Oseas 4 - Bible in Tzeltal Bachajón

C'op yu'un Jehová ta stojol Israel

¹ Israeletic, a'iya awa'iyic te sc'op te Jehová, como ay c'op yu'un soc te mach'atic nahinemic ta q'uinal, ma ba jun yo'tanic, mayuc sc'uxul yo'tanic, ma sna'beyic sba te Diose.

² Ha nax ma jamaluc bin ya yal, ay lot, milaw, elec', antsiwej, soc bayel miltamba.

³ Ha scuentahil te ya smel yo'tan te q'uinal soc te ya xlaj yipic spisil mach'atic nahinemic tey a; ya xlajic te ha'mal chambahlametic, te mutetic ya xwihlic ta ch'ulchan, soc ha nix hich te chayetic ta mar.

⁴ ¡Ma me ayuc mach'a ya stij ta c'op o ya slehbe smul yan! Te pueblo awu'un hich ay te bin ut'il te mach'atic ya stijic ta c'op sacerdotehetic.

⁵ Ta c'ahc'aleltic ya xyahlat, soc pajal ya xyahlat soc te jalwanej ta ahc'abal, soc ya jimbat te anane.

⁶ La yich'ix jinel te pueblo cu'un ta scaj te mayuc bin sna'oj. Te bin ut'il la ach'oj bahel te bin ay ta na'el, ya jch'ojat loq'uel ta sacerdotehil; te bin ut'il ch'ay ta awo'tan te ley yu'un te Dios awu'un, ha nix hichon ya jch'ay ta co'tan te anich'nabe.

⁷ C'alal p'ohlic xan bahel, p'ohl xan te mulil yu'un ta jtojol; ya jc'atp'un ta q'uexlal te yich'elic ta muc' yu'unique.

⁸ Ya xwe'ic ta scuenta smulic te pueblo cu'un, soc ya sc'an yo'tanic te ya sle smulic.

⁹ Te sacerdote hich ya xc'oht te bin ut'il te pueblo, ya ca'be castigo yu'un te bintic spasojic, soc ya ca'be stoj ha chican te ya'telique.

¹⁰ Ya xwe'ic, pero ma xnoj sch'uhtic; ya ya'iyic antsiwej, pero ma ba ya xp'ohlic, como la yihquitayic a'batinel ta stojol Jehová.

¹¹ Te antsiwej, vino soc ya'lel ts'usub ya yac' ch'ayuc snopojibal.

¹² Te pueblo cu'un ya sjoc'obe te loc'omba yu'un te pasbil ta te', te si' ya sjac'be sc'opic; como ac'otic ta howiyel yu'un te yantsiwejic, la yihquitayic te Dios yu'unic ta scuenta yantsiwejic.

¹³ Ta sba witsiltic la yaq'uic chic'bil mahtaniletic, soc la schiq'uic pom ta sba tsehletic, ta ye'tal jihte'etic, álamohetic soc olmohetic, yu'un ay lequil axinal yu'unic. Ha yu'un la yac' sbahic ta antsinel te awantsil-nich'anic, soc te awalibic wayic soc yan winiquetic.

¹⁴ Ma ba ya ca'be castigo te awantsil-nich'nabic te c'alal ya yac' sbahic ta antsinel, o te awalibic te c'alal ya xwayic soc yan winiquetic; como ha nix te winiquetic ya xbahtic soc j'antsinel antsetic, soc ya yaq'uic chic'bil mahtaniletic soc chopol antsetic. Ha yu'un ya xyahl te pueblo te mayuc snopojibal yu'unique.

¹⁵ Teme yac awa'iy antsiwej, ha'at Israel, manchuc me ya sle smul te Judá. ¡Ma me xbahex ta Gilgal, ma me xmohex bahel ta Bet-avén, ma me hichuc xawalic ta jamal: Yiloj Jehová, ma xchihuquex!

¹⁶ Te Israel tulan yo'tan, hich te bin ut'il wacax te ma ba c'ahytesbil. Te Jehová ¿ya bal ya'be swe'elic hich te bin ut'il tuminchijetic ta jamal q'uinal aquiltic?

¹⁷ Te Efraín yac'oj sba ta sch'uhunel loc'ombahetic, ¡ihquitaya!

¹⁸ C'alal lajix te bin ya yuch'ic ya x'ochic ta antsiwej, te príncipaletic yu'unic ya smulanic te bintic q'uexlaltic sba.

¹⁹ ¡Ya xloc'otic bahel ta xic' yu'un te iq'ue, soc ya me stahic q'uexlal yu'un te chic'bil mahtaniletic yu'unique!