin chopol, yan te mach'a p'ij yo'tan, ya smulan te p'ijil-o'tanile.

²⁴ Te bin ya xi' te mach'a chopol yo'tan ya me xc'oht ta stojol, yan te mach'atic toj yo'tanic, ya me x'a'botic te bin ya sc'an yo'tanic.

²⁵ C'alal ya xc'ax bahel te tulan ic', ma ba chicanix ya xhil te mach'a chopol yo'tan, yan te mach'a toj yo'tan, stalel ya xhil stuquel.

²⁶ Hich te bin ut'il vinagre ta ehal soc ch'ahil ta sitil, hich ay te mach'a ch'aj ta stojol te mach'a ticombil yu'une.

²⁷ Te xi'el te Jehová, ya xnahtij cuxlejalil yu'un, pero ya xpehc'ambot ya'bilalic te mach'atic chopol yo'tanic.

²⁸ Te bin yac smahliybel te mach'atic toj yo'tanic ha te stse'elil yo'tanic, yan te bin ya smahliyic te mach'atic chopol yo'tanic ya xch'ay bahel.

²⁹ Te be yu'un Jehová ha ahnibal yu'un te mach'a toj yo'tan, pero ha jinel c'ohem yu'un te mach'atic chopol bin ya spasique.

³⁰ Te mach'a toj yo'tan mayuc bin ora ya yich' loq'uesel, yan te mach'atic chopol yo'tanic, ma xnahinic ta q'uinal.

³¹ Ya xloc' p'ijil c'op ta ye te mach'a toj yo'tan, yan te yac' te mach'a chopol ya yich' set'el loq'uel.

³² Te ye te mach'a toj yo'tan, ya sna' te bin lec ta halele, yan te ye te mach'atic chopol yo'tanic, ya yal bohl c'opetic.