Números 31 - Bible in Tzeltal Bachajón

Israel ya sutbe spacol bin la spas Madián

¹ Te Jehová la yalbe te Moisés:

² Sutbeya spacol te bin pasbotic te snich'nab Israel yu'un te madianetic; patil ya xchamat, xchi sc'oblal.

³ Ha yu'un te Moisés la yalbe te pueblo: Ac'a schahpan sbahic winiquetic ta awohlilic yu'un ya ya'beyic guerra te Madián, yu'un ya sutbeyic spacol ta scuenta Jehová te Madián.

⁴ Ta jujuchahp te snich'nab Israel ya me aticon lajunwinic yoxbahc' (1,000) ta tuhl winiquetic ta yaq'uel guerra, xchi.

⁵ Ha yu'un ta jujuchahp yu'un Israel la stsahic loq'uel lajunwinic yoxbahc' (1,000) ta tuhl winiquetic; ta spisil j'ohlil scha'pic (12,000) ta tuhl te chapalic ta yaq'uel guerra.

⁶ Te Moisés la sticonlan bahel ta guerra, lajunwinic yoxbahc' (1,000) ta tuhl ta jujuchahp. Te Finees snich'an te sacerdote Eleazar, baht ta querra, yich'oj bahel biluquetic yu'un te ch'ul awilal soc te cornetahetic yu'un ya yich'ic oq'uesinel.

⁷ La ya'be sbahic guerra soc Madián, hich te bin ut'il halbot yu'un Jehová te Moisés; la smilic spisil te winiquetique.

⁸ Soc la smilic te Evi, Requem, Zur, Hur soc Reba, ha te ho'tuhl ajwaliletic yu'un Madián; soc la smilic ta espada te Balaam snich'an Beor.

⁹ Te snich'nab Israel la schuquic bahel te madian-antsetic soc te alaletic yu'unic, spisil schansbahlamic soc spisil sbiluquic.

¹⁰ Soc la schic'beyic hilel spisil te pueblohetic, tut pueblohetic soc te nahetic yu'unique.

¹¹ La spojbeyic spisil te bintic ay yu'unic, ha chambahlametic soc ants-winiquetic.

¹² La yiq'uic tal te jchuqueletic soc te biluquetic te la spojic, la yaq'uic ta stojol Moisés, te sacerdote Eleazar soc te pueblo yu'un te snich'nab Israel ta scampamentohic ta spamlej yu'un Moab, ta nopol Jordán, te snuhp'usitayej sba soc Jericó.

¹³ Te Moisés, te sacerdote Eleazar soc spisil te príncipaletic yu'un te pueblo baht stahic ta fuera yu'un te campamento.

¹⁴ Pero te Moisés ilin ta stojol te capitanetic yu'un te soldadohetic, ha te jtsobawetic yu'un te lajlajunwinic yoxbahc' (1,000) soc yu'un te ho'ho'winic (100) te yaquic ta suhtel tal ta guerra.

¹⁵ Te Moisés hich la yalbe: ¿Bin yu'un te cuxul hil awu'unic spisil te antsetique?

¹⁶ Ta scuenta sc'op Balaam la ya'beyic sc'axuntaybe sc'op Jehová te snich'nab Israel te c'oht ta pasel ta Baal-peor, te ha scuentahil tal te jmilawal-chamel ta stojol te pueblo yu'un Jehová.

¹⁷ Ha yu'un milahic ta ora spisil te bic'tal queremetic, soc milahic spisil te antsetic tahbilix ta winique.

¹⁸ Pero spisil te ach'ixetic te ma to tabiluc ta winic, ac'a cuxajuc.

¹⁹ Te jayebex te ay mach'atic amilojic o teme ay la apiquic te mach'a chamene, ayinanic ta fuera yu'un te campamento huqueb c'ahc'al. Te ha'ex soc te jchuqueletic awu'unic ya me alecubtes abahic ta yoxebal c'ahc'al soc ta shuquebal c'ahc'al.

²⁰ Lecubtesahic spisil te c'u'uletic, te bintic pasbil ta nuhcul, te bintic pasbil ta stsotsel tentsun soc spisil te bintic pasbil ta te', xchi te Moisés.

La yich' puhquel bintic la yich' pojel tal

²¹ Te sacerdote Eleazar hich la yalbe spisil te soldadohetic te suhtic tal ta guerra: Ha smandar Jehová ini te la ya'be te Moisés:

²² Te oro, plata, bronce, hierro, estaño soc plomo,

²³ spisil te bintic ya xcuhch yu'un c'ahc', ya me awotsesic ta c'ahc', hich ya xlecub sc'oblal a, pero ha nix hich ya me yich' lecubtesel ta ha' scuenta slecubtesel. Yan te biluquetic te ma xcuhch yu'un c'ahc', ya me ac'ases ta ha'.

²⁴ Ta shuquebal c'ahc'al ya me asac' ac'u' apaq'uic, hich ya xlecub ac'oblalic a, patil ya xhu' ya x'ochex bahel ta campamento, xchi.

²⁵ Te Jehová la yalbe te Moisés:

²⁶ Ha'at soc te sacerdote Eleazar soc te tatiletic ta jujuchahp na yu'un te pueblo, ya me awahtayic te bintic pojbil tal, ha te mach'atic la achuquic talel soc te chambahlametic;

²⁷ ya me aloq'ues cha'chahp a, jchahp yac apucticlambe te mach'atic c'ohtic ta guerra; jchahp yac awa'be spisil te pueblo.

²⁸ Parte yac awa'be Jehová te spatanic te mach'atic c'ohtic ta guerra; ta ho'winic scha'bahc' (500) ya me aloq'ues jun ta spisil te jchuqueletic, wacaxetic, burrohetic, tuminchijetic soc tentsunetic.

²⁹ Ya me awa'be te sacerdote Eleazar j'ohlil scuenta mahtanil ta stojol Jehová.

³⁰ Ta j'ohlil yu'un te snich'nab Israel ya me aloq'ues jun ta lajuneb yoxwinic (50) yu'un te jchuqueletic, wacaxetic, burrohetic, tuminchijetic soc tentsunetic, spisil te chambahlametic, ha me yac awa'beyic te levitahetic te ya scanantayic te Nahilpac' yu'un Jehová, xchi.

³¹ Te Moisés soc te Eleazar hich la spasic te bin ut'il pasotic ta mandar yu'un Jehová te Moisés.

³² Te jayeb hil yu'un te bintic pojbil, te ma ba la yich'ic te winiquetic te la yaq'uic guerra: ha chaneb yo'winic ta pic soc lajunwinic swaxacbahc' (675,000) tuminchijetic soc tentsunetic,

³³ balunpic (72,000) wacaxetic,

³⁴ hucpic soc j'ohlil yoxlajunbahc' (61,000) burrohetic,

³⁵ soc chanpic (32,000) ach'ixetic te ma tabiluc ta winic.

³⁶ Te j'ohlil yu'un te mach'atic bahtic ta guerra: ha cheb yoxwinic ta pic soc ho'lajunwinic schanbahc' (337,500) tuminchijetic soc tentsunetic;

³⁷ soc te spatan la ya'beyic te Jehová, ha ho'lajuneb schanlajunwinic scha'bahc' (675) tuminchijetic soc tentsunetic.

³⁸ Ta banti te j'ohlil yo'pic (36,000) ta coht wacaxetic la sloq'uesic lahchayeb schanwinic (72) ta coht yu'un spatanic ta stojol te Jehová.

³⁹ Ta banti te oxpic soc ho'winic shuclajunbahc' (30,500) ta coht burrohetic, la sloq'uesic jun schanwinic (61) ta coht yu'un spatanic ta stojol te Jehová.

⁴⁰ Ta banti te cha'pic (16,000) ta tuhl ach'ixetic la sloq'uesic lahchayeb scha'winic (32) ta tuhl yu'un spatanic ta stojol te Jehová.

⁴¹ Te Moisés la yac' te patanil scuenta smahtan Jehová ta stojol te sacerdote Eleazar, hich te bin ut'il pasot ta mandar yu'un Jehová.

⁴² Te j'ohlil xan yu'un te snich'nab Israel, te la sloq'ues te Moisés ta banti te bintic pojbil yu'un te winiquetic te c'ohtic ta guerra,

⁴³ ha cheb yoxwinic ta pic soc ho'lajunwinic schanbahc' (337,500) tuminchijetic,

⁴⁴ j'ohlil yo'pic (36,000) wacaxetic,

⁴⁵ oxpic soc ho'winic shuclajunbahc' (30,500) burrohetic,

⁴⁶ soc cha'pic (16,000) ach'ixetic.

⁴⁷ Ta banti te j'ohlil yu'un te snich'nab Israel la sloq'ues te Moisés jun ta lajuneb yoxwinic (50) jchuqueletic soc chambahlametic, la ya'be te levitahetic te ya scanantayic te Nahilpac' Templo yu'un Jehová, hich te bin ut'il pasot ta mandar yu'un Jehová.

⁴⁸ Te jtsobawetic yu'un te lajlajunwinic yoxbahc' (1,000) soc te ho'ho'winic (100) soldadohetic baht sc'oponic te Moisés,

⁴⁹ hich la yalbeyic: Ho'otcotic te a'batotcotic awu'un la jcahtaycotic te soldadohetic te ay ta jcuentacotic, mayuc ch'ayem jtuhluc.

⁵⁰ Ha yu'un la jca'becotic smahtanin Jehová te bintic la jtahcotic jujutuhl: ha te bintic pasbilic ta oro, sch'ahlel c'abaletic soc nuc' c'abaletic, ch'ocowiletic, staq'uinal chiquiniletic soc uhalil, scuenta stojel jmulcotic ta stojol Jehová, xchihic.

⁵¹ Te Moisés soc te Eleazar la yich'beyic hilel spisil te bintic pasbil ta oro.

⁵² Spisil te oro te la ya'beyic smahtanin Jehová te jtsobawetic yu'un te lajlajunwinic yoxbahc' (1,000) soc te ho'ho'winic (100), ha cha'pic soc lajuneb swaxaclajunwinic scha'bahc' (16,750) ciclohetic yalal.

⁵³ Te jujutuhl soldado ay bin spojojic tal.

⁵⁴ Ha yu'un te Moisés soc te sacerdote Eleazar la yich'beyic hilel te oro yu'un te jtsobawetic yu'un te lajlajunwinic yoxbahc' (1,000) soc te ho'ho'winic (100), la yich'ic bahel ta Nahilpac' Templo yu'un tahojibal scuenta sna'ojibal yu'un te snich'nab Israel ta stojol Jehová.