Números 9 - Bible in Tzeltal Bachajón

Spasel Q'uin Pascua

¹ Te Jehová la sc'opon te Moisés ta jochol taquin q'uinal Sinaí, ta shahchibal u ta schebal ha'bil sloq'uelic tal ta sq'uinal Egipto a, hich la yalbe:

² Te snich'nab Israel ya me spasic te Q'uin Pascua ta mero yorahil.

³ Ya me apasic ta schanlajunebal (14) c'ahc'alel ta shahchibal u ini, ta yihc'ubel q'uinal, ta mero yorahil; hich me yac apasic te bin ut'il spisil bintic ya sc'an pasel soc hich te bin ut'il spisil te mandariletic yu'une, xchi.

⁴ Ha yu'un te Moisés la yalbe te snich'nab Israel te ya spasic te Q'uin Pascua.

⁵ Hich la spasic te Q'uin Pascua ta shahchibal u ta schanlajunebal (14) c'ahc'al, ta yihc'ubel q'uinal, ta jochol taquin q'uinal Sinaí; hich te bin ut'il spisil bintic pasot ta mandar yu'un Jehová te Moisés, hich la spasic te snich'nab Israel.

⁶ Pero ay mach'atic te bohloben sc'oblalic ta scuenta te la spic te mach'a chamen, hich ma ba hu' yu'unic spasel te Pascua ta sc'ahc'alel. Ha yu'un talic ta stojol te Moisés soc Aarón ta yorahil nix,

⁷ hich la yalbeyic: Te ho'otcotic ma lecuc jc'oblalcotic ta scuenta te mach'a chamen. ¿Bin yu'un te ma xhu' te pajal ya ca'becotic smahtan Jehová soc te yantic snich'nab Israel ta yorahil? xchihic.

⁸ La sjac' te Moisés: Mahliyahic, ya ca'iy bin ya yal ta mandar te Jehová ta acuentahic, xchi.

⁹ Te Jehová hich la yalbe te Moisés:

¹⁰ Halbeya te snich'nab Israel: Mach'ayuquex a, o te patil bahel ats'umbalic, te bohloben sc'oblal ta scuenta te la spic te mach'a chamen, o teme namal yac ta behele, ya xhu' ya spas te Q'uin Pascua ta stojol Jehová.

¹¹ Ha ya spasic ta schanlajunebal (14) c'ahc'al ta schebal u, ta yihc'ubel q'uinal; ya swe'ic te tuminchij soc pan ma ba yich'oj levadura soc ch'ahal ha'mal.

¹² Ma me ayuc bin ya yihquitayic hilel yu'un pajel, soc ma ba ya swac'beyic junuc sbaquel. Ya me spasic hich te bin ut'il spisil te bin chapal yu'un te Q'uin Pascua.

¹³ Yan te mach'a lec sc'oblal soc te ma namaluc yac ta behel, teme ma ba ya spas te Q'uin Pascua, ya me yich' loq'uesel ta yohlil te slumale. Ha ya scuch smul ta scaj te ma ba la ya'be smahtan te Jehová ta yorahil.

¹⁴ Teme ay jyanlum te nahinem ta awohlilic te ya spas te Q'uin Pascua ta stojol Jehová, hich me ya spas te bin ut'il ya sc'an pasel soc hich te bin ut'il te mandariletic yu'une. Junax mandaril awu'unic soc te jyanlum soc te mach'a ha nix slumal, xchi.

Te tocal ta sba Nahilpac' Templo

¹⁵ Te bin c'ahc'alil te la yich' tehc'anel te Nahilpac' Templo, te tocal la yaxintes te Nahilpac' yu'un te Testigo-c'op. Ta yihc'ubel q'uinal ha to c'alal ta sacubel q'uinal ay ta sba te Nahilpac' Templo, hich yilel te bin ut'il c'ahc'.

¹⁶ Hich ay spisil ora: ta c'ahc'alel ya x'axintesot ta tocal, ta ahc'abal hich yilel te bin ut'il c'ahc'.

¹⁷ C'alal ya xhahch te tocal ta sba te Nahilpac' Templo, te snich'nab Israel ya xhahchic ta behel; te banti ya xtehc'aj te tocal, tey ya spas scampamentohic a.

¹⁸ Ta smandar Jehová ya xhahchic ta behel, soc ta smandar Jehová ya spas scampamentohic. Te jayeb c'ahc'al ay ta sba te Nahilpac' Templo te tocal ya x'ayinic ta scampamentohic.

¹⁹ Teme bayel c'ahc'al ay ta sba te Nahilpac' Templo te tocale, te snich'nab Israel ya sch'uhumbeyic smandar te Jehová, ma ba ya xhahchic bahel.

²⁰ Teme ma ba bayel c'ahc'al ay ta sba te Nahilpac' Templo, ta smandar Jehová ya x'ayinic ta scampamentohic, soc ta smandar Jehová ya xhahchic ta behel.

²¹ Te c'alal ya xhil te tocal c'alal ta tibiltic ha to ta sacubel q'uinal, o c'alal ya xhahch ta sab, ya xhahchic ta behel; o teme ya x'ayin jun c'ahc'al, teme ya xhahch bahel ta ahc'abal te tocale, ya xhahchic ta behel.

²² Teme ya xhil te tocal ta sba te Nahilpac' Templo cheb c'ahc'al, jun u, o jun ha'bil, te c'alal tey ay a te tocal, te snich'nab Israel ya xhilic ta scampamentohic, ma ba ya xhahchic bahel. Pero c'alal ya xhahch bahel te tocal, ha nix hich ya xhahchic bahel.

²³ Ta smandar Jehová ya spas scampamentohic, ta smandar Jehová ya xhahchic ta behel. Hich la sch'uhumbeyic smandar te Jehová, hich te bin ut'il yaloj Jehová ta scuenta Moisés.