Oseas 1 - Bible in Tzeltal Bachajón

Yihnam Oseas soc snich'nab

¹ Ha sc'op Jehová te tal ta stojol Oseas snich'an Beeri, ta yorahil Uzías, Jotam, Acaz soc Ezequías, ajwaliletic yu'un Judá, soc ta yorahil Jeroboam snich'an Joás, ajwalil yu'un Israel.

² Ha te shahchibal te sc'op Jehová te la yal ta scuenta Oseas. Hich la yalbe te Oseas: Bahan, ic'a jtuhl j'antsinel ants soc ac'a awal-anich'nab soc te ayic ta scuenta mulil, como yac ta antsinel te pueblo te la yihquitay hilel te Jehová, xchi.

³ Ha yu'un te Oseas la yic' yihnamin te Gomer yantsil-nich'an Diblaim, hahch yal, ayin jtuhl squerem-al.

⁴ Te Oseas hich halbot yu'un te Jehová: A'beya sbihilin Jezreel te alale, como nopol ya ca'be castigo te mach'atic ay yu'un Jehú ta scaj te ch'ich' la yich' malel ta Jezreel, soc ya jlajin te nación Israel.

⁵ Ta hich sc'ahc'alel ya jwac'be te t'ihmalte' yu'un Israel ta spamlej yu'un Jezreel, xchi.

⁶ Te Gomer cha'hahch xan yal, la yalatay jtuhl ach'ix. Te Jehová la yalbe te Oseas: A'beya sbihilin Lo-ruhama como ma ba ya jna'beyix xan yo'bolil sba te sna Israel, ma ba ya jpasbeyix perdón.

⁷ Pero ya jna'be yo'bolil sba te sna Judá: ya jcoltay ta scuenta Jehová te Dios yu'une, ma ha'uc ta scuenta t'ihmalte', o espada, guerra, cawuhetic, o mach'atic cajajtic tey a, xchi.

⁸ C'alal hil schu' te Lo-ruhama, hahch yan yal te Gomer, la yalatay jtuhl querem.

⁹ Te Jehová la yal: A'beya sbihilin Lo-ami, como te ha'exe ma ha'uquex pueblo cu'un, soc ma ho'uconix Dioson awu'unic.

¹⁰ Aunque hich ay, te israeletic hich ya xc'ohtic te bin ut'il shi'al mar, te ma xhu' ta p'isel o ta ahtayel. Ta banti hich ya xhalbotic: Ma puelohuquex cu'un, te xchihe, hich ya xhalbotic: Yal-snich'anex te cuxul Dios, xchi sc'oblalic.

¹¹ Ya me stsob sbahic te snich'nab Judá soc Israel, soc ya me slehic jtuhl jtsobaw yu'unic; soc ya me xhahchic ta q'uinal, como muc' ya xc'oht sc'ahc'alel te Jezreel.