Oseas 12 - Bible in Tzeltal Bachajón

Efraín tsitsot yu'un chopol ya'tel

¹ Te Efraín puro ic' ya swe', sjunal c'ahc'al ya st'un bahel te ic' te ya xtal ta stojol banti ya xloc' tal c'ahc'al; ya sp'oltes te lot soc te uts'inwanej, yu'un ya schap sc'op soc Asiria soc ya yich' bahel aceite ta Egipto.

² Te Jehová ay c'op yu'un soc Judá, ya ya'be castigo te Jacob ha chican bin yilel te stalele; ya ya'be stoj ha chicn bin ya sc'an te ya'tele.

³ Ta yawil alal la stsacbe yit yoc te sbanquile, soc te c'alal muq'uix a la stsac sba soc te Diose.

⁴ La stsac sba soc jtuhl ch'ul a'bat, soc la stsal; oc' soc la sc'an te ya xna'bot yo'bolil sba yu'une. Dios la sta ta Bet-el, tey c'opoj soc a;

⁵ ha te Jehová, te Dios te scuentahinej spisil, Jehová te sbihile.

⁶ Ha yu'un, ha'at, suhtan tal ta stojol te Dios awu'une; a'iya c'uxultaywanej soc pasa te bin toj, soc spisil ora ac'a smuc'ulin awo'tan te Dios awu'une.

⁷ Te Canaán ay ta sc'ab lotil slicojibal, ya smulan lo'loywanej.

⁸ Hich la yal te Efraín: Melel jc'ulejonix, la jtahix jc'ulejal; mayuc mach'a ya stahbon bin chopol ta jtojol, o ya stahbon mulil ta spisil te ca'tele, xchi.

⁹ Pero Ho'on Jehovahon te Dios awu'un c'alal ayat to ta sq'uinal Egipto; ya cac' te ya xnahinat xan ta nahilpac' hich te bin ut'il ta sc'ahc'alel te q'uine.

¹⁰ La jc'opon te jalwanejetic, la jca'be yilic bayel nahalsitiletic, soc la jcal sloc'ombahil c'op ta scuenta te jalwanejetique.

¹¹ ¿Chopol bal te Galaad? mero mayuc scuentahilic: Ta Gilgal la yaq'uic ta chiq'uel torohetic, ha yu'un te scajtajib ta chiq'uel mahtaniletic yu'unic hich ya xc'ohtic te bin ut'il busambil tonetic ta sba te chahpambil q'uinale.

¹² Te Jacob baht ta ahnel ta sq'uinal Aram; te Israel la yac' sba ta a'batinel yu'un ya sta yihnam a, soc la scanantay tuminchijetic yu'un ya sta yihnam a.

¹³ Ta scuenta jtuhl jalwanej te Jehová la sloq'ues tal ta Egipto te Israel; soc ta scuenta jtuhl jalwanej la scanantay.

¹⁴ Te Efraín la yac' ilinuc yo'tan Dios, ch'ahub yo'tan yu'un; ha yu'un te Ajwalil yu'un ya yac' c'ohtuc ta stojol te ch'ich' smaloj, soc ya ya'be stoj te bin chopol spasoje.